Read O‘zbek tilidagi Muqaddas Kitob, 2013 Ester 8 Bible Online

Ester 8 - O‘zbek tilidagi Muqaddas Kitob, 2013 bible

Ester 8

¹O‘sha kuni shoh Axashverash [1]yahudiylar dushmani Xomonning mol–mulkini malika Esterga in’om qildi. Mordaxay shoh huzuriga kirib chiqadigan bo‘ldi. Chunki malika Mordaxayning o‘ziga qarindosh ekanini aytgan edi.

²Shoh Xomondan qaytarib olgan muhr uzugini barmog‘idan chiqarib Mordaxayga berdi. Ester esa Mordaxayni Xomonning mol–mulki ustidan boshqaruvchi qilib tayinladi.

³Ester shoh bilan yana gaplashdi. Shohning oyog‘iga yiqilib “O‘gax [2] naslidan bo‘lgan Xomonning yahudiylarga qarshi o‘ylagan xusumatini va rejasini daf qiling”, deb yig‘lab yolvordi.

⁴Shoh saltanatning oltin hassasini Esterga tomon uzatgan edi, Ester o‘rnidan turib, shohning qarshisiga keldi

⁵va aytdi: — Agar shohimiz ma’qul ko‘rib, mendan mamnun bo‘lsalar, bu ishni o‘rinli deb bilsalar, o‘zlariga yoqqan bo‘lsam, O‘gax naslidan Xamadoto o‘g‘li Xomonning shohlik hududidagi hamma yahudiylarni qirib tashlash to‘g‘risida qasddan yozgan maktubini qaytarish uchun maktub yozilsin.

⁶Axir, xalqimning boshiga tushadigan kulfatni tomosha qilib chidab tura olamanmi?! Qabiladoshlarim o‘ldirilayotganda, guvoh bo‘lib tura olamanmi?!

⁷Shunda shoh Axashverash malika Esterga va yahudiy Mordaxayga aytdi: — Xomonning mol–mulkini Esterga berdim. Xomon esa yahudiylarni qirib tashlamoqchi bo‘lgani uchun, uni dorga ostirdim [3].

⁸Endi shoh nomidan yahudiylar to‘g‘risidagi maktubni o‘zlaringizga ma’qul keladigan tarzda yozib, shohning uzugi bilan muhrlanglar. Shoh nomidan yozilib, shohning uzugi bilan muhrlangan maktubni hech kim o‘zgartirishi mumkin emas.

⁹Shundan so‘ng uchinchi oyda — Shavon oyining [4] yigirma uchinchi kuni shohning mirzalari chaqirildi. Hindistondan Habashistongacha [5] bo‘lgan bir yuz yigirma yetti viloyatdagi yahudiylarga, noiblarga, hokimlarga, viloyatlarning beklariga xuddi Mordaxay buyurganiday maktub yozildi. Maktub har bir viloyat xalqining yozuvi va tilida, yahudiylarga ham o‘zlarining yozuvida va tilida yozildi.

¹⁰Mordaxay shoh Axashverash nomidan maktubni yozdirgach, shohning uzugi bilan muhrladi va shohning yilqisidagi uchqur otlarga choparlarni o‘tqazib jo‘natdi.

¹¹Shoh maktubda yahudiylarga hamma shaharlarda to‘planib, o‘zlarini himoya qilishlariga huquq berdi. Bundan tashqari, hujum qiladigan har qanday dushman xalqning yoki yurtning qurolli kuchlarini, bolalarini va ayollarini yo‘q qilishga, o‘ldirishga, mol–mulkini talon–taroj qilishga, qirishga ijozat berdi.

¹²Shoh Axashverashning qo‘l ostidagi hamma yurtlarda bir kun — o‘n ikkinchi oyning, ya’ni Adar oyining [6] o‘n uchinchi kuni [7] uchun ijozat berilgandi.

¹³Ushbu farmon matni har bir viloyatga, barcha xalqlarga qonun o‘rnida e’lon qilindi. Shunday qilib, yahudiylar o‘sha kuni o‘z dushmanlaridan qasos olishga tayyor turishlari kerak edi.

¹⁴Choparlar shohning uchqur otlariga mindilaru uning farmoniga ko‘ra, to‘rt tomonga yelib ketdilar. Shushandagi qal’ada ham farmon e’lon qilindi.

¹⁵Mordaxay ko‘k va oq rangli shohona liboslarga burkanib, katta oltin tojni kiyib, safsar rangli zig‘ir ridoga o‘ranib, shoh huzuridan chiqdi. Shushanda xursandchilik, shodu xurramlik hukm surardi.

¹⁶Bundan yahudiylarning qalbi umidga to‘ldi, shodu xurram, vaqti chog‘ bo‘ldi, ular uchun sharafli kunlar boshlangan edi.

¹⁷Hamma viloyatlarda, har bir shaharda, shohning amru farmoni yetib borgan har qanday joyda yahudiylar shodu xurram bo‘lib, o‘ynab–kuldilar, ziyofatlar uyushtirdilar, bayram qildilar. Shohlikdagi ko‘p xalqlar yahudiy bo‘ldi, chunki hammani yahudiylardan qo‘rquv tuyg‘usi qamrab olgan edi.