Read O‘zbek tilidagi Muqaddas Kitob, 2013 Chiqish 6 Bible Online

Chiqish 6 - O‘zbek tilidagi Muqaddas Kitob, 2013 bible

Chiqish 6

¹Shundan so‘ng Egamiz Musoga aytdi: — Fir’avnni nima qilishimni endi ko‘rasan. U qudratli kuchimni ko‘rgandan keyin, xalqim ketishiga ijozat beribgina qolmaydi, hatto xalqimni o‘z yurtidan quvlab yuboradi.

²Xudo Musoga yana dedi: — Men Egangizman.

³— Ibrohimga, Is’hoqqa va Yoqubga Men Qodir Xudo bo‘lib O‘zimni zohir qildim [1]. Ammo ularga Men, ularning Egasi, deb tanilmagan edim [2].

⁴Ular Kan’on yurtida musofir bo‘lib yashagan edilar. O‘sha yurtni sizlarga beraman, deb ular bilan ahd qildim [3].

⁵Misrliklar qul qilgan Isroil xalqining faryodini aniq eshitdim. Men o‘sha ahdimni yodimda tutaman.

⁶Shunday qilib, bu to‘g‘rida Isroil xalqiga Mening shu gapimni yetkaz: “Men Egangizman. Men sizlarni Misrliklarning zulmidan ozod qilaman, qullikdan olib chiqaman. Qudratli kuchim va hukmning buyuk ishlari bilan sizlarni qullikdan ozod qilaman.

⁷Men sizlarni O‘zimning xalqim qilaman, Men sizlarning Xudoyingiz bo‘laman. Sizlarni Misrliklarning zulmidan xalos qilgan Egangiz Xudo Men ekanligimni o‘shanda bilib olasizlar.

⁸Men Ibrohimga, Is’hoqqa va Yoqubga ont ichib, beraman, degan yurtga sizlarni olib boraman. O‘sha yurtni sizlarga mulk qilib beraman. Men Egangizman.”

⁹Muso bu gaplarni Isroil xalqiga aytgan edi, ammo xalq uning gaplariga quloq solmadi. Chunki xalq og‘ir zulm ostida qolib, ruhan tushkunlikka tushgan edi.

¹⁰Shundan keyin Egamiz Musoga aytdi:

¹¹— Misr fir’avni huzuriga borib ayt: Isroil xalqi Misrdan chiqib ketishiga ijozat bersin.

¹²— Gapimga Isroil xalqi quloq solmadi–yu, fir’avn quloq solarmidi?! — dedi Muso. — Qolaversa, yaxshi gapira olmayman–ku!

¹³Ammo Egamiz Muso bilan Horunga amr qildi: “Misr fir’avni oldiga qaytib boringlar. Isroil xalqi Misrdan ketishiga ijozat bering, deb talab qilinglar.”

¹⁴Ba’zi Isroil qabilalarining urug‘boshilari quyidagilardir: Yoqubning [4] to‘ng‘ich o‘g‘li Ruben nasliga Xano‘x, Palluv, Xazron va Karmi kiradi. Ularning nasli Ruben urug‘lari edi.

¹⁵Shimo‘nning nasliga Yamuvol, Yomin, Oxad, Yoxin, Zo‘xar va Kan’onlik ayoldan tug‘ilgan o‘g‘li Shovul kiradi. Ularning nasli Shimo‘n urug‘lari edi.

¹⁶Levi nasliga Gershon, Qohot va Marori kiradi. Levi 137 yil yashadi. Bu nasldan kelib chiqqan urug‘lar quyidagilardir:

¹⁷Gershonning nasliga Lubnax va Shimax kiradi, ularning har biri urug‘boshilardir.

¹⁸Qohotning nasliga Imrom, Izxor, Xevron va Uziyol kiradi. Qohot 133 yil yashadi.

¹⁹Marorining nasliga Maxli va Mushi kiradi. Yuqoridagi ro‘yxat Levi nasli va ularning urug‘larinikidir.

²⁰Imrom o‘zining ammasi Yo‘xavadga uylandi. Imrom xotinidan Horun va Musoni ko‘rdi. Imrom 137 yil yashadi.

²¹Izxorning nasli Ko‘rax, Nafax va Zixridir.

²²Uziyolning nasli Mishail, Elzafan va Sitridir.

²³Horun Elishbaga uylandi. U Ominadovning qizi, Naxsho‘nning singlisidir. Horun xotinidan Nadov, Abihu, Elazar va Itamarni ko‘rdi.

²⁴Ko‘raxning nasli Aser, Elqana va Abuasafdir. Ularning nasli Ko‘rax urug‘lariga asos soldi.

²⁵Horunning o‘g‘li Elazar Futiyolning qizlaridan biriga uylandi. Elazar xotinidan Finxazni ko‘rdi. Urug‘lari bo‘yicha Levi qabilasining urug‘boshilari ana shulardir.

²⁶Yuqorida aytib o‘tilgan Horun va Musoga Egamiz: “Isroilning har bir oilasi va qabilasini Misrdan olib chiqinglar!” deb amr berdi.

²⁷Ular: “Isroil xalqini ozod qiling”, deb Misr fir’avniga buyruq berdilar.

²⁸Shunday qilib, Egamiz Muso bilan Misrda gaplashganda,

²⁹unga: “Men Egangizman, senga aytganlarimning hammasini Misr fir’avniga yetkaz!” deb amr bergan edi.

³⁰Muso esa Egamizning oldida: “Men yaxshi gapira olmayman–ku! Fir’avn mening gapimga quloq solmaydi!” degan edi.