Read O‘zbek tilidagi Muqaddas Kitob, 2013 Ester 6 Bible Online

Ester 6 - O‘zbek tilidagi Muqaddas Kitob, 2013 bible

Ester 6

¹Shu kecha shohning uyqusi qochdi. Shoh: — “Kundalik xotiralar kitobi”ni olib kelinglar! — deb buyurdi. Kitobni unga o‘qib berishdi.

²Xotira kitobidagi shoh Axashverashning [1] darvozabonlari Bixtan va Tarash shohning joniga qasd qilishni rejalashtirganlari, buni Mordaxay bilib qolib shohga yetkazgani to‘g‘risida yozilgan voqeaga yetib kelishdi.

³Shunda shoh: — Bu xizmati uchun Mordaxay nima bilan taqdirlangan? Unga hurmat ko‘rsatilganmi? — deb so‘radi. — U hech narsa bilan taqdirlanmagan, — deb javob berishdi shohning a’yonlari.

⁴— Hovlida kim bor? — so‘radi shoh. Shu paytda Xomon shoh saroyining tashqi hovlisiga kelgan va Mordaxay uchun tayyorlatib qo‘ygan dorga uni ostirish to‘g‘risida [2] shoh bilan maslahatlashmoqchi bo‘lib turgan edi.

⁵Shohning a’yonlari: — Hovlida Xomon turibdi, — deb javob berishdi. — Bu yoqqa kirsin! — deb buyurdi shoh.

⁶Xomon kirgach, shoh undan so‘radi: — Shoh taqdirlamoqchi bo‘lgan odamga qanday hurmat ko‘rsatsa bo‘ladi? Xomon o‘z ko‘nglida: “Shoh mendan boshqa kimga ham izzat–hurmat ko‘rsatishni istardi”, deb o‘yladi

⁷va shohga aytdi: — Shohimiz hurmat ko‘rsatib, taqdirlamoqchi bo‘lgan odam uchun

⁸o‘zlari kiygan shohona liboslarni, shohimiz mingan, usti shohona zeb–ziynatlar [3] bilan bezatilgan otni olib kelishsin.

⁹Shohning eng yaqin beklaridan biri qo‘liga liboslarni va otni berishsin. Shoh hurmat ko‘rsatib, taqdirlamoqchi bo‘lgan o‘sha odam kiyintirilgandan keyin, otga mindirilsin–da, shahar maydoniga olib chiqilsin. Uning oldida yurib “Shoh taqdirlamoqchi bo‘lgan odam mana shunday hurmatga sazovor bo‘ladi!” deb jar solinsin.

¹⁰Shoh Xomonga buyurdi: — Hoziroq, o‘zing aytganingday, liboslarni va otni olgin–da, saroy darvozasida turgan yahudiy Mordaxayga shunday qil. Aytganlaringdan birortasi ham qolib ketmasin.

¹¹Xomon liboslarni va otni olib, Mordaxayni kiyintirdi. So‘ng uni otga mindirib, shahar maydoniga olib chiqdi va uning oldida yurib: “Shoh taqdirlamoqchi bo‘lgan odam mana shunday hurmatga sazovor bo‘ladi!” deb jar soldi.

¹²Mordaxay saroy darvozasiga qaytib keldi. Xomon esa sharmanda bo‘lganidan yuzini berkitib jadal uyiga yo‘l oldi.

¹³Xomon xotini Zareshga va barcha do‘stlariga yuz bergan voqeani aytib berdi. Do‘stlari va xotini Zaresh shunday deyishdi: — Mordaxay tufayli sen pastga ketding. Agar u yahudiylardan bo‘lsa, unga bas kela olmaysan. Aksincha, martabang, shubhasiz, pastlashadi.

¹⁴Ular gaplashib turganlarida, shohning mulozimlari [4] kelib, Xomonni Ester tayyorlagan ziyofatga apil–tapil olib ketdilar.