Read O‘zbek tilidagi Muqaddas Kitob, 2013 Chiqish 28 Bible Online

Chiqish 28 - O‘zbek tilidagi Muqaddas Kitob, 2013 bible

Chiqish 28

¹Isroil xalqi orasidan akang Horunni va u bilan birga uning o‘g‘illarini yoningga chaqir. Horun ham, uning o‘g‘illari Nadov, Abihu, Elazar, Itamar ham ruhoniy bo‘lib, Menga xizmat qilishsin.

²Akang Horunni hurmatli va ko‘rkam qilish uchun unga muqaddas ruhoniylik liboslarini [1] tayyorlat.

³[3-4] Men qobiliyat ato qilgan hamma mohir ustalarga ayt. Ular Horunga quyidagi ruhoniylik liboslarini tikishsin: ko‘krakpech, efod, rido, naqshli ko‘ylak, salla va belbog‘. Horun Menga xizmat qilganda, bu liboslar uni muqaddas qilib boshqalardan ajratib turadi. Horun o‘g‘illari kiyishlari uchun ularga muqaddas liboslar tiktir, toki ular ruhoniy bo‘lib, Menga xizmat qilganlarida, bu liboslarni kiyishsin.

⁵Ular bu liboslarni mayin zig‘ir matosidan tikib, ko‘k, safsar, qirmizi iplar va oltin bilan bezatishsin.

⁶Efodni [2] mayin zig‘ir matosidan yasatib, ko‘k, safsar, qirmizi rangli iplardan va oltindan qilingan ipdan mahorat bilan naqsh soldir.

⁷U bir–biriga ikkita yelka bog‘ichi bilan bog‘langan old va orqa qismlardan iborat bo‘lsin.

⁸Kamar yasatib, uni efodga bog‘lat. Kamarni ham mayin zig‘ir matosidan qildir. Unga ko‘k, safsar, qirmizi rangli iplardan va oltindan qilingan ipdan mahorat bilan naqsh soldir.

⁹[9-11] Keyin ikkita aqiq tosh olib, usta qimmatbaho toshga muhr o‘yadiganday, bu toshlarga Isroil o‘g‘illarining ismini o‘yib yozdir. Bitta toshga Isroil o‘g‘illaridan oltitasining ismini, ikkinchi toshga qolgan oltitasining ismini yoshi bo‘yicha yozdir. Yozilgan toshlarni oltindan qilingan naqshli uyalar ichiga qo‘ydirib,

¹²efodning yelka bog‘ichlariga o‘rnashtir. Horun Men, Egangizning huzuriga kirganda, Isroilning o‘n ikki qabilasini eslatib turish uchun ikkala yelkasida bu toshlarni olib yuradi.

¹³Yana ikkita naqshli, oltin uya va

¹⁴toza oltindan ipga o‘xshatib eshilgan ikkita zanjir yasat. Bu ikkala zanjirning bir uchi uyaga mahkamlanadi [3].

¹⁵Oliy ruhoniy uchun ko‘krakpech [4] yasat. U hukm qilayotganda, Xudoning xohishini bilish uchun foydalanadi [5]. Ko‘krakpechni, efod singari, mayin zig‘ir matosidan yasatib, ko‘k, safsar va qirmizi rangli iplardan va oltindan qilingan ipdan mahorat bilan naqsh soldir.

¹⁶Ko‘krakpechni to‘rtburchak xalta shaklida, ikki buklangan, bo‘yi bir qarich, eniga ham bir qarich qilib yasat.

¹⁷Ko‘krakpechga to‘rt qator toshni [6] to‘g‘ri qilib terdir: qizil yoqut, xrizolit va zumrad toshlarni birinchi qatorga terdir.

¹⁸Ikkinchi qatorga firuza, zangori yoqut va olmosni terdir.

¹⁹Uchinchi qatorga lojuvard, agat va ametist toshlarni terdir.

²⁰To‘rtinchi qatorga topaz, aqiq va yashma toshlarni terdir. Hamma toshlar oltindan qilingan naqshli uyalarga o‘rnashtirilsin.

²¹Bu o‘n ikki tosh Isroilning o‘n ikki qabilasini eslatib turadi. Muhr o‘yganday qilib, Isroilning o‘n ikki o‘g‘lidan har birining ismini bu toshlarning har biriga o‘yib yozdir.

²²[22-23] Ikkita oltin halqa yasatib, ko‘krakpechning ikkala ustki burchaklariga mahkamlat. Toza oltindan ipga o‘xshatib eshilgan ikkita zanjirni ol [7].

