Read O‘zbek tilidagi Muqaddas Kitob, 2013 Chiqish 38 Bible Online

Chiqish 38 - O‘zbek tilidagi Muqaddas Kitob, 2013 bible

Chiqish 38

¹Akas yog‘ochidan [1] to‘rtburchak qilib kuydiriladigan qurbonlik uchun qurbongoh [2] yasadilar. Qurbongohning uzunligi besh tirsak, eni ham besh tirsak, bo‘yi uch tirsak [3] edi.

²Qurbongohning to‘rtala burchagiga o‘zidan yo‘nib chiqarilgan shox [4] yasadilar. Qurbongoh va uning shoxlarini bronza bilan qopladilar.

³Qurbongohning hamma buyumlari — qozonlarni, kuraklarni, tog‘orachalarni, sanchqilarni va olovkuraklarni bronzadan yasadilar.

⁴Qurbongohga bronzadan panjara yasadilar. Panjarani qurbongohning ichiga — o‘rnatilgan bo‘rtiqning ostida o‘rnatdilar, yarmigacha yetib bordi.

⁵Bronza panjaraning to‘rtala burchagiga xodalarni o‘tkazish uchun eritilgan bronzadan to‘rtta halqa yasadilar.

⁶Akas yog‘ochidan xodalar yasab, xodalarni bronza bilan qopladilar.

⁷Qurbongohni xodalar yordamida ko‘tarib yurish uchun qurbongoh yonlaridagi halqalarga xodalarni o‘tkazib qo‘ydilar. Qurbongohning chetlariga taxta qoqib, ichini bo‘sh qoldirdilar.

⁸Uchrashuv chodiriga kiraverishda xizmat qilgan ayollar [5] hadya qilgan bronza oynalardan [6] ular bronza qo‘lyuvgichni va uning tagligini yasadilar.

⁹So‘ngra Muqaddas chodirning hovlisini o‘rab tursin, deb pardadan to‘siq qildilar: to‘sib turadigan pardalarni mayin zig‘ir matosidan qildilar. Hovlining janub tomonidagi pardadan qilingan to‘siqning uzunligi yuz tirsak [7] edi.

¹⁰O‘sha to‘siqda yigirmata bronzadan qilingan taglikka yigirmata ustun o‘rnatilgan edi. Shu yerdagi pardalarni ushlab turish uchun ustunlarga kumushdan qilingan ilgaklar va halqalarni mahkamladilar.

¹¹Hovlining shimol tomonidagi pardadan qilingan to‘siqning uzunligi ham yuz tirsak, uning yigirmata ustuni va bronzadan qilingan tagligi bor edi. Uning pardalarini ushlab turish uchun ustunlariga ham kumushdan qilingan ilgaklar va halqalarni mahkamladilar.

¹²Hovlining g‘arb tomonidagi pardadan qilingan to‘siqning uzunligi ellik tirsak [8], uning o‘nta ustuni va tagligi bor edi. Uning pardalarini ushlab turish uchun ustunlariga ham kumushdan qilingan ilgaklar va halqalarni mahkamladilar.

¹³Hovlining sharq tomoni ellik tirsak kenglikda edi.

¹⁴[14-15] Hovlining kirish joyi shu yer edi. Kirishning o‘ng va chap tomonidagi pardadan qilingan to‘siqning uzunligi o‘n besh tirsakdan [9], har ikki tomonda uchtadan ustun va tagliklar bor edi.

¹⁶Hovlining hamma tomonidagi to‘sib turadigan pardalarni mayin zig‘ir matosidan qildilar,

¹⁷ustunlarning tagligini bronzadan, ilgaklari va halqalarini kumushdan qildilar. Ustunlarning tepasini kumush bilan qopladilar. Hovlining hamma ustunlarida kumush halqalar bor edi.

¹⁸Hovliga kirish joyi uchun parda qildilar. Uni mayin zig‘ir matosidan qilib, ko‘k, safsar va qirmizi iplardan mahorat bilan tikib bezatdilar. Bu pardaning eni yigirma tirsak [10], bo‘yi hovlining to‘sib turadigan pardalari kabi, besh tirsak [11] edi.

¹⁹Bu pardani to‘rtta taglikka o‘rnatilgan to‘rtta ustun tirab turdi. Ustunlarning tagligini bronzadan, ilgaklari va halqalarini kumushdan qildilar. Ustunlarning tepasini kumush bilan qopladilar.

²⁰Muqaddas chodirni va pardadan qilingan to‘siqni ushlab turadigan barcha qoziqni ham bronzadan qildilar.

²¹[21-23] Egamizning Musoga bergan amriga ko‘ra, Yahudo qabilasidan Urining o‘g‘li, Xurning nabirasi Bazalil hamma ishlarni bajarib bo‘ldi. Dan qabilasidan bo‘lgan Oxisamax o‘g‘li Oxoliyov uning yonida bo‘ldi. U hunarmand bo‘lib, ijod qilar, buyumlar yasay olardi, ko‘k, safsar, qirmizi iplardan foydalanib, mayin zig‘ir matosiga naqsh solishni bilardi. Musoning ixtiyoridagi ruhoniy Horunning o‘g‘li Itamar nazorati ostida Levi qabilasi ishda foydalanilgan oltin, kumush va bronzaning hisobini olib borgan edi. Muqaddas ahd chodirini [12] yasashda ishlatilgan oltin, kumush va bronza hisobi quyidagicha edi:

²⁴Chodir yasalishiga sarf qilingan oltinning jami 62,5 pud [13] edi. Xalq Egamizga nazr qilgan oltinning hisobi shuncha edi.

²⁵Sanab chiqilgan xalqdan yig‘ilgan kumushning [14] jami hisoblab chiqilganda, 211 pud [15] bo‘ldi.

²⁶Bu miqdor hisoblab chiqilgan yigirma va undan yuqori yoshdagi 603.550 odamning har biriga 1,25 misqoldan [16] to‘g‘ri kelardi.

²⁷210 pud kumush eritilib, chodirning romlari va ichki pardani ushlab turadigan ustunlar uchun 100 ta taglik qilishga ishlatildi, har bir taglik uchun 2,1 pud [17] kumush sarf qilindi.

²⁸Qolgan 1 pud [18] kumush hovli atrofidagi ustunlar uchun ilgaklar va halqalar yasashga, ustunlarning tepasini qoplashga ishlatildi.

²⁹Xalq Egamizga nazr qilgan bronzaning miqdori 151 pud [19] edi.

³⁰[30-31] Quyidagi ashyolarni yasashda o‘sha bronza ishlatildi: Uchrashuv chodiriga kiraverishdagi ustunlar uchun tagliklarni, bronza qurbongoh bilan uning bronza panjarasini, uning hamma buyumlarini, hovlining atrofidagi pardalarni ushlab turadigan ustunlar uchun tagliklarni, hovliga kiraverishdagi parda uchun tagliklarni, Muqaddas chodir bilan atrofdagi pardadan qilingan to‘siqni ushlab turadigan barcha qoziqni.