Read O‘zbek tilidagi Muqaddas Kitob, 2013 Ezra 8 Bible Online

Ezra 8 - O‘zbek tilidagi Muqaddas Kitob, 2013 bible

Ezra 8

¹Shoh Artaxshas hukmronligi davrida men bilan birga Bobildan ketgan urug‘boshilar va ular bilan birga ro‘yxatga olinganlar quyidagilardir:

²[2-3] Finxaz urug‘idan — Gershom. Itamar urug‘idan — Doniyor. Dovud urug‘idan — Shaxaniyo naslidan bo‘lgan Xattush. Paro‘sh urug‘idan — Zakariyo va u bilan birga ro‘yxatga olingan 150 ta erkak.

⁴Paxatmo‘ab urug‘idan — Zaraxiyo o‘g‘li Elixo‘nay va u bilan birga 200 ta erkak.

⁵Zattu urug‘idan — Yaxaziyol o‘g‘li Shaxaniyo va u bilan birga 300 ta erkak.

⁶Adin urug‘idan — Yo‘natan o‘g‘li Evid va u bilan birga 50 ta erkak.

⁷Elam urug‘idan — Otaliyo o‘g‘li Yeshayo va u bilan birga 70 ta erkak.

⁸Shafatiyo naslidan — Mikoyil o‘g‘li Zabadiyo va u bilan birga 80 ta erkak.

⁹Yo‘ab naslidan — Yoxiyol o‘g‘li Obodiyo va u bilan birga 218 ta erkak.

¹⁰Banix urug‘idan — Yo‘sifiyo o‘g‘li Shalumit va u bilan birga 160 ta erkak.

¹¹Bo‘vay urug‘idan — Bo‘vay o‘g‘li Zakariyo va u bilan birga 28 ta erkak.

¹²Ozgad urug‘idan — Xakkatan o‘g‘li Yo‘xanon va u bilan birga 110 ta erkak.

¹³Odonixam urug‘idan — Elifalet, Yaviyol, Shamayo va ular bilan birga 60 ta erkak. Elifalet, Yaviyol va Shamayo qarindoshlari orasidan eng oxirgi bo‘lib qaytib keldilar.

¹⁴Big‘vay urug‘idan — Utay, Zakkur va ular bilan birga 70 ta erkak.

¹⁵Men ularni Ohabo shahriga oqib boradigan daryo bo‘yida to‘pladim. O‘sha joyda biz uch kun turdik. Men to‘planganlarni sinchiklab ko‘rib chiqdim, ularning orasida ruhoniylarni topdim, lekin levilar yo‘q edi.

¹⁶Keyin yo‘lboshchilar Eliazarni, Oriyolni, Shamayoni, Elnatanni, Yorivni, Elnatanni, Natanni, Zakariyoni, Mashullomni hamda Tavrot ustozlari Yo‘xariv va Elnatanni chaqirtirdim.

¹⁷Ularni Kosifiyodagi levilarning yo‘lboshchisi Iddoning huzuriga jo‘natayotib, ularga shunday deb tayinladim: “Iddoning huzuriga borgach, unga, uning sheriklariga, Kosifiyodagi Ma’bad xizmatkorlariga aytinglar, Xudoning uyi uchun levilarni yuborishsin.”

¹⁸Xudoyimizning marhamati bizga yor bo‘lgani uchun, ular Sharaviyo degan layoqatli bir odamni, o‘g‘illari va qarindoshlari bilan birga yubordilar. Sharaviyo Yoqub o‘g‘li Levi naslining Maxli urug‘idan edi. Kelganlar jami 18 ta erkak edilar.

¹⁹Shuningdek, Marori urug‘idan Xashaviyo va Yeshayo o‘g‘illari va qarindoshlari bilan birga yuborilgan edi. Ular jami 20 ta erkak edilar.

²⁰Bulardan tashqari, 220 ta Ma’bad xizmatkori ham yuborildi. Bu xizmatkorlarning ajdodlarini shoh Dovud va uning a’yonlari levilarga yordam berish uchun tayinlagan edilar. Ularning hammasi nomma–nom qayd etilgan.

