Read O‘zbek tilidagi Muqaddas Kitob, 2013 2 Solnomalar 17 Bible Online

2 Solnomalar 17 - O‘zbek tilidagi Muqaddas Kitob, 2013 bible

2 Solnomalar 17

¹Yohushafat otasi Oso o‘rniga shoh bo‘ldi, u Isroilga qarshi mudofaasini kuchaytirdi.

²U Yahudodagi hamma mustahkam shaharlarga lashkarlarni joylashtirdi. Yahudo yerlarida hamda otasi Oso qo‘lga kiritgan Efrayim shaharlarida ko‘plab qo‘nolg‘alar o‘rnashtirdi.

³Yohushafat bobosi Dovudning yo‘lidan yurgani uchun Egamiz u bilan birga bo‘ldi. Yohushafat Baalga sig‘inmay,

⁴otasining Xudosiga intildi, Isroil shohlari yo‘llaridan yurmasdan, Xudoning amrlariga itoat etdi.

⁵Shuning uchun Egamiz uning hokimiyatini mustahkam qildi. Butun Yahudo xalqi Yohushafatga o‘lpon to‘lardi, u katta boylik va shuhrat topdi.

⁶Egamizga itoat qilishdan u zavq olar edi. Shu bois, u Yahudodagi sajdagohlarni yo‘qotdi, Asheraga atalgan ustunlarni chopib tashladi.

⁷Hukmronligining uchinchi yilida xalqqa ta’lim berish uchun o‘z a’yonlari Banxayilni, Obodiyoni, Zakariyoni, Natanilni va Mixiyoni Yahudo shaharlariga jo‘natdi.

⁸Levilardan Shamayo, Nataniyo, Zabadiyo, Osoyil, Shamiromo‘t, Yo‘natan, Odoniyo, To‘viyoxu va To‘doniyo hamda ruhoniylar Elishama va Yohuram ularga hamroh bo‘ldilar.

⁹Ular Egamizning Tavrot kitobini olib, Yahudoning hamma shaharlariga borishdi va xalqqa ta’lim berishdi.

¹⁰Yahudo atroflaridagi xalqlarga Egamiz qo‘rquv soldi, shuning uchun o‘sha xalqlar Yohushafatga qarshi urush qilmadilar.

¹¹Ba’zi Filistlar Yohushafatga katta miqdorda kumushni o‘lpon qilib olib keldilar. Arablar ham 7.700 ta qo‘chqor va 7.700 ta taka olib keldilar.

¹²Yohushafat tobora kuchayib boraverdi. U Yahudoda qal’alar va ombor shaharlar qurdirdi.

¹³U yerga ko‘p miqdorda oziq–ovqat to‘pladi. Quddusga tajribali bahodir jangchilarni joylashtirdi.

¹⁴Bu jangchilar xonadonlariga ko‘ra, safarbar qilingan edilar: Yahudo qabilasining sipohlariga lashkarboshi Adnah edi. Uning qo‘li ostida 300.000 bahodir jangchi bo‘lib, ular 1.000 jangchidan tashkil topgan bo‘linmalarga bo‘lingan edilar.

¹⁵Ikkinchi lashkarboshi Yohuxanon edi, uning qo‘li ostida 280.000 sipohi bor edi.

¹⁶Uchinchi lashkarboshi Zixri o‘g‘li Amasiyo edi, uning qo‘li ostida 200.000 sipohi bor edi. Amasiyo o‘z xohishi bilan Egamizga xizmat qilayotgan edi.

¹⁷Benyamin qabilasining sipohlariga lashkarboshi Elyodax edi. U bahodir jangchi bo‘lib, qo‘li ostida yoy va qalqon bilan qurollangan 200.000 sipohi bor edi.

¹⁸Elyodaxning o‘ng qo‘l yordamchisi Yohuzabad edi, uning qo‘li ostida qurollangan 180.000 sipohi bor edi.

¹⁹Bu jangchilar shohga Quddusda xizmat qilar edilar. Bulardan tashqari, shoh mustahkam shaharlarga boshqa lashkarlarni ham joylashtirgan edi.