Read O‘zbek tilidagi Muqaddas Kitob, 2013 2 Solnomalar 28 Bible Online

2 Solnomalar 28 - O‘zbek tilidagi Muqaddas Kitob, 2013 bible

2 Solnomalar 28

¹Oxoz yigirma yoshida shoh bo‘lib, Quddusda o‘n olti yil hukmdorlik qildi. U bobosi Dovuddan namuna olmadi, Egamizning oldida to‘g‘ri ishlar qilmay,

²Isroil shohlarining yo‘lidan ketdi. U hatto Baalga sajda qilish uchun Baalning quyma tasvirlarini yasadi.

³Xinnum soyligida butlarga atab qurbonliklar kuydirdi. Kan’on yurtidan Egamiz quvgan qavmlarning jirkanch odatlariga taqlid qilib, hatto o‘z o‘g‘illarini olovda kuydirib qurbonlik qildi.

⁴Sajdagohlarda, do‘ngliklarda va har qanday yashil daraxt ostida qurbonliklar keltirib, tutatqi tutatardi.

⁵Shoh Oxoz gunoh qilgani uchun Egasi Xudo uni Oram shohining qo‘liga berdi. Oram shohi Oxozni mag‘lub qilib, xalqidan juda ko‘pchiligini asir qilib Damashqqa olib ketdi. Bundan tashqari, Egamiz shoh Oxozni Isroil shohi qo‘liga berdi. Isroil shohi Oxoz boshiga katta qirg‘in solib, uni mag‘lub qildi.

⁶Bir kunning o‘zida Isroil shohi — Ramaliyo o‘g‘li Pekax Yahudo lashkarining 120.000 bahodir jangchisini o‘ldirdi. Bunga sabab Yahudo xalqi ota–bobolarining Xudosi — Egamizni tark etgani bo‘ldi.

⁷Isroil xalqidan bo‘lgan bahodir jangchi Zixri shohning o‘g‘li Masiyoni, saroy boshqaruvchisi Ozrikomni va shohning o‘ng qo‘l vaziri Elqanani o‘ldirdi.

⁸Yahudo xalqi ularga qarindosh bo‘lishiga qaramay, Isroil lashkari ulardan 200.000 ayol va o‘g‘il–qizlarini asir qilib, katta o‘lja bilan birga Samariyaga olib ketishdi.

⁹Egamizning Odod degan payg‘ambari Samariyada edi. U qaytib kelgan Isroil lashkarini qarshilab chiqib, ularga shunday dedi: “Ota–bobolaringizning Xudosi — Egamiz xalqi Yahudodan g‘azablangani uchun ularni sizning qo‘lingizga topshirdi. Sizlar esa ularni shunchalik qahr ustida qirdingizki, ularning sadosi samolarga yetdi.

¹⁰Shunisi yetmaganday, sizlar Yahudo va Quddus xalqining erkagu ayolini o‘zingizga qul qilmoqchi bo‘ldingiz. O‘zingizga bir qarang, Egangiz Xudo oldida qilgan qilmishlaringizning hammasi turgan bitgani gunoh.

¹¹Endi gapimni eshiting! Asir qilgan bu qarindoshlaringizni orqaga qaytarib yuboring. Aks holda Egamiz o‘z g‘azabini sizning ustingizga sochadi.”

¹²Isroil xalqining ba’zi yo‘lboshchilari ham, chunonchi Yo‘xanon o‘g‘li Ozariyo, Mashillamo‘t o‘g‘li Barxiyo, Shallum o‘g‘li Yoxizqiyo va Hadlay o‘g‘li Emosa, urushdan qaytib kelganlarga o‘z noroziligini bildirib,

¹³dedilar: “Asirlarni bu yerga olib kelmanglar! Biz Egamizga qarshi gunoh qilib, Uning qahrini chiqarib bo‘ldik. Sizlar esa shusiz ham ortib yotgan gunohimiz ustiga yana gunoh orttirmoqchisizlar.”

¹⁴Shunda sipohlar Isroil a’yonlari va butun jamoa oldida asirlarni ozod qilib, o‘ljalarni topshirdilar.

¹⁵Yuqorida nomlari aytilgan to‘rtta yo‘lboshchi asirlarning orasidagi yalang‘och bo‘lganlarning hammasiga o‘lja olingan narsalardan ust–bosh, oyoq kiyim berdilar, yedirdilar, ichirdilar, yaralariga moy surtdilar. Keyin zaiflarini eshaklarga mindirib, asirlarning hammasini Yahudoga qarashli palma shahri — Erixoga olib bordilar. So‘ng Samariyaga qaytib keldilar.

¹⁶O‘sha paytda shoh Oxoz Ossuriya shohidan yordam so‘rab, huzuriga odam jo‘natdi,

¹⁷chunki Edomliklar yana Yahudo yurtiga hujum qilib, ko‘p asirlarni olib ketgan edilar.

¹⁸Shu orada Filistlar ham Yahudo qir etaklaridagi hamda Nagav cho‘lidagi shaharlarga hujum qilib, Bayt–Shamash, Oyjavlon va Gadero‘t shaharlarini qo‘lga kiritdilar, shuningdek, So‘xo‘, Timnax va Gimzo shaharlarini va bu shaharlar atrofidagi qishloqlarni qo‘lga olib, o‘sha joylarga o‘rnashib oldilar.

¹⁹Shoh Oxoz Yahudo xalqini gunoh qilishga undab, Egamizga haddan tashqari ko‘p xiyonat qilgani uchun, Yahudo xalqini Egamiz shu qadar tahqirlagan edi.

²⁰Ossuriya shohi Tilgatpilasar kelib, Oxozga yordam berish o‘rniga zulmni kuchaytirdi.

²¹Oxoz Egamizning uyidan, shoh saroyidan va a’yonlarning uyidan qimmatbaho narsalarni olib, Ossuriya shohiga o‘lpon qilib berdi. Biroq bu ham yordam bermadi.

²²Hayotining eng qiyin damlarida ham o‘sha shoh Oxoz Egamizga battar xiyonat qildi.

²³Uni mag‘lub qilgan Oram xalqining xudolariga qurbonliklar keltirdi. U ichida shunday derdi: “Oram shohlarining xudolari ularga yordam berdi, agar men Oram xudolariga qurbonlik keltirsam, ular menga ham yordam berishadi.” Vaholanki, bu xudolar shoh Oxozning va uning qo‘li ostidagi butun xalqning halokatiga sabab bo‘ldi.

²⁴Oxoz Xudoning uyidagi hamma ashyolarni yig‘ishtirib olib, parchaladi. Xudoning uyi eshiklarini berkitib, Quddusning har burchagida qurbongohlar qurdirdi.

²⁵Yahudoning hamma shaharlarida begona xudolarga qurbonliklar kuydirish uchun sajdagohlar barpo qilib, ota–bobolarining Xudosi — Egamizni g‘azablantirdi.

²⁶Oxozning boshqa ishlari va tutgan yo‘llari boshidan oxirigacha “Yahudo va Isroil shohlari tarixi” kitobida yozilgan.

²⁷Oxoz olamdan o‘tib, Quddusda dafn qilindi. Lekin uni Isroil shohlari xilxonasiga ko‘mmadilar. Uning o‘rniga o‘g‘li Hizqiyo shoh bo‘ldi.