Read O‘zbek tilidagi Muqaddas Kitob, 2013 2 Solnomalar 23 Bible Online

2 Solnomalar 23 - O‘zbek tilidagi Muqaddas Kitob, 2013 bible

2 Solnomalar 23

¹Yettinchi yili ruhoniy Yohayido qo‘rqmay harakatga tushdi. U quyidagi yuzboshilar bilan ahd qildi: Yeroxam o‘g‘li Ozariyo, Yohuxanon o‘g‘li Ismoil, Obid o‘g‘li Ozariyo, Odayo o‘g‘li Masiyo va Zixri o‘g‘li Elishafat.

²Ular Yahudo yurtini kezib chiqdilar, Yahudoning hamma shaharlaridan levilarni va Isroil urug‘boshilarini yig‘ib, Quddusga olib keldilar.

³Kelganlarning hammasi Xudoning uyiga yig‘ilib, o‘sha yerda shoh bilan ahd qildilar. Yohayido ularga shunday dedi: “Mana shohning o‘g‘li! Egamizning Dovud o‘g‘illari haqida bergan va’dasiga muvofiq, bu o‘g‘il hukmronlik qilsin.

⁴Endi sizlar bunday qilasizlar: Shabbat kuni xizmat qiladigan ruhoniy va levilarning uchdan bir qismi darvozalarni qo‘riqlasin.

⁵Uchdan biri — shohning uyida, uchdan biri esa Asos darvozasida bo‘lsin. Xalq ommasi Egamiz uyining hovlilarida tursin.

⁶Egamizning uyiga ruhoniylar bilan xizmatdagi levilardan boshqa hech kim kirmasin. Faqat ular kira oladilar, chunki ular muqaddasdirlar. Qolgan odamlar Egamizning ko‘rsatmalariga rioya qilib, tashqarida qolsinlar.

⁷Levilar qo‘lida quroli bilan shohni har tomondan o‘rab olsin, Egamizning uyiga kirgan har kim o‘ldirilsin. Shoh kirganda ham, chiqqanda ham, unga hamroh bo‘linglar.”

⁸Levilar va butun Yahudo xalqi ruhoniy Yohayidoning amrlarini so‘zsiz bajardilar. Har bir yuzboshi Shabbat kuni xizmatini boshlagan va xizmatini tugatgan qo‘riqchilarini olib qoldi, chunki o‘sha kuni Yohayido qo‘riqchilarining birorta bo‘linmasiga ketishga ijozat bermagan edi.

⁹Ruhoniy Yohayido Xudoning uyida turgan shoh Dovudning nayzalarini hamda katta va kichik qalqonlarini yuzboshilarga tarqatdi.

¹⁰Shohni qo‘riqlash uchun uyning janub tomonidan shimol tomonigacha, qurbongohning va uyning atrofiga odamlarni jangga shay qilib joylashtirdi.

¹¹Yohayido shohning o‘g‘li Yo‘shni tashqariga olib chiqib, boshiga toj kiygizdi. Unga shohlik qonunlarini berdi. Yo‘sh shoh deb e’lon qilindi. Yohayido va uning o‘g‘illari Yo‘shning boshiga moy surtishdi, so‘ngra: “Shohimizning umrlari uzoq bo‘lsin!” deya hayqirishdi.

¹²Otaliyo yugurayotgan va shohni olqishlayotgan xalqning shovqin–suronini eshitgach, Egamizning uyiga yig‘ilganlar yoniga bordi.

¹³Qarasaki, Egamizning uyi eshigi yonidagi ustun oldida shoh turibdi, shohning atrofini lashkarboshilar, karnaychilar o‘rab olgan. Yurtning butun xalqi shod–xurram, karnay chalyapti, qo‘shiqchilar musiqa asboblari jo‘rligida bayram o‘tkazyapti. Shunda Otaliyo g‘azabdan liboslarini yirtib: “Xoinlik! Xoinlik!” deb baqirdi.

¹⁴Ruhoniy Yohayido yuzboshilarni chaqirib: “U xotinni bu yerdan olib chiqib ketinglar, kimki unga ergashsa, qilichdan o‘tkazinglar”, deya buyruq berdi. Ruhoniy o‘sha ayolning Egamiz uyida o‘ldirilishini istamadi.

¹⁵Otaliyo ushlandi va saroyning Ot darvozasiga keltirilib, o‘sha yerda o‘ldirildi.

¹⁶Ruhoniy Yohayido, Yahudo xalqi Egamizning xalqi bo‘lsin, deya o‘zi bilan xalq va shoh orasida ahd tuzdi.

¹⁷So‘ng butun xalq Baalning uyiga borib, uni buzib tashladi, u yerdagi qurbongohlarni va Baalning tasvirlarini sindirdi, Baalning ruhoniysi Mattonni esa qurbongohlarning ro‘parasida o‘ldirdi.

¹⁸Yohayido Dovud bergan ko‘rsatmalarga rioya qilgan holda Egamiz uyining nazoratini levi ruhoniylariga topshirdi. Ularga Musoning qonunida yozilganiday Egamizga kuydiriladigan qurbonliklar keltirishni va Dovud amr etganday shod–xurramlik bilan qo‘shiq aytishni buyurdi.

¹⁹Hech kim Egamizning uyiga harom bo‘lib kirmasin deb, darvozaga soqchilarni joylashtirdi.

²⁰So‘ngra yuzboshilarni, aslzodalarni, xalq yo‘lboshchilarini va jamiki xalqni yoniga olib, shohni Egamizning uyidan olib chiqdi. Ular Yuqori darvozadan o‘tib, shohni saroyga olib keldilar va taxtga o‘tqazdilar

²¹Otaliyo o‘ldirilgani uchun, yurt xalqi sevindi. Quddus osoyishta bo‘lib qoldi.