Read O‘zbek tilidagi Muqaddas Kitob, 2013 Ester 7 Bible Online

Ester 7 - O‘zbek tilidagi Muqaddas Kitob, 2013 bible

Ester 7

¹Shoh va Xomon malika Ester bilan yeb–ichish uchun unikiga kelishdi.

²Ular ikkinchi kuni ham sharobxo‘rlik qilishayotganda, shoh Esterga yana aytdi: — Qanday istaging bor, malika Ester? Istaging qondiriladi. Qanday iltimosing bor, malikam? Yarim shohlikni so‘rasang ham, beriladi.

³Shundan keyin malika Ester gapirdi: — Shoh hazratlari! Agar o‘zlari mendan mamnun bo‘lsalar, agar shohim ma’qul ko‘rsalar, istagim shuki, jonimni saqlab qolsinlar, tilagim shuki, mening xalqim joniga rahm qilsinlar!

⁴Men va mening xalqim yer yuzidan yo‘q qilinish uchun, o‘ldirilish va qirilish uchun sotilganmiz [1]. Agar biz qul va cho‘ri qilib sotilganimizda edi, ovozimni chiqarmasdim. O‘sha dushmanning qilmishi uchun shohimizni bezovta qilish arzimas ish bo‘lardi [2].

⁵Shoh Axashverash [3] malika Esterdan: — Kim u? Qani o‘sha odam? Kim shunday qilishga jur’at etdi? — deya so‘radi.

⁶— Zararkunanda, g‘anim, yovuz Xomon! — dedi Ester. Shu zahoti Xomon shoh bilan malika qarshisida vahimaga tushdi.

⁷Shoh g‘azab bilan dasturxondan turdi–yu saroy bog‘iga qarab ketdi. Xomon esa malika Esterdan “Jonimni qutqargin”, deb yolvorish uchun qoldi, chunki shohdan o‘ziga nisbatan yovuz qismat tayin etilganini u ko‘rib turardi.

⁸Shoh bog‘dan saroyning ziyofat bo‘layotgan xonasiga qaytganda, Xomon Ester yonboshlab o‘tiradigan o‘rindiqqa mahkam yopishib yotgan edi. Shoh bu ahvolni ko‘rdiyu: — Oh–ho, men uyda ekanimda malikaning nomusiga tegmoqchi bo‘ldingmi? — deb baqirdi. Shoh gapini tugatar–tugatmas, Xomonning yuzini yopdilar [4].

⁹Shohning mulozimlaridan [5] biri Xarbona aytib qoldi: — Ha, aytganday, Xomon uyining oldiga ellik tirsakli [6] dor tayyorlab qo‘ygan. Bu dorga Mordaxayni osmoqchi. Mordaxay esa shohimizni ogohlantirib uning hayotini saqlab qolgan. — O‘sha dorga Xomonning o‘zini osinglar! [7] — deb farmon berdi shoh.

¹⁰Mordaxay uchun tayyorlab qo‘yilgan dorga Xomonning o‘zini osdilar [8]. Shundan so‘nggina shohning g‘azabi bosildi.