Read O‘zbek tilidagi Muqaddas Kitob, 2013 Chiqish 37 Bible Online

Chiqish 37 - O‘zbek tilidagi Muqaddas Kitob, 2013 bible

Chiqish 37

¹Bazalilning ko‘rsatmasi bilan akas yog‘ochidan [1]sandiq [2] yasadilar. Sandiqning uzunligi ikki yarim tirsak, eni bir yarim tirsak, bo‘yi bir yarim tirsak [3] edi.

²Sandiqning ichkariyu tashqarisini toza oltin bilan qoplab, aylanasi bo‘ylab oltin gulchambar qildilar.

³Sandiq uchun eritilgan oltindan to‘rtta halqa yasab, to‘rtala oyog‘iga mahkamladilar: ikkita halqa bir tomonida, ikkita halqa ikkinchi tomonida edi.

⁴Keyin akas yog‘ochidan xodalar yasab, xodalarni oltin bilan qopladilar.

⁵Sandiqning ikkala tomonidagi halqadan sandiqni ko‘tarib yurish uchun xodalarni o‘tkazdilar.

⁶Toza oltindan sandiqning qopqog‘ini yasadilar. Bu qopqoqning uzunligi ikki yarim tirsak, eni bir yarim tirsak [4] edi.

⁷Shu bilan birga, oltindan ikkita karub yasadilar: ikkala karubni ham qopqoqning ikki chetiga zarb urib yasadilar.

⁸Bitta karub qopqoqning bir chetida, ikkinchi karub ikkinchi chetida bo‘lib, har ikkalasi qopqoq bilan bir butunni tashkil qildi.

⁹Karublarning tepaga ko‘tarilgan qanotlari qopqoqni berkitib turardi. Ular yuzma–yuz turib, qopqoqqa qaragan edi.

¹⁰Akas yog‘ochidan xontaxta [5] yasadilar. Xontaxtaning uzunligi ikki tirsak, eni bir tirsak, bo‘yi bir yarim tirsak [6] edi.

¹¹Xontaxtani toza oltin bilan qoplab, chetlariga aylantirib oltin gulchambar yasadilar.

¹²Yana xontaxtaning aylanasi bo‘ylab to‘rt enli qilib oltin bilan qoplangan taxta qilib, uni xontaxta oyoqlariga mahkamladilar. Oltin gulchambarni xontaxtaning aylanasi bo‘ylab taxta ustiga qildilar.

¹³[13-15] Yana eritilgan oltindan to‘rtta halqa yasab, har birini taxta mahkamlangan joyning yoniga — to‘rtala burchagidagi to‘rtala oyog‘iga o‘rnashtirdilar. Akas yog‘ochidan ikkita xoda yasab, ularni oltin bilan qopladilar. Bu xodalarni halqalardan o‘tkazib, xontaxtani ko‘tarib yurish uchun foydalanilar edi.

¹⁶Xontaxtaga qo‘yiladigan buyumlarni — lagan, piyolalar, sharob nazr qilish uchun kosa va ko‘zalarni toza oltindan yasadilar.

¹⁷Toza, zarb qilingan oltindan chiroqpoya [7] yasadilar. Butun chiroqpoyani va uning bezaklarini bir butun qilib yasadilar. Chiroqpoyaning tagligi, tanasi, kurtakli gulga o‘xshash shakldagi piyolalari bor edi.

¹⁸Yana chiroqpoyaning tanasidan oltita shoxcha chiqarildi: uchta shoxchasi bir yonidan, uchta shoxchasi ikkinchi yonidan chiqarildi.

¹⁹Chiroqpoyaning tanasidan chiqadigan shoxchalarning har birida kurtakli bodom guliga o‘xshash shakldagi uchta piyola bor edi.

²⁰Chiroqpoyaning tanasida kurtakli bodom guliga o‘xshash shakldagi to‘rtta piyola bor edi.

²¹Chiroqpoyaning tanasidan chiqadigan shoxchalarning har juftida bu kurtaklardan uchtasi birin–ketin tizilib turardi.

²²Chiroqpoyani shoxchalari va kurtaklari bilan bitta qilib zarb qilingan toza oltinning yaxlit bo‘lagidan yasadilar.

²³Chiroqpoyaga yettita moychiroq yasadilar. Moychiroqlarga qarab turishda foydalangani toza oltindan qisqichlar va patnislar yasadilar.

²⁴Chiroqpoya bilan uning hamma buyumlarini ikki pud [8] toza oltindan yasadilar.

²⁵Akas yog‘ochidan tutatqi qurbongohi [9] yasadilar. Qurbongoh to‘rtburchak bo‘lib, uzunligi bir tirsak, eni ham bir tirsak, bo‘yi esa ikki tirsak [10] edi. Qurbongohning shoxlari [11] o‘zidan yo‘nib chiqarildi.

²⁶Qurbongohning ustini, yon atrofini, shoxlarini toza oltin bilan qopladilar, aylanasi bo‘ylab oltindan gulchambar yasadilar.

²⁷[27-28] Qurbongohning ikki tomonidagi gulchambarning ostiga ikkita oltin halqa o‘rnashtirdilar. Akas yog‘ochidan ikkita xoda yasab, ularni oltin bilan qopladilar. Bu xodalarni halqalardan o‘tkazib, qurbongohni ko‘tarib yurish uchun foydalanilar edi.

²⁹Usta odam muqaddas qiladigan moy [12] va toza, xushbo‘y hidli tutatqi tayyorladi.