Read O‘zbek tilidagi Muqaddas Kitob, 2013 Chiqish 24 Bible Online

Chiqish 24 - O‘zbek tilidagi Muqaddas Kitob, 2013 bible

Chiqish 24

¹Shundan keyin Egamiz Musoga dedi: — Sen Horunni va uning ikki o‘g‘li Nadov bilan Abihuni, Isroilning yetmishta oqsoqolini Mening huzurimga olib kelinglar [1]. Keyin uzoqdan sajda qilinglar.

²Menga faqat sen yaqin kelgin, boshqa hech kim yaqin kelmasin. Xalq esa sizlar bilan birga chiqmasin.

³Muso kelib, Egamizning hamma amrlarini, hamma qonun–qoidalarini xalqqa aytib berdi. Xalq bir ovozdan: “Egamizning hamma aytganlarini bajaramiz”, deya javob berdi.

⁴Muso Egamizning hamma amrlarini va qonun–qoidalarini yozdi. So‘ng ertasi kuni tongda turib, tog‘ etagiga qurbongoh qurdi. O‘n ikki Isroil qabilasining miqdoriga ko‘ra, o‘n ikkita tosh o‘rnatdi.

⁵Muso Isroil xalqi orasidan yosh yigitlarni qurbonliklar keltirgani yubordi. Ular Egamizga kuydiriladigan qurbonliklar qilishdi. Buqalarni tinchlik qurbonliklari qilishdi.

⁶Muso qonning yarmini tog‘oraga quydi, qolgan yarmini esa qurbongohga sepdi.

⁷So‘ngra u Ahd kitobini [2] olib, xalqqa ovoz chiqarib o‘qib berdi. Shunda xalq: “Egamizning hamma aytganlarini bajaramiz, Unga itoat qilamiz”, — dedi.

⁸Muso tog‘oradagi qonni oldi–da, xalqqa sepib: “Ana shu so‘zlarga muvofiq, shu qon Egamiz sizlar bilan qilgan ahdni tasdiqlaydi”, — dedi.

⁹Shundan keyin Muso, Horun, Nadov, Abihu va Isroilning yetmishta oqsoqoli toqqa chiqishib,

¹⁰u yerda Isroil xalqining Xudosini ko‘rdilar: Uning oyoqlari ostida zangori yoqutdan qilingan koshin polga o‘xshash bir narsa bor edi. U osmon kabi havorang yaltiroq edi.

¹¹Isroil xalqining bu yo‘lboshchilari Xudoni ko‘rgan bo‘lsalar–da, Xudo ularni o‘ldirmadi. Ular o‘sha yerda qurbonlik go‘shtini tanovul qildilar.

¹²Keyin Egamiz Musoga aytdi: — Toqqa Mening oldimga chiqib [3], shu yerda tur. Men senga amr va qonunlar yozilgan ikkita tosh lavhani beraman. Bu amr va qonunlarni xalq o‘rgansin, deb yozdim.

¹³Muso bilan uning shogirdi Yoshua otlanishdi. Muso Xudoning muqaddas tog‘iga ketayotib,

¹⁴oqsoqollarga aytdi: — Yonlaringizga qaytib kelgunimizcha shu yerda — qarorgohda kutib turinglar. Horun bilan Xur sizlarning yoningizda qoladi. Kimning ishi bo‘lsa, ularga murojaat etsin.

¹⁵Muso toqqa chiqqanda, tog‘ni bulut qopladi.

¹⁶Egamiz ulug‘vorligini zohir qilib, Sinay tog‘iga tushdi. Olti kun davomida bulut tog‘ni qoplab turdi. Yettinchi kuni Egamiz bulut orasidan Musoni chaqirdi.

¹⁷Egamizning ulug‘vorligi tog‘ cho‘qqisida lovullayotgan alanga kabi Isroil xalqi ko‘zi o‘ngida zohir bo‘lib turardi.

¹⁸Muso bulut orasida yurib, tog‘ cho‘qqisiga chiqdi. Muso tog‘da qirq kechayu qirq kunduz qoldi.