²¹Xudodan: “Bizni, bolalarimizni va butun mol–mulkimizni safarda saqlagin”, deb so‘rab, toat–ibodat qilishimiz uchun men Oxabo daryosi bo‘yida ro‘zani e’lon qildim.

²²Shohdan: “Bizni yo‘lda dushmandan himoya qilish uchun bir guruh sipoh va otliq sipoh bering”, deb so‘rashga xijolat bo‘lardim. Chunki biz shohga: “Xudoyimiz Unga yuz burganlarning hammasiga marhamat qiladi, lekin Undan yuz o‘girganlarga g‘azabini sochadi”, deb aytgan edik.

²³Shunday qilib, biz ro‘za tutdik va Xudoyimizga, bizni saqlagin, deb iltijo qildik. Xudoyimiz bizning iltijolarimizni eshitdi.

²⁴So‘ngra bosh ruhoniylarning orasidan o‘n ikkita ruhoniyni — Sharaviyoni, Xashaviyoni va ularning qarindoshlaridan o‘ntasini tanlab oldim.

²⁵Xudoyimizning uyi uchun nazr qilingan kumush, oltin va buyumlarni ularning huzurida tarozida tortdim. Shoh, uning maslahatchilari, a’yonlari, Bobil viloyatidagi butun Isroil xalqi nazr qilgan bu hadyalarni ularga topshirdim.

²⁶Men ularga topshirgan nazrlarning miqdori quyidagicha edi: 1400 pud kumush, 210 pud kumush buyum, 210 pud oltin,

²⁷yarim pud chiqadigan 20 ta oltin kosa, qiymati oltinga teng bo‘lgan, sayqallangan a’lo sifatli 2 ta bronza buyum.

²⁸Men ularga shunday dedim: “Sizlar Egamizga bag‘ishlangansizlar, buyumlar ham Egamizga bag‘ishlangan. Odamlar bu kumush va oltinlarni ota–bobolaringizning Xudosi — Egamizga ko‘ngildan chiqarib nazr qildilar.

²⁹Sizlar bu nazrlarni Quddusga olib borgunlaringizgacha ehtiyot qilib saqlanglar. So‘ng bularni Egamizning uyi omborida bosh ruhoniylar, levilar va urug‘boshilar huzurida tarozida tortinglar.”

³⁰Shunday qilib, ruhoniylar va levilar tarozida tortilgan bu kumush, oltin va buyumlarni Xudoyimizning Quddusdagi uyiga olib borish uchun qabul qilib oldilar.

³¹Birinchi oyning o‘n ikkinchi kuni biz Ohabo daryosi bo‘yidan Quddus tomon yo‘lga tushdik. Xudoyimiz bizga yor edi. Yo‘lda ketayotganimizda, U bizni dushman hujumidan va qaroqchilardan himoya qildi.

³²Biz Quddusga yetib kelib, u yerda uch kun turdik.

³³To‘rtinchi kuni esa kumush, oltin va buyumlarni Xudoyimizning uyida tarozida tortib, Uriyo o‘g‘li ruhoniy Miromo‘tga topshirdik. Uning yonida Finxaz o‘g‘li ruhoniy Elazar, shuningdek, levilardan Yeshuva o‘g‘li Yo‘zabad va Binnuy o‘g‘li Novadiyo bor edilar.

³⁴O‘sha kuni biz hamma narsani tarozida tortib, hisoblab chiqdik, har bir narsaning vaznini yozib qo‘ydik.

³⁵Shundan so‘ng asirlikdan qaytib kelganlar Isroil xalqining Xudosiga qurbonliklar keltirdilar. Ular butun Isroil xalqi uchun 12 ta buqani, 96 ta qo‘chqorni, 77 ta qo‘zini Egamizga qurbonlik qilib kuydirdilar. Bulardan tashqari, xalqni gunohlaridan poklash uchun 12 ta takani qurbonlik qildilar.

³⁶So‘ng shohning farmonini Furot daryosining g‘arbidagi viloyat noiblariga va hokimlariga olib bordilar. Noiblar bilan hokimlar xalqqa va Xudoning uyiga yordam ko‘rsatdilar.