Read O‘zbek tilidagi Muqaddas Kitob, 2013 1 Solnomalar 23 Bible Online

1 Solnomalar 23 - O‘zbek tilidagi Muqaddas Kitob, 2013 bible

1 Solnomalar 23

¹Dovud rosa keksayib, umri oxirlashib qolgach, o‘g‘li Sulaymonni Isroil ustidan shoh qildi.

²Dovud Isroilning hamma yo‘lboshchilarini, ruhoniylarini va levilarni to‘pladi.

³U o‘ttiz va undan yuqori yoshdagi levilarni hisobladi. Ularning jami 38.000 erkak chiqdi.

⁴Shunda Dovud aytdi: “Bulardan 24.000 tasi Egamizning uyidagi ishlar uchun mas’ul bo‘ladi, 6000 tasi amaldorlar va hakamlar bo‘lib xizmat qiladi,

⁵4000 tasi darvozabon bo‘ladi, qolgan 4000 tasi esa men yasattirgan musiqiy asboblarni chalib, Egamizni madh qiladi.”

⁶Dovud levilarni urug‘lariga ko‘ra, Gershon, Qohot va Marori guruhlariga bo‘ldi.

⁷Gershonning Laden va Shimax degan ikki o‘g‘li bor edi.

⁸Ladenning uchta o‘g‘li bo‘lib, to‘ng‘ichi Yoxiyol, o‘rtanchasi Zatom va kenjasi Yo‘el edi.

⁹Ular Laden naslining urug‘boshilari edilar. Shimaxning Shalumo‘t, Xaziyol va Xaron ismli uch o‘g‘li bor edi.

¹⁰[10-11] Keyinchalik Shimax yana to‘rt o‘g‘il ko‘rdi, ularning tartibi quyidagicha edi: Yaxat, Zenax, Yoush va Bariyo. Yoush bilan Bariyoning o‘g‘illari kam bo‘lgani uchun, ular bitta xonadon hisoblanardilar.

¹²Qohotning to‘rtta o‘g‘li bo‘lib, ularning ismlari Imrom, Izxor, Xevron va Uziyol edi.

¹³Imromning o‘g‘illari Horun va Muso edi. Horun Xudoga bag‘ishlangan bo‘lib, eng muqaddas ashyolar uchun mas’uliyat to abad uning va uning nasli zimmasiga yuklangan edi. Ular Egamizning huzurida qurbonliklar keltirishlari, Unga xizmat qilishlari va to abad Uning nomidan xalqni duo qilishlari kerak edi.

¹⁴Xudoning odami Musoga kelsak, uning o‘g‘illari Levi qabilasining bir qismi hisoblanardi.

¹⁵Musoning Gershom va Eliazar degan ikki o‘g‘li bor edi.

¹⁶Gershomning o‘g‘illari orasida Shavuvol to‘ng‘ichi edi.

¹⁷Eliazarning to‘ng‘ich farzandi Raxaviyo edi. Eliazarning undan bo‘lak o‘g‘illari bo‘lmasa–da, Raxaviyoning o‘g‘illari nihoyatda ko‘p edi.

¹⁸Qohotning ikkinchi o‘g‘li Izxor ham o‘g‘illar ko‘rgan edi. Uning to‘ng‘ich o‘g‘li Shalumit edi.

¹⁹Qohotning uchinchi o‘g‘li Xevron to‘rt o‘g‘il ko‘rgan edi. To‘ng‘ich o‘g‘lining ismi Yoriyo, keyingilarniki Emoriyo, Yaxaziyol va Yoxamom edi.

²⁰Qohotning kenja o‘g‘li Uziyolning ikki o‘g‘li bor edi: to‘ng‘ichi Mixo va kenjasi Ishshiyo.

²¹Marorining Maxli va Mushi degan ikkita o‘g‘li bor edi. Maxlining Elazar va Kish ismli ikkita o‘g‘li bor edi.

²²Elazar o‘g‘il ko‘rmay o‘tib ketdi. Undan faqat qizlar tug‘ildi. Uning qizlari o‘zlarining amakivachchalari — Kishning o‘g‘illariga turmushga chiqdilar.

²³Mushining Maxli, Eder va Yorimo‘t ismli uch o‘g‘li bor edi.

²⁴Xullas, levilarning nomma–nom ro‘yxatga kiritilgan avlodlari, ularning urug‘ va xonadonlari shulardan iborat edi. Yigirma va undan yuqori yoshdagi levilar Egamizning uyidagi xizmatga tayinlangan edilar.

²⁵Dovud shunday degan edi: “Isroil xalqining Xudosi — Egamiz O‘z xalqiga tinchlik ato qildi. Endi U Quddusda abadiy istiqomat qiladi.

²⁶Shunday ekan, bundan buyon levilar Egamizning chodirini yoki unda ishlatiladigan ashyolarni ko‘tarib yurishlari shart emas.”

²⁷Dovudning oxirgi farmoniga ko‘ra, yigirma va undan yuqori yoshdagi levilar ro‘yxatga olingan edilar.

²⁸Levilarning vazifasi Egamizning uyidagi xizmatda Horun nasliga yordam berish edi. Bularning ichiga: hovli va yon xonalarga mas’ul bo‘lish, muqaddas narsalarni poklash va Egamizning uyidagi har qanday boshqa yumushlarni bajarish kirar edi.

²⁹Shuningdek, levilar Egamiz huzuridagi xontaxta ustiga qo‘yiladigan nonlar, don nazri uchun sifatli un, xamirturushsiz chalpaklar, pishirib tayyorlanadigan nazrlar, zaytun moyi aralashtirilgan nazrlar, nazrlarning og‘irligi, soni va hajmi uchun mas’ul edilar.

³⁰Har kuni ertalab va kechqurun ular Ma’badda Egamizga shukronalar aytib, hamdu sanolar kuylashlari kerak edi.

³¹Shabbat kunlari, yangi oy va boshqa belgilangan bayramlarda qurbonliklar kuydirilganda ham shukronalar aytib, hamdu sanolar kuylash ularning zimmasida edi. Egamizning huzurida doimo xizmat qilayotgan levilarning soni qoidaga muvofiq bo‘lishi shart edi.

³²Demak, levilar Uchrashuv chodiri va Ma’bad uchun mas’ul bo‘lib, Egamizning uyida xizmat qilgan o‘z qarindoshlari — Horun nasliga yordam berishlari kerak edi.