Read O‘zbek tilidagi Muqaddas Kitob, 2013 Chiqish 7 Bible Online

Chiqish 7 - O‘zbek tilidagi Muqaddas Kitob, 2013 bible

Chiqish 7

¹Egamiz Musoga aytdi: — Qarab tur, akang Horunni sening o‘rningga gapiradigan qilaman. Seni fir’avnning ko‘zi oldida Xudo singari — Menday qilib qo‘yaman. Horun sening payg‘ambaring bo‘lib, gaplaringni fir’avnga yetkazadi.

²Men senga aytgan hamma amrlarni akangga ayt. Isroil xalqi Misrdan chiqib ketishi uchun ijozat ber, deb Horun fir’avnga aytadi.

³Lekin Men alomatu mo‘jizalarimni Misr yurtida ko‘rsatay, deb fir’avnning yuragini tosh qilib qo‘yaman.

⁴Fir’avn sizlarning gapingizga quloq solmaydi. O‘shanda Men Misrga qarshi qo‘l ko‘tarib, unga ko‘p kulfatlar keltiraman. Keyin hukmning qudratli ishlari bilan Isroil oilalarini va qabilalarini olib chiqaman.

⁵Misrga qarshi qo‘l ko‘tarib, Isroil xalqini Misrliklarning orasidan olib chiqqanimda, Egangiz Men ekanligimni Misr xalqi bilib oladi.

⁶Muso bilan Horun Egamizning amriga binoan ish tutdilar.

⁷Ular fir’avn bilan gaplashganlarida, Muso sakson yoshda, Horun sakson uch yoshda edi.

⁸Egamiz Muso bilan Horunga gapirdi:

⁹— Fir’avn sizlarga: “Birorta ajoyibot ko‘rsatinglar–chi”, deb aytsa, Horunga buyur, tayoqni olib, fir’avnning oldiga tashlasin. Tayoq ilonga aylanib qoladi.

¹⁰Shunday qilib, Muso bilan Horun fir’avn huzuriga bordilar. Egamiz amr etganday ish tutdilar: Horun tayog‘ini fir’avn va uning a’yonlari oldiga tashlagan edi, tayoq o‘sha zahoti ilonga aylanib qoldi.

¹¹Shunda fir’avn ham o‘zining sehrgarlarini — donishmandlarini va folbinlarini chaqirdi. Misr sehrgarlari sehr–jodularini ishlatib, o‘shanaqa mo‘jiza ko‘rsatdilar.

¹²Har biri tayog‘ini yerga tashlagan edi, tayoq ilonga aylanib qoldi. Horunning iloni Misr sehrgarlarining ilonlarini yutib yubordi.

¹³Egamiz aytganday, baribir, fir’avnning yuragi toshligicha qolib, Muso bilan Horunning gapiga quloq solmadi.

¹⁴Shundan keyin Egamiz Musoga aytdi: “Baribir, fir’avnning yuragi toshligicha qolib, xalqimning ketishiga ijozat berishni istamayapti.

¹⁵Ertaga ertalab fir’avnning oldiga bor. U daryoga boradi. Sen uni daryo bo‘yida kutib tur. Ilonga aylangan tayog‘ing qo‘lingda bo‘lsin.

¹⁶Fir’avnga shunday deb ayt: — Ibroniylarning Xudosi — Egamiz meni sening huzuringga shu gapni aytgani yubordi. Egamizning gapi shunday: “Mening xalqimga ijozat ber, ular sahroga borib, Menga sajda qilishsin.” Sen hamon Egamizning gapiga quloq solmayapsan.

¹⁷Egamiz shunday aytmoqda: “Isroil xalqining Egasi Men ekanligimni endi bilib olasan.” Qo‘limdagi mana bu tayoqni Nil daryosining suviga urganimda, suv qonga aylanadi.

¹⁸Daryodagi baliqlar nobud bo‘ladi. Daryo sasib ketadi. Misr xalqi daryo suvini icholmaydi.”

¹⁹So‘ngra Egamiz Musoga shunday dedi: — Horunga ayt, tayoqni qo‘liga olib, Misr suvlari tomonga — Misrdagi daryolar, anhorlar, ko‘llar, hamma suv havzalari tomonga uzatsin. Misrdagi hamma joylarda suv qonga aylanadi, hatto butun Misr yurtidagi yog‘och va tosh idishlardagi suvlar ham qonga aylanadi.

²⁰Shunday qilib, Muso bilan Horun Egamiz amr etganday qilishdi: Horun fir’avn va uning a’yonlari ko‘zi oldida tayog‘ini ko‘tarib daryo suviga urgan edi, shu zahoti daryo suvi qonga aylanib qoldi.

²¹Daryodagi baliqlar nobud bo‘lib, daryo suvi sasib ketdi. Misr xalqi daryo suvini icholmay qoldi. Misrning hamma yeri qonga to‘lib ketdi.

²²Misr sehrgarlari ham sehr–jodularini ishlatib, xuddi o‘shanday qildilar. Egamiz aytganday, baribir, fir’avnning yuragi toshligicha qolib, Muso bilan Horunning gapiga quloq solmadi.

²³Bo‘lib o‘tgan mo‘jizadan fir’avnning yuragi qilt etmasdan, saroyiga qaytdi.

²⁴Daryo suvini ichib bo‘lmagani sababli, Misr xalqi ichimlik suvi topish uchun daryo yaqinida quduqlar kovlay boshladilar.

²⁵Egamiz Nil daryosi suviga urgandan keyin yetti kun davomida suv qon bo‘lib oqaverdi.