Read O‘zbek tilidagi Muqaddas Kitob, 2013 Chiqish 36 Bible Online

Chiqish 36 - O‘zbek tilidagi Muqaddas Kitob, 2013 bible

Chiqish 36

¹Bazalil, Oxoliyov va boshqa hamma iqtidorli ustalar Egamiz amr etgan hamma ishlarni bajarsinlar. Muqaddas chodir yasashda talab qilingan har qanday xizmatni bajarishlari uchun Egamiz ularga mahorat va qobiliyat ato qilgan.”

²Muso Bazalilni, Oxoliyovni va Egamiz qobiliyat ato qilgan hamma iqtidorli ustalarni, yuragi zavq–shavqqa to‘lgan odamlarni chaqirdi.

³Muqaddas chodirni yasash uchun Isroil xalqi olib kelgan hamma nazrlarni Muso ustalarga berdi. Bulardan tashqari, xalq har kuni ertalab Musoga ko‘ngildan chiqarib nazrlar olib kelishardi.

⁴Ishlarni bajarayotgan hamma ustalar yumushlarini qoldirib,

⁵Musoning oldiga kelib aytishdi: — Egamiz bizga amr etgan ishlar uchun xalq yetarlisidan ortiq olib kelyapti.

⁶Shunda Muso: “Bironta erkak, ayol endi Muqaddas chodir uchun nazr olib kelmasin”, deb buyruq berdi. Uning buyrug‘i qarorgoh bo‘ylab e’lon qilindi. Shundan keyin xalq nazr olib kelishni to‘xtatdi.

⁷Xalqning olib kelgan nazrlari ishning hammasini bajarishga yetib, hatto ortib ham qolar edi.

⁸Ishlayotganlar orasidagi eng mohir odamlar Muqaddas chodirni [1] yasadilar: Mohir tikuvchilar Bazalilning ko‘rsatmasi bilan chodirning ichki qavatini qildilar. U mayin zig‘ir matosidan tikilgan o‘nta choyshabdan iborat bo‘ldi. Ko‘k, safsar va qirmizi iplar bilan karublar tasvirini mahorat bilan ishlab bu choyshablarni bezadilar.

⁹Har bir choyshabning bo‘yi yigirma sakkiz tirsak, eni to‘rt tirsak [2] edi. Hamma choyshablarning o‘lchovi bir xil edi.

¹⁰Ular choyshablardan beshtasining bo‘yini bir–biri bilan birlashtirib tikdilar, qolgan beshtasini ham shunday qildilar.

¹¹[11-12] Ulangan ikki bo‘lak choyshabning bir bo‘yiga ko‘k matodan qilingan elliktadan halqa tikdilar. Har ikki tomonga tikilgan halqalar bir–biriga ro‘parama–ro‘para edi.

¹³Keyin oltindan ellikta ilgak yasadilar, ikkala choyshabning halqalarini ilgaklar bilan bir–biriga uladilar. Shunda chodirning ichki qavati bir butun bo‘ldi [3].

¹⁴Muqaddas chodirning qoplamasi uchun echki juni matosidan o‘n bitta choyshab tikdilar.

¹⁵Har bitta choyshabning bo‘yi o‘ttiz tirsak, eni to‘rt tirsak [4] edi. O‘n bitta choyshabning hammasi bir o‘lchovda edi.

¹⁶Choyshablardan beshtasining bo‘yini bir–biri bilan birlashtirib tikdilar, qolgan oltitasini ham shunday qildilar.

¹⁷Ulangan ikki bo‘lak choyshabning bir bo‘yiga elliktadan halqa tikdilar.

¹⁸Keyin, chodirning qoplamasi bir butun bo‘lsin [5], deb ikkala choyshabni birlashtirish uchun bronzadan ellikta ilgak yasadilar.

¹⁹Bu qoplama ustiga qo‘yish uchun qizilga bo‘yalgan qo‘chqor terisidan qoplama, so‘ng yumshoq teridan [6] tashqi qoplama qildilar.

²⁰Akas yog‘ochidan [7] Muqaddas chodirni tutib turadigan romlar [8] yasadilar.

²¹Har bir romning bo‘yi o‘n tirsak, eni bir yarim tirsak [9] edi.

²²Har bir romning ostida bir–biriga parallel bo‘lgan ikkita tirgak yasadilar.

²³Chodirning janub tomonidagi devor uchun yigirmata rom yasadilar.

²⁴Bu romlar ostiga qo‘yish uchun kumushdan qirqta taglik — har bir rom uchun ikkitadan taglik qildilar, har bir tirgak ostida bitta taglik bo‘ldi.

²⁵Chodirning shimol tomonidagi devor uchun yigirmata rom yasadilar.

²⁶Har bir rom ostiga qo‘yish uchun ikkitadan — qirqta kumush taglik yasadilar.

²⁷Chodirning orqadagi — g‘arb tomonidagi devor uchun oltita rom,

²⁸chodirning orqasida burchaklar hosil qilish uchun har ikki tomoniga yana bittadan rom yasadilar.

²⁹Bu ikkala romni pastdan va yuqoridan tutashgan devordagi oxirgi romga birlashtirdilar. Bitta burchak hosil qilishi uchun bitta halqa bilan yaxlit qilib birlashtirdilar. Har ikkala burchak shu yo‘l bilan hosil qilindi.

³⁰Shunday qilib, o‘n oltita kumush taglikka tayangan sakkizta romdan orqadagi devor qilindi, har bir rom ostiga qo‘yish uchun ikkitadan taglik qilindi.

³¹Muqaddas chodirning janub tomonidagi romlarni ushlab turish uchun akas yog‘ochidan beshta tamba,

³²shimol tomonidagi romlarni ushlab turish uchun ham beshta tamba, orqa tomoni — g‘arb tomonidagi romlarni ushlab turish uchun ham beshta tamba yasadilar.

³³Romlarning yarmigacha o‘rnashtirilgan o‘rtadagi tambalar chodirning boshidan oxirigacha cho‘zildi.

³⁴Romlarni oltin bilan qoplab, tambalarni ushlab tursin, deb oltin halqalarni romlarga birlashtirdilar [10], tambalarni ham oltin bilan qopladilar.

³⁵Mayin zig‘ir matosidan tikilgan ichki pardani [11] qildilar. Ko‘k, safsar va qirmizi iplar bilan karublar tasvirini mahorat bilan ishlatib, bu pardani bezatdilar.

³⁶Ichki parda ushlab turilishi uchun akas yog‘ochidan to‘rtta ustun yasadilar. Ustunlarga oltin qoplab, ularga oltin ilgaklarni mahkamladilar. Ustunlar uchun eritilgan kumushdan to‘rtta taglik yasadilar.

³⁷Chodirga kirish joyi uchun mayin zig‘ir matosidan tikilgan parda qildilar. Uni ko‘k, safsar va qirmizi iplardan mahorat bilan tikib bezatdilar.

³⁸Bu parda ushlab turilishi uchun beshta ustun yasadilar. Ustunlarning tepasini va halqalarini oltin bilan qopladilar. Ustunlarning beshta tagligini esa bronzadan qildilar.