Read O‘zbek tilidagi Muqaddas Kitob, 2013 2 Solnomalar 29 Bible Online

2 Solnomalar 29 - O‘zbek tilidagi Muqaddas Kitob, 2013 bible

2 Solnomalar 29

¹Hizqiyo yigirma besh yoshida shoh bo‘ldi. U Quddusda yigirma to‘qqiz yil shohlik qildi. Onasining ismi Abiyo bo‘lib, Zakariyoning qizi edi.

²Hizqiyo, bobosi Dovud kabi, Egamiz oldida to‘g‘ri ishlar qildi.

³Hukmronligining birinchi yilida Hizqiyo Egamiz uyining eshiklarini qayta ochdi, ularni tuzattirdi.

⁴So‘ng ruhoniylarni va levilarni chaqirtirib, ularni Ma’badning sharqiy hovlisiga to‘pladi.

⁵Hizqiyo ularga dedi: “Gapimni eshitinglar, ey levilar! O‘zlaringizni poklanglar, ota–bobolaringiz Xudosi — Egamizning uyini ham poklanglar! Bu muqaddas joydan harom narsalarni chiqarib tashlanglar!

⁶Bizning ota–bobolarimiz bevafo edilar. Ular Egamiz Xudo oldida yomon ishlar qilib, Uni tark etdilar. Egamizning makonidan yuzlarini o‘girib, Unga orqalarini burdilar.

⁷Ma’bad eshiklarini yopib tashladilar, chiroqlarni o‘chirib qo‘ydilar. Isroil xalqining Xudosiga atab, muqaddas maskanda tutatqi tutatilmaydigan, qurbonliklar kuydirilmaydigan bo‘ldi.

⁸Shuning uchun Yahudo va Quddusga Egamiz O‘z qahrini sochdi. Ularning ahvoli hammaning yoqasini ushlatib, dahshatu vahimaga soldi. Siz o‘zingiz ham bundan xabardorsiz.

⁹Shuning uchun otalarimiz jangda halok bo‘ldi, xotinu o‘g‘il–qizlarimiz asirlikka olib ketildi.

¹⁰Egamiz bizdan O‘z qahrini qaytarsin deb, men Isroil xalqining Xudosi — Egamiz bilan ahd qilishga qaror etdim.

¹¹O‘g‘illarim! Endi e’tiborsiz bo‘lmanglar, chunki Egamiz sizlarni Uning huzurida xizmat qilishingiz uchun va qurbonliklar kuydirishingiz uchun tanlab olgan.”

¹²Levilardan quyidagilar shu yerda edilar: Qohot naslidan — Emosay o‘g‘li Maxat, Ozariyo o‘g‘li Yo‘el, Marori naslidan — Abdi o‘g‘li Kish va Yoxalil o‘g‘li Ozariyo, Gershon naslidan — Zimmo o‘g‘li Yo‘x, Yo‘x o‘g‘li Eden,

¹³Elizofon naslidan — Shimri, Yoval, Osif naslidan — Zakariyo, Mattaniyo,

¹⁴Xaman naslidan — Yoxiyol, Shimax, Yodutun naslidan — Shamayo va Uziyol.

¹⁵Bu levilar qolgan levi birodarlarini to‘plab, hammasi poklandilar. So‘ng shohning farmoni bo‘yicha, Egamizning qonun–qoidalariga rioya qilgan holda Egamizning uyini poklay boshladilar.

¹⁶Ruhoniylar Egamiz uyining ichki xonasini poklash uchun u yerga kirib, Ma’baddagi hamma harom–xarish narsalarni Egamiz uyining hovlisiga olib chiqdilar. Levilar esa bu narsalarni shahar tashqarisiga, Qidron soyligiga olib borib tashladilar.

¹⁷Ruhoniylar bilan levilar ishini birinchi oyning birinchi kuni boshlagan edilar. Sakkiz kun davomida ular Egamiz uyining hovlilarini pokladilar. Keyingi sakkiz kun davomida uyning o‘zini pokladilar. Birinchi oyning o‘n oltinchi kuniga kelib hamma ishlarini tugatdilar.

¹⁸So‘ngra shoh Hizqiyo huzuriga borib, shunday dedilar: “Biz Egamizning butun uyini, qurbonlik kuydiriladigan qurbongohni va qurbongohning hamma ashyolarini, muqaddas nonlar qo‘yiladigan xontaxtani va xontaxtaning hamma ashyolarini pokladik.

¹⁹Shoh Oxoz bevafoligi dastidan chiqarib tashlagan hamma ashyolarni biz tayyorlab, pokladik. Mana, ularning hammasi Egamizning qurbongohi oldida turibdi.”

