Read O‘zbek tilidagi Muqaddas Kitob, 2013 Chiqish 31 Bible Online

Chiqish 31 - O‘zbek tilidagi Muqaddas Kitob, 2013 bible

Chiqish 31

¹Egamiz Musoga yana gapirdi:

²“Ana, Men Yahudo qabilasidan Urining o‘g‘li, Xurning nabirasi Bazalilni tanladim.

³Men uni Ruhim bilan to‘ldirib, hunarmandchilikning hamma turi bo‘yicha mohir, idrokli qildim, qobiliyat ato qildim.

⁴U ajoyib badiiy bezaklar qilishga, bezaklarga oltin, kumush va bronza bilan ishlov berishga,

⁵qimmatbaho toshlarni o‘yib ishlov berib jihozlashga, yog‘och o‘ymakorligiga, badiiy hunarmandchilikka layoqatlidir.

⁶Dan qabilasidan Oxisamax o‘g‘li Oxoliyovni unga yordamchi qilib tanladim. Men hamma hunarmandlarga lozim darajada qobiliyat ato qilganman. Men senga amr bergan quyidagi ashyolarni ular yasaydilar va tikadilar:

⁷Uchrashuv chodirini, ahd sandig‘i [1] va sandiqning qopqog‘ini, chodirning boshqa hamma jihozlari

⁸— xontaxta, xontaxtaning buyumlari, toza oltindan chiroqpoya va chiroqpoyaning hamma buyumlarini, tutatqi qurbongohini,

⁹qurbonlik kuydiriladigan qurbongoh va qurbongohning hamma buyumlarini, qo‘lyuvgich va qo‘lyuvgichning tagligini,

¹⁰ruhoniy Horun uchun ajoyib qilib tikilgan muqaddas liboslarni, uning o‘g‘illari ruhoniy bo‘lib, xizmat qilganlarida kiyadigan liboslarni,

¹¹muqaddas qiladigan moy [2] va Muqaddas xona uchun xushbo‘y hidli tutatqini. Men senga qanday amr etgan bo‘lsam, ular xuddi shunday qilib bajarishsin.”

¹²So‘ngra Egamiz Musoga aytdi:

¹³— Isroil xalqiga Mening shu gapimni yetkaz: “Menga bag‘ishlangan Shabbat kuniga rioya qilib yuringlar. Shabbat kuni — Men bilan Isroil xalqi o‘rtasidagi ahdning avlodlaringiz osha davom etadigan alomati. Shu orqali Egangiz Men ekanligimni bilib olasizlar. Sizlarni Men muqaddas qilib boshqalardan ajrataman.

¹⁴Shabbat kuniga rioya qilib yuringlar, bu kunni muqaddas deb bilinglar. Kimki bu kunni izzat qilmasa, o‘sha odamning jazosi o‘lim. Kimki o‘sha kuni ishlasa, u Isroil xalqi orasidan yo‘q qilinadi.

¹⁵Hamma ishlaringizni bajarishingiz uchun olti kun bor. Yettinchi kun — Shabbat kuni esa hamma ishlardan tinib, Men, Egangizga, atab ajratilgan kundir. Shabbat kuni ishlaganning jazosi o‘limdir.

¹⁶Isroil xalqi avlodlar osha Shabbat qonun–qoidalariga itoat etish orqali bu kunga rioya qilib yurishlari lozim.

¹⁷Bu sen bilan Mening o‘rtamizdagi ahdning doimiy alomatidir, Men, Egangiz, olti kun davomida yer va osmonni yaratib, yettinchi kuni tinib, orom olganimni doimo eslatib turadi.”

¹⁸Shunday qilib, Xudo Sinay tog‘ida Muso bilan gapini tugatib [3], ahdning [4] amr va qonunlari yozilgan ikkita tosh lavhani Musoga berdi. Bularni Xudoning O‘zi yozgan edi.