Read O‘zbek tilidagi Muqaddas Kitob, 2013 2 Solnomalar 16 Bible Online

2 Solnomalar 16 - O‘zbek tilidagi Muqaddas Kitob, 2013 bible

2 Solnomalar 16

¹Oso hukmronligining o‘ttiz oltinchi yilida Isroil shohi Basho Yahudoga hujum qildi. Odamlar Yahudo yurtiga osonlikcha kirib chiqa olmasligi uchun, u Rama shahrini mustahkamladi.

²Oso Egamizning uyidagi va saroydagi xazinalardan kumush va oltinlarni olib, Damashqda o‘tirgan Oram shohi Banhadadga jo‘natdi. Oso unga shu xabarni ham yubordi:

³“Sening otang bilan mening otam o‘rtasida ittifoq bo‘lgani kabi, sen bilan mening o‘rtamda ham ittifoq bo‘lsin. Senga kumush va oltin berib yuboryapman. Isroil shohi Basho bilan ittifoq tuzgan eding, endi o‘shani bekor qil, toki u yurtimdan jo‘nab qolsin.”

⁴Banhadad shoh Osoning taklifini qabul qildi, lashkarboshilariga: “Isroil shaharlariga hujum qilinglar”, deb ularni o‘sha yoqqa yubordi. Ular Iyxon, Dan, Ovil–Mayim shaharlarini va Naftali hududidagi barcha ombor shaharlarni bosib oldilar.

⁵Basho bu voqeani eshitgach, Ramani mustahkamlash fikridan voz kechib, ishni to‘xtatib qo‘ydi.

⁶Shoh Oso jamiki Yahudo xalqini chaqirtirib, ularga Rama shahrini mustahkamlashda Basho ishlatgan tosh va yog‘ochlarni tashittirdi. Oso o‘sha tosh va yog‘ochlar bilan G‘ibo hamda Mispax shaharlarini mustahkamladi.

⁷Shu vaqtda valiy Xonin Yahudo shohi Osoning huzuriga kelib, unga aytdi: “Sen Egang Xudoga suyanmasdan, Oram shohiga suyanding. Shuning uchun Oram shohining lashkarlarini qo‘ldan boy berding.

⁸Nahotki Habashistonliklar bilan Liviyaliklar esingda bo‘lmasa?! Ular son–sanoqsiz lashkari, ko‘plab jang aravalari va otliq sipohlari bilan kelgan edi–ku. O‘shanda Sen Egamizga suyanganing uchun, Egamiz ularni sening qo‘lingga bergan edi.

⁹Egamiz yer yuzidagi hammani kuzatib turadi, Unga sodiq bo‘lganlarga U kuch–qudrat beradi. Sen aqlsizlarcha ish tutding. Bundan buyon sening boshing urushdan chiqmaydi.”

¹⁰Oso valiyning bu gaplaridan g‘azablandi. U g‘azab ustida valiyni zindonga tashladi. Xalqdan ba’zilarini ham shafqatsizlarcha eza boshladi.

¹¹Osoning butun faoliyati, boshidan oxirigacha “Yahudo va Isroil shohlari tarixi” kitobida yozib qoldirilgan.

¹²Hukmronligining o‘ttiz to‘qqizinchi yilida Osoning oyoqlari og‘riydigan bo‘lib qoldi. Uning ahvoli juda og‘ir bo‘lishiga qaramay, u kasallik paytida ham Egamizga yuzini burmadi, faqat tabiblardan yordam so‘radi.

¹³Nihoyat, Oso hukmronligining qirq birinchi yilida olamdan o‘tdi.

¹⁴Uni attorlar tayyorlagan turli–tuman ziravorlar bilan to‘la tobutga yotqizdilar. U Dovudning qal’asida, o‘zi uchun qoyadan o‘ydirgan qabrga dafn qilindi. Uning sharafiga katta gulxan yoqdilar.