Read O‘zbek tilidagi Muqaddas Kitob, 2013 Chiqish 15 Bible Online

Chiqish 15 - O‘zbek tilidagi Muqaddas Kitob, 2013 bible

Chiqish 15

¹Shundan keyin Muso va Isroil xalqi Egamizga quyidagi qo‘shiqni kuyladi: “Egamizni madh etib kuylayman. U buyuk g‘alaba keltirdi. Otlarni, aravakashlarni dengizga uloqtirdi.

²Egamiz mening kuch–qudratimdir [1]. U mening qutqaruvchimdir. U mening Xudoyimdir, men Uni olqishlayman, Otamning Xudosidir, men Uni ulug‘layman.

³Ha, U jangchidir, U Egamizdir [2].

⁴Fir’avnning lashkarini, jang aravalarini Egamiz dengizga uloqtirdi. Uning sara lashkarboshilarini Qizil dengizga [3] cho‘ktirdi.

⁵Dengiz qa’ri ularni ko‘mdi. Ular tosh singari, tubsizlikka tushib ketdilar.

⁶Ey, Egamiz, Sening o‘ng qo‘ling qudrati bilan qo‘rqinchlidir. Ey, Egamiz, Sening o‘ng qo‘ling dushmanni rosa ezdi.

⁷Sen buyuk g‘alabang bilan dushmanlaringni yiqitding. Sen ularga g‘azabingni sochgan eding, G‘azabing ularni xas–cho‘p singari yondirib tashladi.

⁸Qahrli nafasingdan suv bir joyga yig‘ilib, Devor kabi tik turib qoldi, Dengizning qa’ri qattiq yer bo‘lib qoldi.

⁹Shunda dushman gerdayib aytdi: “Orqalaridan tushaman, quvib yetaman. O‘ljani baham ko‘raman. Bulardan ko‘nglim qoniqadi. Qilichimni yalang‘ochlab, ularni yana qul qilaman.”

¹⁰Qahrli nafasingdan dengiz ularni ko‘mib yubordi. Ular bahaybat suvda qo‘rg‘oshinday g‘arq bo‘ldilar.

¹¹Xudolar orasida Senga o‘xshagani bormi, ey, Egamiz?! Kim Senga o‘xshar?! Muqaddasliging bilan ulug‘vorsan Sen, Qo‘rqinchli ishlaring bilan hamdu sanoga ilhomlantirursen, Sen ajoyibotlar ko‘rsatursen.

¹²Sen o‘ng qo‘lingni uzatgan eding, G‘animlarni yer yutdi.

¹³O‘zing qutqargan o‘sha xalqni Sen sodiq sevging bilan olib borasan. Muqaddas makoningga [4] qudrating bilan ularni yetaklab borasan.

¹⁴Xalqlar eshitib buni, titrashadi: Filist xalqi vahimaga tushib qoladi.

¹⁵Edom urug‘boshilari qo‘rquvga tushadi–ku, Mo‘ab beklarini titroq bosadi–ku! Kan’ondagi xalqlar umidsizlikka tushadi–ku!

¹⁶Ularni qo‘rquv va dahshat qamrab olar. Ey, Egamiz, Sening xalqing o‘tib ketguncha, O‘zing ega bo‘lgan bu xalq o‘tib ketguncha, Ular bilaging kuchi oldida toshday qotib qoladi.

¹⁷Xalqingni O‘z tog‘ingga olib kelasan, Ularni joylashtirasan uying uchun tanlagan yerga, ey, Egamiz! Qo‘llaring o‘rnatgan muqaddas maskaningga [5] Olib kirib joylashtirasan, ey, Rabbiy!

¹⁸Egamiz abadulabad shoh bo‘lib hukmronlik qiladi.”

¹⁹Fir’avnning otlari, aravakashlari va jang aravalari dengiz o‘rtasiga tushdi. Shunda Egamiz ularning ustiga dengiz suvlarini qaytarib olib keldi. Isroil xalqi esa dengiz o‘rtasidagi quruq yerdan o‘tib ketdi. Shu bois Muso va xalq qo‘shiq kuyladi.

²⁰Horunning singlisi payg‘ambar Maryam childirmani qo‘liga oldi. Hamma ayollar unga ergashib, childirmalarini qo‘llariga olib, o‘ynadilar.

²¹Maryam quyidagi naqoratni kuylab, ularga boshchilik qildi: “Egamizni madh etib kuylang. U buyuk g‘alaba keltirdi. Otlarni, aravakashlarni dengizga uloqtirdi.”

²²Muso Isroil xalqini Qizil dengizdan boshlab chiqqandan keyin, ular Sur sahrosiga bordilar. Ular sahroda uch kun yursalar ham, suv topa olmadilar.

²³Undan keyin Maroga bordilar. Ammo Maroning suvi taxir bo‘lgani uchun icholmadilar. Shuning uchun ham u yerga Maro [6], deb nom berilgan edi.

²⁴Xalq esa: “Endi nima ichamiz?” deb Musoga ming‘irlab nolidi.

²⁵Muso esa Egamizga iltijo qilgan edi, Egamiz Musoga bir cho‘pni ko‘rsatdi. Muso cho‘pni olib suvga tashlagan edi, suv ichishga yaroqli bo‘lib qoldi. Shunday qilib, o‘sha yerda Egamiz Isroil xalqini sinadi. Egamiz ularga yashash qonun–qoidasini berdi.

²⁶U Isroil xalqiga shunday dedi: “Agar Men, Egangiz Xudoga, hushyor bo‘lib quloq solsangiz, Mening oldimda to‘g‘ri ishlar qilsangiz, amrlarimga itoat etsangiz, hamma qonunlarimga rioya qilsangiz, o‘shanda Men Misrliklarni duchor qilgan xastaliklarning birortasiga ham sizlarni duchor qilmayman. Sizlarga shifo beradigan Egangiz Menman.”

²⁷Shundan so‘ng Isroil xalqi Ilimga keldi. U yerda o‘n ikkita buloq, yetmishta palma daraxti bor edi. Ular buloq bo‘yida qarorgoh qurdilar.