Read O‘zbek tilidagi Muqaddas Kitob, 2013 Chiqish 39 Bible Online

Chiqish 39 - O‘zbek tilidagi Muqaddas Kitob, 2013 bible

Chiqish 39

¹Ular ko‘k, safsar va qirmizi ipdan Muqaddas xonada xizmat qilganda kiyish uchun ruhoniylarga liboslarni ajoyib qilib tikdilar. Horunga muqaddas ruhoniylik liboslari tikishdi. Hammasini Egamiz Musoga amr etganday qildilar.

²Ular efodni [1] mayin zig‘ir matosidan qilib, ko‘k, safsar va qirmizi iplardan va oltindan qilingan ipdan unga naqsh soldilar.

³Oltinni yupqa qilib yoyib, ingichka–ingichka qilib kesib, oltin ip qilishdi. Ular mahoratlarini ishga solib ko‘k, safsar, qirmizi ipdan naqsh solingan mayin zig‘ir matosini bu oltin ip bilan bezatdilar.

⁴Efodning old va orqa qismlarini bir–biriga bog‘lash uchun ikkita yelka bog‘ichini qilib, ularni old va orqa qismlarining ustki chetiga tikdilar.

⁵Kamar yasab, uni efodga bog‘ladilar. Kamarni ham mayin zig‘ir matosidan qildilar. Unga ko‘k, safsar, qirmizi rangli iplardan va oltindan qilingan ipdan mahorat bilan naqsh soldilar. Hammasini Egamiz Musoga amr etganday qildilar.

⁶Keyin muhr o‘yganday qilib, Isroil o‘g‘illarining ismini ikkita aqiq toshga o‘yib yozdilar. Yozilgan toshlarni oltindan qilingan naqshli uyalar ichiga qo‘yib,

⁷Isroilning o‘n ikki qabilasini eslatib turish uchun efodning yelka bog‘ichlariga o‘rnashtirdilar. Hammasini Egamiz Musoga amr etganday qildilar.

⁸Ular ko‘krakpechni [2] yasadilar. Ko‘krakpechni, efod singari, mayin zig‘ir matosidan qilib, ko‘k, safsar va qirmizi iplardan va oltindan qilingan ipdan unga mahorat bilan naqsh soldilar.

⁹Ko‘krakpechni to‘rtburchak xalta shaklida, ikki buklangan, bo‘yi bir qarich, eniga ham bir qarich qilib yasadilar.

¹⁰Ko‘krakpechga to‘rt qator toshni [3] to‘g‘ri qilib terdilar: qizil yoqut, xrizolit va zumrad toshlarni birinchi qatorga terdilar.

¹¹Ikkinchi qatorga firuza, zangori yoqut va olmosni terdilar.

¹²Uchinchi qatorga lojuvard, agat va ametist toshlarni terdilar.

¹³To‘rtinchi qatorga topaz, aqiq va yashma toshlarni terdilar. Hamma toshlarni oltindan qilingan naqshli uyalarga o‘rnashtirdilar.

¹⁴Bu o‘n ikki tosh Isroilning o‘n ikki qabilasini eslatib turardi. Muhr o‘yganday qilib, Isroilning o‘n ikki o‘g‘lidan har birining ismini bu toshlarning har biriga o‘yib yozdilar.

¹⁵Ular ko‘krakpechni efodga bog‘lash uchun toza oltindan ipga o‘xshatib eshilgan ikkita zanjir yasadilar.

¹⁶Yana naqshli ikkita oltin uya va ikkita oltin halqa yasab, ikkala halqani ko‘krakpechning ustki burchaklariga mahkamladilar.

¹⁷Ikkala oltin zanjirning bir uchini ko‘krakpechdagi halqalarga bog‘lab,

¹⁸ikkinchi uchini naqshli oltin uyalarga mahkamladilar. Uyalarni efodning old tomonidagi yelka bog‘ichlariga o‘rnashtirdilar.

¹⁹[19-20] Yana oltindan to‘rtta halqa yasadilar. Ikkitasini ko‘krakpechning ostki burchaklariga — efodga yaqin bo‘lgan ichki qirg‘og‘iga mahkamladilar. Ikkitasini efodning old tomoniga, ikkala yelka bog‘ichining pastiga — naqshli kamar ustidagi joyga mahkamladilar.

