Read O‘zbek tilidagi Muqaddas Kitob, 2013 1 Solnomalar 14 Bible Online

1 Solnomalar 14 - O‘zbek tilidagi Muqaddas Kitob, 2013 bible

1 Solnomalar 14

¹Tir shohi Xiram Dovudga elchilar jo‘natib, uning uchun saroy qurdirish niyatida sadr yog‘ochlarini, tosh teruvchilar va duradgorlarni ham yo‘lladi.

²Dovud endi bildiki, Egamiz uni Isroil ustidan shoh qilib tayinlagan ekan, O‘z xalqining haqi–hurmati uchun uning shohligini nihoyatda yuksaltirgan ekan.

³Dovud Quddusda yana xotinlar oldi, ulardan yanada ko‘p o‘g‘il–qizlar ko‘rdi.

⁴Dovudning Quddusda tug‘ilgan farzandlari quyidagilar edi: Shammuva, Sho‘vav, Natan, Sulaymon,

⁵Yibxar, Elishuva, Elfalat,

⁶No‘g‘ax, Nafax, Yofiya,

⁷Elishama, Balyodo va Elifalet.

⁸Filistlar: “Dovudga moy surtilibdi. U butun Isroil xalqi ustidan shoh bo‘libdi”, degan xabarni eshitishdi. Shundan keyin barcha Filist lashkari Dovudni qidirib jangga otlandilar. Dovud bundan xabardor bo‘lgach, ularga qarshi saf torttirdi.

⁹Filistlar kelib, Rafa soyligini talon–taroj qila boshladilar.

¹⁰Dovud Xudodan: — Filistlarga hujum qilaymi? Ularni qo‘limga berasanmi? — deb so‘radi. — Hujum qil! — deb javob berdi Egamiz Dovudga, — ularni qo‘lingga beraman.

¹¹Shunday qilib, Dovud Baal–Perazimga borib, u yerda Filistlarni tor–mor qildi. Keyin shunday dedi: — Suv to‘g‘ondan toshib dalani bosgani singari, Egam g‘animlarimni bosib, mening qo‘lim bilan ularni uloqtirib yubordi. Shu sababdan bu yerga “Baal–Perazim” degan nom berildi.

¹²Filistlar o‘sha yerda xudolarini tashlab qochgan edilar, Dovud ularni yondirib yuborishni buyurdi.

¹³Ko‘p o‘tmay Filistlar soylikka qaytib kelib, u yerlarni yana talon–taroj qila boshladilar.

¹⁴Dovud tag‘in Xudoning xohish–irodasini so‘radi. Xudo esa unga shunday javob berdi: “Sen ularning qarshisidan hujum qilma. Ularni aylanib o‘tgin–da, mumiyoli daraxtlar tomondan yaqinlashib bor.

¹⁵Mumiyoli daraxtlar tepasida qadam tovushlarini eshitganing zahoti ularga hujum qil. O‘shanda Men Filist lashkarini yo‘q qilish uchun sening qarshingdan chiqqan bo‘laman.”

¹⁶Dovud Xudo amr berganiday qilib, Givondan Gezer shahrigacha bo‘lgan joylarda Filistlar lashkarini tor–mor qildi.

¹⁷Dovudning dong‘i hamma yurtlarga tarqaldi. Egamiz hamma xalqlarni undan qo‘rqadigan qilib qo‘ydi.