Read O‘zbek tilidagi Muqaddas Kitob, 2013 Chiqish 30 Bible Online

Chiqish 30 - O‘zbek tilidagi Muqaddas Kitob, 2013 bible

Chiqish 30

¹Tutatqi tutatish uchun akas yog‘ochidan [1]qurbongoh [2] yasat.

²Qurbongoh to‘rtburchak, uzunligi bir tirsak, eni ham bir tirsak, bo‘yi esa ikki tirsak [3] bo‘lsin. Qurbongohning shoxlari [4] o‘zidan yo‘nib chiqarilsin.

³Qurbongohning ustini, yon atrofini, shoxlarini toza oltin bilan qoplat, aylanasi bo‘ylab oltindan gulchambar yasat.

⁴[4-5] Qurbongohning ikki tomonidagi gulchambarning ostiga ikkita oltin halqa o‘rnashtir. Akas yog‘ochidan ikkita xoda yasatib, ularni oltin bilan qoplat. Bu xodalarni halqalardan o‘tkazib, qurbongohni ko‘tarib yurishda foydalan.

⁶Tutatqi qurbongohini ahd sandig‘ining [5] qopqog‘i oldida osilib turadigan ichki pardaning tashqarisiga qo‘ydir. Bu joy — sen bilan Men uchrashadigan joyning tashqarisida.

⁷Horun har kuni ertalab o‘sha chiroqlardan xabar olganda bu qurbongohda xushbo‘y hidli tutatqi tutatsin.

⁸U kechqurun chiroqlardan xabar olganda ham tutatqi tutatsin. Bu tutatqi nazrlari sizlarning avlodlaringiz osha Men, Egangizning huzurida har kuni tutatilishi lozim.

⁹Bu qurbongohda faqat muqaddas tutatqini [6] tutatinglar. Qurbongohda kuydiriladigan qurbonlik yoki don nazri qilmanglar, sharob nazri ham qilmanglar.

¹⁰Horun bir yilda bir marta [7] qurbongoh uchun poklash marosimini o‘tkazsin. Buning uchun gunoh qurbonligining qonidan qurbongohning to‘rtala shohiga [8] surtib, qurbongohni poklasin. Bu marosim har yili avlodlar osha qilinishi lozim. Bu qurbongoh Men, Egangizga, bag‘ishlangan g‘oyat muqaddas qurbongohdir.”

¹¹So‘ngra Egamiz Musoga yana gapirdi:

¹²“Isroilda katta bo‘lgan odamlarni sanaganingda, har bir odam sanoq paytida Men, Egangizga, himoya qiladigan to‘lov [9] to‘lasin. Shunda sen ularni sanaganingda, ularga kulfat keltirmayman.

¹³[13-14] Yigirma va undan yuqori yoshdagi sanoqqa kiradigan har bir odam 1,25 misqol kumushdan [10] Men, Egangizga, nazr qilishi lozim.

¹⁵Ular o‘zlarini Mening hukmimdan himoya qiladigan nazrni [11] qilganlarida, boy odam o‘shandan ko‘p bermasin, kambag‘al ham o‘shandan oz bermasin.

¹⁶Bag‘ishlangan bu kumushni Uchrashuv chodirini yasash uchun sarf qil. Men, Egangizning huzurida bu kumush Isroil xalqiga hukmimdan himoya qiladigan nazr berilganini eslatib turadi.”

¹⁷Egamiz Musoga yana gapirdi:

¹⁸“Yuvinish uchun bronzadan qo‘lyuvgich yasat. Qo‘lyuvgichning tagligi ham bronzadan bo‘lsin. Qo‘lyuvgichni Uchrashuv chodiri bilan qurbongoh o‘rtasiga o‘rnatib, unga suv quy.

¹⁹Horun bilan uning o‘g‘illari qo‘lyuvgichdagi suv bilan qo‘llarini va oyoqlarini yuvishsin.

²⁰Ular Uchrashuv chodiriga kirayotganlarida, suvda yuvinishsin. Shunda ular nobud bo‘lmaydi. Yoki ular ruhoniy bo‘lib, qurbongohda kuydirgani nazrlar olib kelib Men, Egangizga, xizmat qilganlarida,

²¹qo‘l–oyoqlarini suvda yuvishsin. Shunda ham ular nobud bo‘lmaydi. Bu Horun va uning nasllari uchun avlodlari osha saqlab olib o‘tish uchun doimiy qonundir.”

²²Egamiz Musoga yana aytdi:

²³“Quyidagi eng yaxshi xushbo‘y hidli ziravorlardan ol: 1250 misqol [12] suyuq mirra, 625 misqol [13] dolchin, 625 misqol qamish

²⁴va 1250 misqol kassiya [14]. Sakkiz kosa [15]zaytun moyi olib,

²⁵usta odam xushbo‘y hidli moy qilish uchun ziravorlarni moy bilan aralashtirsin. Bu muqaddas qiladigan moydir.

²⁶Bu moyni Uchrashuv chodiriga, ahd sandig‘iga,

²⁷xontaxtaga va xontaxtaning hamma buyumlariga, chiroqpoyaga va uning hamma buyumlariga, tutatqi qurbongohiga,

²⁸qurbonlik kuydiriladigan qurbongohga va uning hamma buyumlariga, qo‘lyuvgichga va uning tagligiga surt.

²⁹Shu tariqa bu narsalarni Menga bag‘ishla. Shunda ular g‘oyat muqaddas bo‘ladi. Birontasi yoki biron narsa ularga tekkanda, muqaddas bo‘ladi.

³⁰So‘ng Horun bilan o‘g‘illariga bu moydan surtib, ularni bag‘ishla, toki ular ruhoniy bo‘lib, Menga xizmat qilishsin.

³¹Isroil xalqiga esa Mening shu gapimni yetkaz: — Muqaddas qiladigan moy sizlarning butun avlodlaringiz osha Menga bag‘ishlansin.

³²Bu moy ruhoniy bo‘lmagan odamning tanasiga surtilmasligi kerak. Shu tarkibdagi moy aralashmasini sizlar tayyorlamanglar. Chunki bu moy muqaddasdir, sizlar buni muqaddas, deb qarashingiz lozim.

³³Kimki bunga o‘xshash hidli moyni tayyorlasa yoki bu moydan ruhoniy bo‘lmagan odam ustiga surtsa, u Isroil xalqi orasidan yo‘q qilinadi.”

³⁴[34-35] Egamiz yana Musoga gapirdi: “Quyidagi xushbo‘y hidli ziravorlarni olib, ularni aralashtir: yelimdan qilingan ziravor, moluska qobig‘idan qilingan ziravor, xilvon. So‘ngra usta odam toza xushbo‘y tutatqidan, xushbo‘y hidli aralashmadan bir o‘lchovda olsin. Ularni tuz bilan aralashtirib, toza, muqaddas bo‘ladigan tutatqi qilsin.

³⁶Bu tutatqidan bir qismini olib, mayda qilib tuy va Men sen bilan uchrashadigan Uchrashuv chodiridagi ahd sandig‘i [16] oldiga qo‘y. Bu tutatqini sizlar g‘oyat muqaddas deb bilishingiz lozim.

³⁷O‘sha tarkibdagi tutatqi aralashmasini o‘zlaringiz uchun qilmanglar. Buni Men, Egangizga, bag‘ishlangan muqaddas tutatqi, deb qara.

³⁸Kimki tutatgani o‘zicha shunga o‘xshagan tutatqi qilsa, u Isroil xalqi orasidan yo‘q qilinadi.”