Read O‘zbek tilidagi Muqaddas Kitob, 2013 Chiqish 25 Bible Online

Chiqish 25 - O‘zbek tilidagi Muqaddas Kitob, 2013 bible

Chiqish 25

¹Egamiz Sinay tog‘ida Musoga dedi:

²“Isroil xalqiga, Egamizga nazr qilinglar, deb ayt. Menga chin ko‘ngildan nazr qilgan odamning nazrini qabul qil.

³Quyidagilar sen ulardan qabul qilib oladigan nazrlardir: oltin, kumush, bronza,

⁴ko‘k, safsar, qirmizi rangli ip, mayin zig‘ir matosi, echki juni,

⁵qizilga bo‘yalgan qo‘chqor terisi, yumshoq teri [1], akas yog‘ochi [2],

⁶moychiroqlar uchun zaytun moyi, muqaddas qiladigan moy [3] uchun ziravorlar, xushbo‘y hidli tutatqi uchun ziravorlar,

⁷efodga taqiladigan aqiq va ko‘krakpechga taqiladigan boshqa qimmatbaho toshlar.

⁸Isroil xalqi Men uchun muqaddas maskan barpo qilishsin, toki Men Isroil xalqi orasida istiqomat qilayin.

⁹Bu Muqaddas chodirni va uning hamma jihozlarini Men senga ko‘rsatadigan namunaga muvofiq yasat.

¹⁰Akas yog‘ochidan sandiq [4] yasat. Sandiqning uzunligi ikki yarim tirsak, eni bir yarim tirsak, bo‘yi bir yarim tirsak [5] bo‘lsin.

¹¹Sandiqning ichkariyu tashqarisini toza oltin bilan qoplat. Aylanasiga oltin gulchambar qildir.

¹²Sandiq uchun eritilgan oltindan to‘rtta halqa yasatib, to‘rtala oyog‘iga mahkamlat: ikkita halqa bir tomonida, ikkita halqa ikkinchi tomonida bo‘lsin.

¹³Keyin akas yog‘ochidan xodalar yasatib, xodalarni oltin bilan qoplat.

¹⁴Xodalarni sandiqning ikkala tomonidagi halqadan o‘tkaz, toki xodalar yordamida sandiqni ko‘tarib yurishsin.

¹⁵Xodalar sandiqning halqalaridan ayirib olinmasin, doimo tursin.

¹⁶Men senga beradigan ahdning amr va qonunlari yozilgan ikkita tosh lavhani [6] sandiqqa solib qo‘y.

¹⁷Toza oltindan sandiqning qopqog‘ini yasat. Bu qopqoqning uzunligi ikki yarim tirsak, eni bir yarim tirsak [7] bo‘lsin.

¹⁸Shu bilan birga, oltindan ikkita karub yasat: ikkala karubni ham qopqoqning ikki chetiga zarb urib yasat.

¹⁹Bitta karub qopqoqning bir chetida, ikkinchi karub ikkinchi chetida bo‘lib, har ikkalasi qopqoq bilan bir butunni tashkil qilsin.

²⁰Karublarning tepaga ko‘tarilgan qanotlari qopqoqni berkitib tursin. Ular yuzma–yuz turib, qopqoqqa qaragan bo‘lsin.

²¹Qopqoqni sandiqning ustiga qo‘y. Men senga beradigan ikkita tosh lavhani [8] sandiqqa sol.

²²Ahd sandig‘i [9] ustida Men sen bilan uchrashaman. Karublar o‘rtasidagi gunohdan poklash joyi tepasidan Men senga gapirib, Isroil xalqi uchun hamma amrlarimni senga beraman.

²³Akas yog‘ochidan xontaxta [10] yasat. Xontaxtaning uzunligi ikki tirsak, eni bir tirsak, bo‘yi bir yarim tirsak [11] bo‘lsin.

²⁴Xontaxtani toza oltin bilan qoplatib, chetlariga aylantirib oltin gulchambar yasat.

²⁵Yana xontaxtaning atrofi bo‘ylab to‘rt enli qilib oltin bilan qoplangan taxta qildirib, uni xontaxta oyoqlariga mahkamlat. Oltin gulchambarni xontaxtaning aylanasi bo‘ylab taxta ustiga qildir.

²⁶[26-28] Yana to‘rtta oltin halqa yasatib, har birini taxta mahkamlangan joyning yoniga — to‘rtala burchagidagi to‘rtala oyog‘iga o‘rnashtir. Akas yog‘ochidan ikkita xoda yasatib, ularni oltin bilan qoplat. Bu yog‘ochlarni halqalardan o‘tkazib, xontaxtani ko‘tarib yurish uchun foydalan.

²⁹Xontaxtaga qo‘yiladigan lagan, piyolalar, sharob nazr qilish uchun ko‘za va kosalar yasat. Bu buyumlarni toza oltindan yasat.

³⁰Mening huzurimdagi xontaxtada doim muqaddas nonlar [12] tursin.

³¹Toza, zarb qilingan oltindan chiroqpoya [13] yasat. Butun chiroqpoya va uning bezaklari bir butun qilib yasalsin. Chiroqpoyaning tagligi, tanasi, kurtakli gulga o‘xshash shakldagi piyolalari bo‘lsin.

³²Yana chiroqpoyaning tanasidan oltita shoxcha chiqarilsin: uchta shoxchasi bir yonidan, uchta shoxchasi ikkinchi yonidan chiqarilsin.

³³Chiroqpoyaning tanasidan chiqadigan shoxchalarning har birida kurtakli bodom guliga o‘xshash shakldagi uchta piyola bo‘lsin.

³⁴Chiroqpoyaning tanasida kurtakli bodom guliga o‘xshash shakldagi to‘rtta piyola bo‘lsin.

³⁵Chiroqpoyaning tanasidan chiqadigan shoxchalarning har juftida bu kurtaklardan uchtasi birin–ketin tizilib tursin.

³⁶Chiroqpoya, shoxchalari va kurtaklari bilan bitta qilib zarb qilingan toza oltinning yaxlit bo‘lagidan yasalishi lozim.

³⁷Chiroqpoyaga yettita moychiroq yasatib, unga hammasini o‘rnashtir, toki moychiroqlar chiroqpoyaning old tomonini yoritib tursin.

³⁸Moychiroqlarga qarab turish uchun toza oltindan qisqichlar va patnislar yasat.

³⁹Chiroqpoyani va bu buyumlarni ikki pud [14] toza oltindan yasashsin.

⁴⁰Ehtiyot bo‘l, o‘sha hamma buyumlarni Men senga shu yerda — tog‘da ko‘rsatgan namunaga muvofiq yasat.