Read O‘zbek tilidagi Muqaddas Kitob, 2013 Chiqish 34 Bible Online

Chiqish 34 - O‘zbek tilidagi Muqaddas Kitob, 2013 bible

Chiqish 34

¹Egamiz Musoga amr berdi: — Oldingilariga o‘xshagan ikkita tosh lavha kes. Sen sindirgan oldingi lavhalardagi so‘zlarni Men o‘sha lavhalarga yozaman.

²Ertalabga tayyor bo‘l, Sinay tog‘iga chiqib, tog‘ cho‘qqisida Meni kutib olishga hozir bo‘lib tur.

³Lekin sen bilan birga hech kim chiqmasin. Tog‘ning biror joyida hech kim bo‘lmasin. Hatto tog‘ning yaqinida mol–qo‘ylar ham boqilmasin.

⁴Egamiz amr etganday, Muso oldingilariga o‘xshagan ikkita tosh lavhani kesdi. Ertasiga saharda turib, qo‘liga ikkala tosh lavhani olib, Sinay tog‘iga chiqdi.

⁵Egamiz bulut ichida tushib keldi. Muso bilan birga turib, O‘zini Musoga ma’lum qildi [1].

⁶Musoning oldidan o‘tib, baland ovoz bilan gapirdi: — Men Egangman! Men Egangman! [2] Rahmdil va inoyatli, jahli tez chiqmaydigan Xudoman, sodiq sevgim mo‘ldir.

⁷Ming–ming avlodlarga [3] sodiq sevgimni ko‘rsataveraman. Fosiqlikni, isyonni va gunohlarni kechiraman. Lekin aybdorlarni aslo jazosiz qoldirmayman. Men ularni jazolab, ularning gunohlari oqibatini bolalariga, nabiralariga va chevaralariga olib kelaman.

⁸O‘sha zahoti Muso ikki bukilib ta’zim qilib, sajda qildi.

⁹So‘ngra: — Yo, Rabbiy! — dedi. — Agar men Sendan marhamat topgan bo‘lsam, iltijo qilaman, Sen biz bilan borgin. Bu xalq o‘jar bo‘lsa ham, fosiqligimizni va gunohlarimizni kechirgin, bizni O‘zingning xalqing qilib qabul et.

¹⁰Egamiz aytdi: “Men endi Isroil xalqi bilan ahd tuzaman. Butun xalqing ko‘zi oldida ajoyibotlar ko‘rsataman. Bunaqa ajoyibotlar yer yuzida yoki bironta xalq orasida bo‘lmagan. Men, Egangizning sizlarga ko‘rsatadigan dahshatli ishini sen bilan birga bo‘lgan butun xalq ko‘radi.

¹¹Men sizlarga bugun beradigan amrlarga itoat qilinglar. Men sizlarning oldingizdan Amor, Kan’on, Xet, Pariz, Xiv va Yobus xalqlarini quvaman.

¹²Ehtiyot bo‘linglar, sizlar kiradigan yurtning aholisi bilan sulh tuzmanglar. Bo‘lmasa, sizlarni tuzog‘iga ilintirib oladi.

¹³Sizlar esa ularning qurbongohlarini buzinglar, butsimon toshlarini maydalab tashlanglar, Asheraga atalgan ustunlarni kesib tashlanglar.

¹⁴Boshqa xudolarga sajda qilmanglar. Men, Egangizning nomi Rashkchi: Men sizlarning sevgingizni boshqa xudolar bilan baham ko‘rmaydigan Xudoman.

¹⁵O‘sha yurtning aholisi bilan sulh tuzmanglar. Ular o‘z xudolari ortidan hirs bilan ergashadilar. Ular bilan sulh tuzsangiz, o‘z xudolariga qurbonliklar keltirayotganlarida sizlarni ham o‘zlariga qo‘shilishga taklif qiladilar. Sizlar ular bilan borib, qurbonliklaridan tanovul qilasiz.

¹⁶Keyin ularning qizlarini o‘g‘illaringizga olib berasizlar. Ular o‘z xudolariga hirs bilan sajda qilganda, o‘g‘illaringizni ham o‘sha xudolarga hirs qo‘yishga boshlaydilar.

¹⁷O‘zlaringizga xudolar tasvirlarini [4] yasamanglar.

