Read O‘zbek tilidagi Muqaddas Kitob, 2013 Chiqish 13 Bible Online

Chiqish 13 - O‘zbek tilidagi Muqaddas Kitob, 2013 bible

Chiqish 13

¹Egamiz Musoga yana gapirdi:

²— Hamma to‘ng‘ichlarni Menga bag‘ishlanglar. Isroil xalqining hamma to‘ng‘ich o‘g‘illari va hayvonlarining birinchi erkak bolasi Menikidir.

³Shundan so‘ng Muso xalqqa shunday dedi: “Sizlar qul bo‘lgan yurt Misrdan chiqqan bugungi kuningizni eslaringizdan chiqarmanglar. Egamiz qudrati bilan sizlarni u yerdan olib chiqdi. Shuning uchun sizlar xamirturush qo‘shilgan nonni yemanglar.

⁴Bugun Abib oyida [1] sizlar bu yurtdan chiqib ketyapsizlar.

⁵Egamiz sizlarni Kan’on, Xet, Amor, Xiv va Yobus xalqlarining yerlariga olib boradi. Egamiz bu yerlarni ota–bobolaringizga, beraman, deb ont ichgan. Egamiz sizlarni sut va asal oqib yotgan o‘sha yurtga [2] olib borgandan keyin, Abib oyida quyidagicha udumni o‘tkazinglar:

⁶yetti kun xamirturushsiz non yenglar. Yettinchi kuni Egamizga atab bayram qilinglar.

⁷Shu paytlarda uyingizda yoki yurtingizning biron joyida xamirturushli non yoki xamirturush bo‘lmasin.

⁸Har yili bayram kunlari davomida nima uchun bayramni nishonlayotganingizni bolalaringizga tushuntirishingiz lozim. Ularga: — Biz Misrdan chiqayotganimizda, Egamiz bizga qilganlari sababidan bu bayramni nishonlayapmiz, — deb ayting.

⁹Bu bayram qo‘lingizda bir alomat, peshanangizda bir xotiraga o‘xshagan bo‘ladi. Egamiz sizlarni Misrdan O‘z qudrati bilan olib chiqqanini bu bayram eslatib turadi. Egamizning ta’limotini bolalaringizga o‘rgatishingiz uchun bayramni nishonlanglar.

¹⁰Sizlar belgilangan vaqtda yillar osha ushbu qonun–qoidaga rioya qilib boringlar.

¹¹Egamiz o‘zlaringizga va ota–bobolaringizga ont ichib va’da bergan Kan’on xalqlarining yurtiga sizlarni olib keladi. O‘sha yurtni sizlarga beradi. Shundan keyin

¹²to‘ng‘ich o‘g‘illaringizni, hamma chorvangizning birinchi erkak bolasini Unga beringlar. Bularning hammasi Egamiznikidir.

¹³Birinchi tug‘ilgan erkak eshak [3] ham Egamizdan bir qo‘zi yoki uloqchani atash evaziga sotib olinadi. Agar eshakni qaytarib sotib olmaslikka qaror qilsangiz, eshakning bo‘ynini sindirib o‘ldirishingiz kerak. Sizlar Egamizdan hamma to‘ng‘ich o‘g‘illarni ham qaytarib sotib olishingiz lozim [4].

¹⁴Kelajakda farzandlaringiz sizdan: — Bu udumning ma’nosi nima? — deb so‘rashganda shunday javob beringlar: — Egamiz bizni Misrdagi qullikdan qudratli qo‘li bilan olib chiqqan.

¹⁵Fir’avn o‘jarlik qilib, ketishimiz uchun bizga ijozat bermaganda, Egamiz Misr yurtidagi hamma to‘ng‘ichlarni — odamlarning to‘ng‘ichidan tortib, hayvonlarning birinchi erkak bolasigacha o‘ldirgan. Mana shuning uchun ham hayvonlarning birinchi erkak bolasini Egamizga qurbonlik qilamiz. To‘ng‘ich o‘g‘illarimizni esa qaytarib sotib olamiz.

¹⁶Bu yillik bayram qo‘lingizdagi yoki peshanangizdagi bir belgiday bo‘lib qoladi. Egamiz bizni qudratli qo‘li bilan Misrdan olib chiqqanini shu bayram sizlarga eslatib turadi.”

¹⁷Fir’avn Isroil xalqiga ijozat bergandan keyin, Filist xalqining yurti orqali o‘tadigan yo‘l [5] Kan’onga to‘ppa–to‘g‘ri bo‘lsa ham, Xudo xalqni bu yerdan boshlab ketmadi. “Xalq urushga duch kelib qolsa, Misrga qaytib ketishga qaror qilib qolishi mumkin”, deb o‘yladi Xudo.

¹⁸Xudo xalqni Qizil dengizga [6] sahro bo‘ylab aylanma yo‘l orqali olib ketdi. Isroil xalqi Misrdan guruhlarga bo‘lingan holda chiqdi.

¹⁹Muso Yusufning suyaklarini o‘zi bilan oldi. Yusuf Isroil urug‘lariga qasam ichdirib: “Xudo sizlarning oldingizga kelganda, sizlar mening suyaklarimni bu yerdan olib ketinglar”, degan edi [7].

²⁰Isroil xalqi Suxo‘tdan chiqqandan keyin, sahro etagidagi Etxamda qarorgoh qurdi.

²¹Egamiz kunduzi ustun shaklidagi bulut ichida, kechasi ustun shaklidagi alanga ichida ularning oldida yurib, yo‘llarini yoritib yo‘l ko‘rsatib bordi. Shu tariqa U Isroil xalqini hamma vaqt — kunduzi ham, kechasi ham boshlab bora oldi.

²²Kunduzi bulut ustuni, kechasi alanga ustuni xalqning oldidan bir dam nari ketmadi.