Read O‘zbek tilidagi Muqaddas Kitob, 2013 2 Solnomalar 36 Bible Online

2 Solnomalar 36 - O‘zbek tilidagi Muqaddas Kitob, 2013 bible

2 Solnomalar 36

¹Yahudo xalqi Yo‘shiyoning o‘g‘li Yohuxozni otasining o‘rniga shoh qilib ko‘tardi.

²Yohuxoz yigirma uch yoshida taxtga o‘tirib, Quddusda uch oy shohlik qildi.

³So‘ngra Misr shohi Nexo uni Quddus taxtidan tushirib, yurt xalqidan 200 pud kumush va 2 pud oltin o‘lpon talab qildi.

⁴Misr shohi Yohuxozning ukasi Eliyaqimni Yahudo va Quddusga shoh qilib tayinladi. Uning ismini o‘zgartirib Yohayiqim qo‘ydi. Akasi Yohuxozni esa Misrga olib ketdi.

⁵Yohayiqim yigirma besh yoshida shoh bo‘lib, Quddusda o‘n bir yil hukmdorlik qildi. U Egasi Xudoning oldida qabih ishlar qildi.

⁶Bobil shohi Navuxadnazar Yahudoga hujum qildi. U Yohayiqimni zanjirband qilib Bobilga olib ketdi.

⁷Egamizning uyidagi bir qancha idishlarni ham Bobilga olib ketib, ularni Bobildagi saroyiga qo‘ydi.

⁸Yohayiqimning boshqa ishlari, uning qilgan jirkanch qilmishlari, hamma kamchiliklari “Isroil va Yahudo shohlari tarixi” kitobida yozilgan. Uning o‘rniga o‘g‘li Yohayixin shoh bo‘ldi.

⁹Yohayixin sakkiz yoshida shoh bo‘lib, Quddusda uch oyu o‘n kun hukmdorlik qildi. U Egamizning oldida qabih ishlar qildi.

¹⁰O‘sha yili bahorda shoh Navuxadnazar Yohayixinni hibsga olib, Bobilga olib ketdi. U bilan birga Egamizning uyidagi qimmatbaho idishlarni ham olib ketdi. Yohayixinning o‘rniga ukasi Zidqiyoni Yahudo va Quddus ustidan shoh qilib tayinladi.

¹¹Zidqiyo yigirma bir yoshida shoh bo‘lib, Quddusda o‘n bir yil hukmdorlik qildi.

¹²U Egasi Xudoning oldida qabih ishlar qildi. Egamizning so‘zlarini ayon qilgan payg‘ambar Yeremiyoga bo‘yin egmadi.

¹³Shoh Navuxadnazar Zidqiyoga Xudoning nomi bilan sadoqat ontini ichdirgan bo‘lsa ham, Zidqiyo Navuxadnazarga qarshi isyon ko‘tardi. U qaysarlik qilib, Isroil xalqining Xudosi — Egamizga tavba qilishdan bosh tortdi.

¹⁴Bosh ruhoniylarning hammasi omma qatorida o‘zga xalqlarning jirkanch odatlariga taqlid qilib, Xudoga o‘ta bevafo bo‘ldilar. Shu yo‘sin, ular Egamizning O‘zi muqaddas qilgan Quddusdagi uyni bulg‘adilar.

¹⁵Ota–bobolarining Xudosi — Egamiz O‘z xalqi va maskaniga rahm qilib, ularning oldiga qayta–qayta payg‘ambarlarini jo‘natdi.

¹⁶Lekin ular Xudoning elchilarini haqorat qilib, Xudoning so‘zlaridan nafratlandilar, payg‘ambarlarni masxara qildilar. Oxiri Egamiz O‘z xalqidan shu qadar g‘azablandiki, ular najotsiz qoldilar.

¹⁷Egamiz ularga qarshi Bobil shohini tortib keldi. Bobil shohi Ma’badda ularning yoshlarini qilichdan o‘tkazdi, na yosh erkakka, na ayolga, na keksaga, na xastaga shafqat qildi. Xudo Yahudo xalqining hammasini Bobil shohining qo‘liga bergan edi.

¹⁸Bobil shohi Xudoning uyidagi kattayu kichik buyumlarni, jamiki xazinani, shoh va uning a’yonlari xazinalarini, xullas, hamma narsani Bobilga olib ketdi.

¹⁹Xudoning uyiga esa o‘t quydi, Quddus devorini buzib tashladi, hamma hashamatli binolarni yondirdi, Quddusdagi hamma qimmatbaho ashyolarni yo‘q qilib tashladi.

²⁰Qilichdan omon qolganlarini esa Bobilga surgun qildi. Fors shohligi qaror topgunga qadar Yahudo xalqi Bobil shohiga va uning avlodlariga qul bo‘lib qoldi.

²¹Yurt bo‘m–bo‘sh cho‘lga aylandi. Yerga dam berilmagan yillarning soni to‘lgunicha, yetmish yil davomida tashlandiq bo‘lib yotdi. Shunday qilib, Egamizning Yeremiyo payg‘ambar orqali aytgan so‘zlari amalga oshdi.

²²Fors shohi Kurush hukmronligining birinchi yilida Egamizning Yeremiyo orqali bildirgan so‘zlari bajo bo‘lishi uchun, Egamiz shoh Kurushning ruhini qo‘zg‘atdi. Shunday qilib, Kurush o‘z shohligining hamma tomoniga xabarchilar jo‘natdi va yozma farmonda quyidagilarni e’lon qildi:

²³“Fors shohi Kurush shunday demoqda: — Samoviy Xudo — Egamiz yer yuzidagi jamiki shohliklarni menga bergan. U Yahudo yurtidagi Quddusda O‘ziga bir uy qurishni menga topshirdi. Xudoning xalqidan bo‘lgan har bir kimsa Quddusga borsin, Egasi Xudo unga yor bo‘lsin.”