²¹Ko‘krakpech efodning naqshli kamari ustida bo‘lsin, efoddan osilib turmasin, deb ko‘krakpechni halqalari yordamida efodning halqalariga ko‘k bog‘ich bilan mahkamladilar. Hammasini Egamiz Musoga amr etganday qildilar.

²²Efodning ridosini [4] ko‘k ipdan to‘qilgan matodan qildilar.

²³Ridoning o‘rtasidan bosh sig‘adigan teshik qildilar. Rido yirtilib ketmasligi uchun teshikning qirg‘og‘ini to‘qidilar.

²⁴[24-26] Rido etagining uchiga aylanasi bo‘ylab anor shaklini va qo‘ng‘iroqchalarni birin–ketin qilib bittama–bitta osib chiqdilar. Anor shakli yigirilgan ko‘k, safsar, qirmizi ipdan qilingan edi. Qo‘ng‘iroqchalar toza oltindan qilingan bo‘lib, anor shakli oralariga osilgan edi. Horun oliy ruhoniy bo‘lib xizmat qilganda, u shu ridoni kiyishi kerak edi. Hammasini Egamiz Musoga amr etganday qildilar.

²⁷Horun bilan uning o‘g‘illariga mayin zig‘ir matosidan ko‘ylaklarni,

²⁸sallani, peshanabog‘larni va ishtonlarni qildilar.

²⁹Belbog‘ini mayin zig‘ir matosidan qilib, ko‘k, safsar va qirmizi iplardan mahorat bilan tikib bezatdilar. Hammasini Egamiz Musoga amr etganday qildilar.

³⁰Toza oltindan lavhani — muqaddaslik ramzini yasadilar. Lavhaning yuzasiga muhr o‘yganday, “Egamizga bag‘ishlangan”, deb o‘yib yozdilar.

³¹Lavhani sallaga mahkamlash uchun ko‘k bog‘ichni lavhaga bog‘lab qo‘ydilar. Hammasini Egamiz Musoga amr etganday qildilar.

³²Shunday qilib, Uchrashuv chodiri — Muqaddas chodir yasalishiga oid hamma ishlar nihoyasiga yetdi. Isroil xalqi hammasini Egamiz Musoga amr etganday qildilar.

³³Keyin Musoning oldiga quyidagilardan iborat Muqaddas chodirni olib keldilar: chodirning ichki qavatini va uning hamma qismlarini — ilgaklarini, romlarini tambalarini, ustunlari va tagliklarini,

³⁴qizilga bo‘yalgan qo‘chqor terisidan yopinchiqni, yumshoq teridan [5] yopinchiq va Eng muqaddas xonani to‘sib turadigan ichki pardani,

³⁵ahd sandig‘ini [6], uning xodalari va qopqog‘ini,

³⁶xontaxtani, uning hamma buyumlarini va unga qo‘yiladigan muqaddas nonlarni [7],

³⁷toza oltindan qilingan chiroqpoya, unga o‘rnatilgan moychiroqlarni, uning hamma buyumlarini va moychiroqlar uchun zaytun moyini,

³⁸oltin tutatqi qurbongohini, muqaddas qiladigan moy [8] va xushbo‘y hidli tutatqini, chodirga kiraverishdagi pardani,

³⁹bronza qurbongohni, uning bronza panjarasini, xodalari va hamma buyumlarini, qo‘lyuvgichni va uning tagligini,

⁴⁰hovlini to‘sib turadigan pardalarni, ustunlarini, tagliklarini va hovliga kiraverishdagi pardani, chodir va hovli uchun qoziqlarni, arqonlarni, Muqaddas chodir — Uchrashuv chodirida foydalanadigan hamma ashyolarni,

⁴¹Muqaddas xonada xizmat qilganda kiyish uchun ruhoniylarga ajoyib qilib tikilgan liboslar — ruhoniy Horun va uning o‘g‘illari uchun muqaddas liboslarni.

⁴²Xullas, Isroil xalqi hammasini Egamiz Musoga amr etganday qildilar.

⁴³Muso qilingan hamma ishlarni ko‘zdan kechirdi, Isroil xalqi bu ishlarni Egamizning amri bo‘yicha qilganlarini ko‘rib, Muso ularni duo qildi.