¹⁸Xamirturushsiz non bayramini har yili nishonlanglar. Men sizlarga amr etganimday, Abib oyining [5] belgilangan vaqtida [6] yetti kun xamirturushsiz non yenglar. Sizlar Abib oyida Misrdan chiqqansizlar.

¹⁹To‘ng‘ich o‘g‘illaringiz, hamma chorvangizning — mol–qo‘ylaringizning birinchi tug‘ilgan erkak bolasi Meniki.

²⁰Birinchi tug‘ilgan erkak eshak [7] Egamizdan bir qo‘zi yoki uloqcha evaziga sotib olinadi. Agar eshakni qaytarib sotib olmaslikka qaror qilsangiz, eshakning bo‘ynini sindirib o‘ldirishingiz kerak. Sizlar Egamizdan hamma to‘ng‘ich o‘g‘illarni ham qaytarib sotib olishingiz lozim [8]. Har kim Mening huzurimga munosib nazrlar olib kelishi lozim [9].

²¹Hamma ishlaringizni bajarishingiz uchun olti kun bor. Yettinchi kun esa ish qilmanglar. Hatto ekin–tikin paytida va o‘rim paytida ham dam olinglar.

²²Har yili bug‘doy o‘rimini yig‘ishtirishni boshlaganingizda, dalangizga ekkan urug‘ning ilk hosilidan nazr qilinglar. Shu orqali Hosil bayramini [10] nishonlanglar. Kuzda Chayla bayramini [11] nishonlanglar.

²³Hamma erkaklaringiz har yili uchala bayramda [12] Isroil xalqining Xudosi, Men, Egangiz Rabbiyning huzuriga kelib sajda qilsin.

²⁴Sizlarning yeringizdan xalqlarni quvaman, chegaralaringizni kengaytiraman. Har yili uch marta [13] Men, Egangiz Xudoga, sajda qilishga kelganingizda, sizlarning mulkingiz bo‘lgan yerni hech kim bosib olmaydi.

²⁵Menga qilingan qurbonlikning qonini xamirturush qo‘shilgan non bilan birga nazr qilmanglar. Fisih ziyofati qurbonligi go‘shtini ertalabgacha qoldirmanglar.

²⁶Yeringizdan olgan ilk hosilning eng yaxshisini Men, Egangiz Xudoning uyiga olib kelinglar. Uloqchani onasining sutida qaynatmanglar [14].”

²⁷Keyin Egamiz Musoga: — Bu so‘zlarni yozib ol! — deb amr qildi. — Shu so‘zlarga binoan Men sen bilan hamda Isroil xalqi bilan ahd tuzaman.

²⁸Muso o‘sha yerda Egamizning huzurida yemay–ichmay, qirq kechayu qirq kunduz bo‘ldi. Egamiz ikkita tosh lavhaga ahd so‘zlarini — o‘nta amrni yozdi.

²⁹Xudo Muso bilan gaplashgani uchun, u qo‘lida ikkita lavhani [15] olib tog‘dan tushayotganda, yuzlaridan nur sochilayotgan edi. Musoning o‘zi buni bilmasdi.

³⁰Horun ham, jamiki Isroil xalqi ham Musoni ko‘rib, uning yuzidan nur yog‘ilib turgani uchun birortasi unga yaqin kelishga qo‘rqardi.

³¹Muso Horunni va barcha jamoa oqsoqollarini chaqirdi, ular Musoning oldiga kelishdi. Muso ular bilan gaplashgandan keyin,

³²jamiki Isroil xalqi unga yaqinroq keldi. Muso Sinay tog‘ida Egamiz bergan amrlarni bajarishni xalqqa buyurdi.

³³Muso ular bilan gaplashib bo‘lgandan keyin, yuziga yopinchiq yopib oldi.

³⁴Muso Egamizga gapirish uchun Uning huzuriga borganda, yuzini yopib olardi. U chiqib, Egamiz, ayt, deb aytgan hamma amrni Isroil xalqiga yetkazardi. Shunda Isroil xalqi

³⁵Musoning yuzi hamon nur sochib turganini ko‘rardi. So‘ngra Muso keyingi safar Egamiz bilan gaplashish uchun borgungacha yopinchiqni olib qo‘yardi.