Read O‘zbek tilidagi Muqaddas Kitob, 2013 Chiqish 23 Bible Online

Chiqish 23 - O‘zbek tilidagi Muqaddas Kitob, 2013 bible

Chiqish 23

¹Yolg‘on xabarlar tarqatmanglar. Yolg‘on guvohlik berish orqali fosiq odamlarga qo‘shilmanglar.

²Ko‘pchilik noto‘g‘ri ish qilganda yoki ular adolatdan chetga chiqib guvohlik berganlarida, ularga ergashmanglar.

³Kambag‘alni hukm qilayotganda ham kambag‘al, deb uning tarafini olmang.

⁴Agar dushmaningizning yo‘qolib qolgan ho‘kizini yoki eshagini topib olsangiz, egasiga olib borib bering.

⁵Dushmaningizning eshagi yuk og‘irligidan yiqilib qolsa, siz uni ko‘rgan bo‘lsangiz, dushmaningizni tashlab ketmang. Unga yordam bering.

⁶Hukmda kambag‘alga qarshi adolatdan ko‘z yummang.

⁷Tuhmatchilardan uzoq turinglar, aybsiz, to‘g‘ri odamni o‘limga hukm qilmanglar. Men bunday ish qilgan aybdorlarni hukmda oqlamayman.

⁸Pora olmanglar. Pora tufayli ko‘zi ochiqlarning ko‘zini yog‘ bosadi. Pora har doim to‘g‘ri odamlarning ishiga zarar yetkazadi.

⁹Musofirga zulm qilmanglar. O‘zlaringiz Misrda musofir bo‘lgan edingizlar, shu bois musofirning ahvolini bilasizlar.

¹⁰Olti yil dalangizga urug‘ sepib, hosilini yig‘ishtirib oling.

¹¹Yettinchi yili [1] esa yeringizni bo‘sh qoldiring, dam bering. Xalqingiz orasidagi kambag‘allar yeringizdan o‘sib chiqadigan hosildan biron yegulik topib yesin. Ulardan qolganini esa dasht hayvonlari yesin. Uzumzoringizni va zaytunzoringizni ham shunday qilinglar.

¹²Olti kun ish qilinglar, yettinchi kun esa ishlamanglar, toki ho‘kizlaringiz, eshaklaringiz ham ishdan tinsin, qullaringiz, musofirlar ham orom olsin.

¹³Men sizlarga bergan amrlarimga rioya qilinglar. Boshqa xudolarning nomlarini hech qachon gapirmanglar. Boshqa xudolarning nomlarini hatto tilga olmanglar.

¹⁴Menga atab yilda uch marta bayram qilinglar:

¹⁵Abib oyining [2] belgilangan vaqtida xamirturushsiz non bayramini nishonlanglar. Sizlar o‘sha oyda Misrdan chiqqansizlar. Men sizlarga amr etganimday [3], yetti kun xamirturushsiz non yenglar. Har kim Mening huzurimga munosib nazrlar olib kelishi lozim.

¹⁶Bug‘doy o‘rimini yig‘ishtirishni boshlaganingizda, dalangizga ekkan urug‘ning ilk hosilidan nazr qilinglar. Shu orqali Hosil bayramini nishonlanglar. Kuzda daladagi hamma hosilingizni yig‘ishtirib bo‘lganingizda, Chayla bayramini [4] nishonlanglar.

¹⁷Hamma erkaklar har yili shu uchala bayramda Men, Egangiz Rabbiyning huzuriga kelib sajda qilsin.

¹⁸Menga qilingan qurbonlikning qonini xamirturush qo‘shilgan non bilan birga nazr qilmanglar. Qilingan qurbonlikning yog‘ini ertalabga qoldirmay kuydiringlar.

¹⁹Yeringizdan olgan ilk hosilning eng yaxshisini Men, Egangiz Xudoning uyiga olib kelinglar. Uloqchani onasining sutida qaynatmanglar [5].

²⁰Sizlarni yo‘lda muhofaza etsin, sizlarni Men tayyorlagan yerga olib borsin, deb oldingizda farishtani yuboryapman.

²¹Men unda zohir bo‘lganim uchun, unga e’tibor qilinglar, uning so‘zlariga quloq solinglar. Unga o‘jarlik qilmanglar, aks holda u o‘jarligingizni kechirmaydi.

²²Agar farishtamning aytganlariga diqqat bilan quloq solsangiz, Mening amrlarimga itoat etsangiz, dushmanlaringizga dushman, raqibingizga raqib bo‘laman.

²³Farishtam oldingizda borib, sizlarni Amor, Xet, Pariz, Kan’on, Xiv va Yobus xalqlarining yerlariga boshlab boradi. Men o‘sha xalqlarni yo‘q qilaman.

²⁴Ularning xudolariga sajda qilmanglar, xizmat qilmanglar. Bu xalqlarning odatlariga taqlid qilmanglar. Ularning xudolarini yo‘q qilinglar, butsimon toshlarini sindirib tashlanglar.

²⁵Faqat Men, Egangiz Xudogagina, xizmat qilinglar. Shunda Men osh–suvingizni barakali qilaman, orangizdan xastaliklarni yo‘q qilaman.

²⁶Yurtingizda homilasi tushib qolgan yoki befarzand ayol bo‘lmaydi. Men umringizni uzoq qilaman.

²⁷Sizlarga qarshi bo‘lgan xalqlarni Mendan qo‘rqadigan qilaman. Sizlarga qarshi jang qiladigan xalqlarni sarosimaga solaman. Dushmanlaringizning hammasini oldingizdan qochiraman.

²⁸Men Xiv, Kan’on va Xet xalqlarini vahimaga solib, arilar galasi singari oldingizdan quvaman [6].

²⁹Men bir yil ichidayoq ularni oldingizdan haydamayman. Bo‘lmasa, o‘sha yurt bo‘m–bo‘sh bo‘lib qoladi. Dasht hayvonlari sizlardan ko‘payib ketadi.

³⁰Sizlar ko‘payib, o‘sha yurtni butunlay egallab olguningizcha, u yerdagi xalqlarni oz–ozdan oldingizdan haydayman.

³¹Chegaralaringizni Qizil dengizdan [7] O‘rta yer dengizigacha [8], sahrodan Furot daryosigacha [9] kengaytiraman. Sizlarni shu yurtning xalqlaridan qudratli qilaman. Sizlar ularni oldingizdan quvasizlar.

³²Ularning o‘zlari bilan ham, xudolari bilan ham ahd qilmanglar.

³³U xalqlar sizning yurtingizda yashamasin. Bo‘lmasa ular sizni o‘zlarining xudolariga sajda qildirib, Menga qarshi gunohga boshlaydi. Bu yo‘l bilan sizlarni tuzog‘iga ilintirib oladi.”