Read O‘zbek tilidagi Muqaddas Kitob, 2013 Chiqish 40 Bible Online

Chiqish 40 - O‘zbek tilidagi Muqaddas Kitob, 2013 bible

Chiqish 40

¹Egamiz Musoga aytdi:

²“Birinchi oyning [1] birinchi kuni Uchrashuv chodirini — Muqaddas chodirni o‘rnattir.

³So‘ng ahd sandig‘i [2] chodirga olib kirilsin, sandiqni ichki parda [3] bilan to‘sdir.

⁴Keyin xontaxta olib kirilsin. Xontaxtaga tegishli ashyolarni uning ustiga joylashtir. Chiroqpoya ham olib kirilsin [4], chiroqpoyaga moychiroqlarni o‘rnashtir.

⁵Oltin tutatqi qurbongohini ahd sandig‘i oldiga qo‘ydir [5]. Muqaddas chodirga kiraverishda pardani osdir.

⁶Qurbonlik kuydiriladigan qurbongohni Uchrashuv chodiriga — Muqaddas chodirga kiraverishda o‘rnashtir.

⁷Qo‘lyuvgichni Uchrashuv chodiri bilan qurbongoh o‘rtasiga o‘rnashtirib, ichiga suv quydir.

⁸Chodir va qurbongohning atrofiga pardadan qilingan to‘siqni o‘rnashtirib, hovliga kiraverishdagi pardani osdir.

⁹Keyin muqaddas qiladigan moyni [6] olib, chodirga va uning hamma ashyolariga surtib chiqib, Menga bag‘ishla. Shunda chodir muqaddas bo‘ladi.

¹⁰Qurbonlik kuydiriladigan qurbongohga va uning hamma buyumlariga ham moy surtib, Menga bag‘ishla. Shunda qurbongoh g‘oyat muqaddas bo‘ladi.

¹¹Qo‘lyuvgichga va uning tagligiga ham moy surtib, Menga bag‘ishla.

¹²Horun bilan o‘g‘illarini Uchrashuv chodiri kiraverishiga olib kel. Hammalarini suv bilan yuv.

¹³So‘ng Horun ruhoniy bo‘lib, Menga xizmat qilishi uchun bag‘ishla: unga muqaddas ruhoniylik liboslarini kiygizib, moy surt.

¹⁴Shundan keyin Horunning o‘g‘illarini ham olib kelib, ularga ko‘ylak kiygiz.

¹⁵Otasiga moy surtganingday, ularga ham moy surt, toki ular ruhoniy bo‘lib, Menga xizmat qilishsin. Horun va uning o‘g‘illariga moy surtish bilan ularning o‘zlari ham, nasllari ham avlodlar osha Menga ruhoniy bo‘lib, xizmat qilishlari uchun sen ularga ijozat bergan bo‘lasan.”

¹⁶Muso Egamiz amr etgan hamma ishlarni bajarib bo‘ldi.

¹⁷[17-18] Ikkinchi yilning birinchi oyida [7], oyning birinchi kuni Muso Muqaddas chodirni o‘rnattirdi: u hamma tagliklarni joyiga qo‘ydirdi, romlarni o‘rnashtirib, tambalarni joylashtirdi, ustunlarni o‘rnashtirdi.

¹⁹So‘ngra chodirni tutib turadigan romlar ustiga choyshablar va qoplamalarni tashlatdi. Egamiz amr etganlarning hammasini Muso bajardi.

²⁰Keyin ahdning amr va qonunlari yozilgan ikkita tosh lavhani [8] olib, sandiqqa solib qo‘ydi. Xodalarni sandiq halqasidan o‘tkazgach, sandiqning qopqog‘ini sandiq ustiga o‘rnashtirdi.

²¹Sandiqni Muqaddas chodirga olib kirdi. Ichki pardani osib, ahd sandig‘ini to‘sdirib qo‘ydi. Egamiz amr etganlarning hammasini Muso bajardi.

²²Uchrashuv chodiriga — chodirning shimol tomoniga, ichki pardaning tashqarisiga xontaxtani qo‘ydirdi.

²³Xontaxta ustiga — Egamizning huzuriga muqaddas nonlarni [9] qo‘ydi. Egamiz amr etganlarning hammasini Muso bajardi.

²⁴Uchrashuv chodiriga — xontaxtaning ro‘parasiga, chodirning janub tomoniga chiroqpoyani qo‘ydirdi.

²⁵Egamizning huzuriga — chiroqpoyaga moychiroqlarni o‘rnashtirdi. Egamiz amr etganlarning hammasini Muso bajardi.

²⁶Uchrashuv chodiridagi ichki pardaning tashqarisiga oltin tutatqi qurbongohini qo‘ydirdi.

²⁷Qurbongohda xushbo‘y hidli tutatqi tutattirdi. Egamiz amr etganlarning hammasini Muso bajardi.

²⁸Muqaddas chodirga kiraverishda pardani osdirdi.

²⁹Uchrashuv chodiriga — Muqaddas chodirga kiraverishda qurbonlik kuydiriladigan qurbongohni o‘rnashtirdi. So‘ng qurbonlik bilan don nazri [10] keltirib, qurbongohda kuydirdi. Egamiz amr etganlarning hammasini Muso bajardi.

³⁰Uchrashuv chodiri bilan qurbongoh o‘rtasiga qo‘lyuvgichni o‘rnashtirib, yuvinish uchun ichiga suv quydirdi.

³¹[31-32] Muso, Horun va Horunning o‘g‘illari Uchrashuv chodiriga kirganlarida yoki qurbongohda nazrlarni kuydirganlarida, qo‘lyuvgichdagi suv bilan oyoq–qo‘llarini yuvishardi. Egamiz amr etganlarning hammasini Muso bajardi.

³³So‘ngra Muso chodir bilan qurbongohning atrofiga pardadan qilingan to‘siqni o‘rnashtirib, hovliga kiraverishda pardani osdirdi. Shunday qilib, Muso ishini tugatdi.

³⁴[34-35] Keyin Uchrashuv chodirini — Muqaddas chodirni bulut qopladi, Egamiz ulug‘vorligi bilan zohir bo‘lib chodirni to‘ldirdi. Shuning uchun Muso chodirga kira olmadi.

³⁶Chodirdan bulut ko‘tarilganda, Isroil xalqi har bir to‘xtagan joyidan yo‘lga chiqib sayohatini davom ettirardi.

³⁷Bulut ko‘tarilmasdan, to bulut ko‘tariladigan kun kelmaguncha, ular yo‘lga chiqishmasdi.

³⁸Shunday qilib, Isroil xalqi butun sayohatlari davomida kunduzi Muqaddas chodir ustida Egamiz zohir bo‘ladigan bulutni, kechasi chodir tepasidagi bulut ichida yonayotgan alangani ko‘rardilar.