²⁰Shoh Hizqiyo ertasi kuni saharda shahar a’yonlarini to‘plab, hammalarini Egamizning uyiga boshlab bordi.

²¹Ular shoh xonadonining va Yahudo xalqining gunohini yuvish uchun hamda Ma’badni poklash uchun gunoh qurbonligi qilib yettita buqa, yettita qo‘chqor, yettita qo‘zi va yettita takani olib keldilar. Horun naslidan bo‘lgan ruhoniylarga shoh: “Bularni Egamizning qurbongohida nazr qilinglar!” deb buyurdi.

²²Ruhoniylar buqalarni so‘yib, qonni qurbongohga sepdilar. Keyin qo‘chqorlarni so‘yib, qonini qurbongohga sepdilar. Qo‘zilarni ham so‘yib, qonini qurbongohga sepdilar.

²³So‘ngra gunoh qurbonligi qilinadigan takalarni shoh va jamoa oldiga olib keldilar. Ular qo‘llarini takalar ustiga qo‘ydilar.

²⁴Ruhoniylar takalarni so‘ydilar, butun xalqni gunohlaridan poklash uchun qonni qurbongohga sepdilar. Negaki, shoh “Kuydiriladigan qurbonliklar va gunoh qurbonliklari jamiki Isroil uchun qilinsin”, deb farmon bergan edi.

²⁵Hizqiyo shoh Dovudning ko‘rsatmalariga rioya qilib, levilarni Egamizning uyiga joylashtirdi, ularga zang, arfa va liralarni berdi. Bu ko‘rsatmalarni Dovudga Egamiz o‘z payg‘ambarlari Gad va Natan orqali bergan edi. Gad shoh Dovudning xizmatidagi valiy edi.

²⁶Levilar Dovudning cholg‘u asboblari bilan, ruhoniylar karnaylari bilan o‘z joylarini egalladilar.

²⁷Shundan keyin Hizqiyo: “Qurbongohda qurbonliklar kuydirilsin!” deb buyurdi. Qurbonliklar kuydirila boshlangan zahoti qo‘shiqchilar Dovudning cholg‘u asboblari va karnaylar jo‘rligida Egamizga hamdu sanolar aytishni boshladilar.

²⁸Qurbonliklar kuydirilib bo‘lguncha, butun jamoa sajda qilib, qo‘shiqchilar qo‘shiq aytib, karnaychilar karnay chalib turdilar.

²⁹Qurbonlik tugagach, shoh Hizqiyo va butun xalq tiz cho‘kib, Xudoga sajda qildi.

³⁰Shoh Hizqiyo bilan a’yonlar levilarga: “Dovud va valiy Osif yozgan sanolarni aytib, Egamizni madh qilinglar!” deb buyurdilar. Levilar sevinch ila sano kuylab, tiz cho‘kib sajda qildilar.

³¹Keyin Hizqiyo xalqqa dedi: “Mana, sizlar o‘zingizni Egamizga bag‘ishladingizlar. Endi atagan qurbonligu shukrona nazrlaringizni Egamizning uyiga olib kelinglar.” Jamoa qurbonliklar va shukrona nazrlarini keltirdilar. Ba’zilari esa ko‘ngildan chiqarib kuydiriladigan qurbonlik uchun hayvonlarni ham olib keldilar.

³²Kuydiriladigan qurbonlik uchun 70 buqa, 100 qo‘chqor va 200 qo‘zi keltirildi.

³³Bulardan tashqari, jamoa 600 buqa va 3.000 qo‘yni qurbonlik qilish uchun olib keldi.

³⁴Ammo ruhoniylar ozchilik bo‘lganlari uchun kuydiriladigan hayvonlarning terisini shilishga ulgura olmayotgan edilar. Shu sababdan qarindoshlari levilar to ish tugaguncha va boshqa ruhoniylar o‘zlarini poklaguncha ularga qarashib turdilar. Levilar ruhoniylarga qaraganda o‘zlarini poklash masalasiga jiddiyroq yondashgan edilar.

³⁵Kuydiriladigan qurbonliklarning miqdori nihoyatda ko‘p edi, bulardan tashqari, tinchlik qurbonliklarining yog‘lari va kuydiriladigan qurbonliklar bilan birga keltiriladigan sharob nazri ham g‘oyatda mo‘l edi. Shu yo‘sin, Egamiz uyidagi xizmat qayta tiklandi.

³⁶Egamizning O‘z xalqiga qilgan bu ishidan Hizqiyo va butun jamoa sevindi. Bularning hammasi qisqa vaqtda sodir bo‘lgan edi.