Read O‘zbek tilidagi Muqaddas Kitob, 2013 Chiqish 18 Bible Online

Chiqish 18 - O‘zbek tilidagi Muqaddas Kitob, 2013 bible

Chiqish 18

¹Midiyon yurtining ruhoniysi Yatro Musoning qaynatasi edi. Xudo Musoga va O‘z xalqi Isroilga hamma qilganlarini, Egamiz Isroil xalqini Misrdan qanday qilib olib chiqqanini u eshitdi.

²Muso xotinini otasi yoniga jo‘natib yuborganda [1], Yatro Musoning xotini Zippura bilan

³ikkala o‘g‘lini yoniga olgan edi. Muso: “Men begona yurtda musofir bo‘lgan edim”, deb to‘ng‘ich o‘g‘liga Gershom [2], deb ism qo‘ygan edi.

⁴So‘ngra: “Ota–bobolarimning Xudosi menga madad berdi, meni fir’avnning qilichidan qutqardi [3]”, deb ikkinchi o‘g‘liga Eliazar [4], deb ism qo‘ygandi.

⁵Qaynatasi Musoning xotini va o‘g‘illarini Xudoning muqaddas tog‘i [5] etagiga — sahroda Muso tikkan chodirga boshlab keldi.

⁶Yatro Musoga: “Men, qaynatang Yatro, xotining va ikkala o‘g‘ling bilan birga sening yoningga boryapmiz”, deb xabar berdi.

⁷Muso qaynatasini kutib olgani chiqdi va unga ta’zim qilib, o‘pdi. Ikkovlari bir–biridan hol–ahvol so‘rab, chodirga kirishdi.

⁸Egamiz Isroil xalqi uchun fir’avnni va Misr xalqini nimalar qilganini, Isroil xalqi yo‘lda chekkan azob–uqubatlarni, Egamiz ularni qanday qutqarganini Muso qaynatasiga aytib berdi.

⁹Egamiz Isroil xalqiga qilgan yaxshiliklari uchun, ularni Misrliklarning qo‘lidan qutqargani uchun Yatro sevinib, shunday dedi:

¹⁰— Sizlarni Misrliklarning va fir’avnning qo‘lidan qutqargan Egamizga hamdu sanolar bo‘lsin! Isroil xalqini Misrliklarning zulmidan U qutqardi.

¹¹Egamiz boshqa hamma xudolardan ulug‘ ekanini endi bilaman. Egamiz o‘z xalqini takabbur Misrliklarning qo‘lidan xalos qildi.

¹²Co‘ngra Musoning qaynatasi Yatro Xudoga kuydiriladigan qurbonlik va boshqa qurbonliklar keltirdi. Horun va barcha Isroil oqsoqollari Musoning qaynatasi bilan Egamizning huzurida muqaddas taom yegani kelishdi.

¹³Ertasi kuni Muso hukm kursisiga o‘tirib, xalqning janjallarini ajrim qila boshladi. Xalq Musoning atrofida ertalabdan kechgacha tik turdi.

¹⁴Qaynatasi Musoning xalq uchun qilayotgan hamma ishlarini ko‘rgach, aytdi: — Nimaga shuncha ishni bir o‘zing qilyapsan? Odamlar sendan yordam so‘rash uchun kun bo‘yi tik turishdi.

¹⁵Shunda Muso qaynatasiga aytdi: — Xalq Xudoning hukmini bilish uchun mening oldimga kelishadi.

¹⁶Qachon bir janjalli ish bo‘lsa ham mening oldimga kelishadi. Men esa ikkala tomon o‘rtasida qaror chiqarib, Xudoning qonun–qoidalarini ularga aytaman.

¹⁷— Bu yo‘l yaxshi emas, — dedi qaynatasi Musoga.

¹⁸— Ham o‘zingni, ham yoningdagi xalqni qiynayapsan. Bu ish juda og‘ir yuk, bir o‘zing bajara olmaysan.

¹⁹Gapimga quloq sol, senga bir maslahat berayin. Xudo senga yor bo‘lsin. Xudoning huzurida xalq uchun sen vositachi bo‘lishing kerak. Xalqning bahs–munozaralarini Xudoga sen yetkazishing lozim.

²⁰Xudoning qarorini xalqqa sen ayt, Xudoning qonun–qoidalarini o‘rgat, ular qanday qilib to‘g‘ri hayot kechirishlari kerakligini ko‘rsat.

²¹Ammo bularga qo‘shimcha qilib, sen Xudodan qo‘rqqan, diyonatli, tamadan nafratlanadigan, layoqatli odamlarni tanlab ol. Ularni xalq tepasiga mingboshi, yuzboshi, ellikboshi, o‘nboshi qilib tayinla.

²²Bu odamlar hamma haq masalalar ustidan qaror qilib, xalqqa xizmat qilishsin. Juda muhim yoki juda qiyin masalalarni esa senga olib kelishlari mumkin. Kichikroq ishlarni o‘zlari ko‘rib chiqaversin. Ular sen uchun ishni osonroq qilib, og‘irlikni ko‘tarishda senga yordam beradilar.

²³Agar Xudo shu maslahatlarimni yuragingga solsa, sen tazyiqlarga bardosh bera olasan. Hamma tinchgina o‘z joyiga ketadi.

²⁴Muso qaynatasining gapiga quloq soldi. U nima aytgan bo‘lsa, hammasini qildi.

²⁵Isroil xalqi orasidan layoqatli odamlarni tanlab oldi. O‘sha odamlarni mingboshi, yuzboshi, ellikboshi, o‘nboshi qilib tayinladi.

²⁶Ular hamma masalalarni adolatli hal qilardilar. Qiyin masalalarni Musoga olib kelishar, kichikroq ishlarni esa o‘zlari qarab chiqishardi.

²⁷Shundan keyin Muso qaynatasiga ijozat berdi. Yatro o‘z yurtiga qaytib ketdi.