²⁴Ikkala zanjirning bir uchini ko‘krakpechdagi halqalarga bog‘lat,

²⁵ikkinchi uchini naqshli oltin uyalarga mahkamlat [8]. Uyalarni efodning old tomonidagi yelka bog‘ichlariga o‘rnashtir.

²⁶[26-27] Yana oltindan to‘rtta halqa yasat. Ikkitasini ko‘krakpechning ostki burchaklariga — efodga yaqin bo‘lgan ichki qirg‘og‘iga mahkamlat. Ikkitasini efodning old tomoniga, ikkala yelka bog‘ichining pastiga — naqshli kamar ustidagi joyga mahkamlat.

²⁸Ko‘krakpech efodning naqshli kamari ustida bo‘lsin, efoddan osilib turmasin, deb ko‘krakpech halqalari yordamida efodning halqalariga ko‘k bog‘ich bilan mahkamlanadi.

²⁹Horun har safar Muqaddas xonaga kirganda ko‘krakpechdagi [9] o‘n ikki Isroil qabilasining ismini yuragi tepasida ko‘tarib yuradi. Shunday qilib, Horun Men, Egangizning huzurida bo‘lganda, ko‘krakpech doimo eslatib turadigan vazifani bajaradi.

³⁰Urim va Tummimni ko‘krakpech xaltasining ichiga sol, toki Horun Mening huzurimga kirganda, xalqim uchun Mening xohishimni bilgani foydalaniladigan o‘sha narsalarni doimo yuragi tepasida ko‘tarib yursin.

³¹Efodning ridosini [10] ko‘k ipdan to‘qilgan matodan tikdir.

³²Ridoning o‘rtasidan bosh sig‘adigan teshik qildir. Rido yirtilib ketmasligi uchun teshikning qirg‘og‘ini to‘qit.

³³[33-34] Rido etagining uchiga aylanasi bo‘ylab anor shaklini va qo‘ng‘iroqchalarni birin–ketin qilib bittama–bitta ostirib chiq. Anor shaklini ko‘k, safsar, qirmizi ipdan qildir. Oltin qo‘ng‘iroqchalarni anor shakli oralariga ostir.

³⁵Horun o‘ldirilmasligi uchun Men, Egangizning huzurida oliy ruhoniy bo‘lib, xizmat qilganda, u shu ridoni kiyishi kerak. U Muqaddas xonaga kirganda va u yerda bo‘lganda, ridoning qo‘ng‘iroqchalari chalinadi, Horun xavf–xatardan yiroq bo‘ladi.

³⁶Keyin toza oltindan lavha yasat. Lavhaning yuzasiga muhr o‘yganday qilib, “Egamizga bag‘ishlangan”, deb o‘yib yozdir.

³⁷Lavhani ko‘k bog‘ich bilan sallaning old tomoniga mahkamlat.

³⁸Isroil xalqining ehsonlari Menga qabul bo‘lishi uchun, Horun doimo o‘z ruhoniylik vazifasini bajarganda, lavhani peshanasida olib yursin. Isroil xalqi nazr qilganda, Horunning nazrlarga oid gunohni yuvish vazifasining ramzi shu lavha bo‘ladi.

³⁹Horunning ko‘ylagini va sallasini mayin zig‘ir matosidan qildir, ko‘ylagiga naqsh soldir. Belbog‘ini chiroyli, naqshli matodan yasat.

⁴⁰Horunning o‘g‘illarini hurmatli va ko‘rkam qilish uchun ularga ko‘ylaklar, belbog‘lar, peshanabog‘lar tiktir.

⁴¹Akang Horun va uning o‘g‘illari ruhoniy bo‘lib, Menga xizmat qilishlari uchun ularni bag‘ishla: bu liboslarni ularga kiygizib, moy surt, ularni ruhoniy qilib tayinla.

⁴²Tananing ochiq joylari ko‘rinib qolmasin [11], deb yana ularga zig‘ir matosidan ishtonlar tiktir. Kiyimlar ularning belidan sonigacha yopib tursin.

⁴³Horun va uning o‘g‘illari Uchrashuv chodiriga kirganlarida yoki Muqaddas xonada xizmat qilish uchun qurbongohga yaqinlashganlarida, shu ichki kiyimlarni kiyib olsin. Shunda Horun va uning o‘g‘illari ochiq joylarini berkitmagani uchun aybdor bo‘lib o‘ldirilmaydi. Horun va uning nasliga doimiy qonun–qoida ana shudir.