Read O‘zbek tilidagi Muqaddas Kitob, 2013 Ayub 10 Bible Online

Ayub 10 - O‘zbek tilidagi Muqaddas Kitob, 2013 bible

Ayub 10

¹Hayotdan to‘ydim! Evoh, endi bemalol shikoyat qilishdan, Alam–hasrat bilan gapirishdan o‘zimni tiymayman.

²Xudoga shunday deyman: “Meni hukm qilavermasdan, Menga qarshi bo‘lgan da’volaringni ayt.

³Meni ezishdan Senga biror foyda bormi o‘zi? Fosiqlarga shodlik bilan farovonlik beryapsan–u, Nima uchun meni — O‘z qo‘llaring ijodini rad etyapsan?!

⁴Sening insonnikiga o‘xshash ko‘zlaring bormi?! Sening dunyoqarashing insonlarniki bilan birmi?!

⁵Umring inson umriday qisqami?! Yillaring inson hayoti yillariday emas–ku!

⁶Nima uchun mendan ayb qidirasan, Gunoh topishga harakat qilasan?

⁷Axir, O‘zing bilasan, men aybsizman, Hech kim meni Sening qo‘lingdan qutqara olmaydi.

⁸Axir, qo‘llaring bilan meni O‘zing yasagansan, O‘zing meni yaratgansan, Endi esa meni butunlay halok qilmoqchisan.

⁹Sen meni loydan bunyod qilganingni eslagin. Endi meni yana tuproqqa qaytarmoqchimisan?!

¹⁰Meni sutday quyib, Pishloqday qotirgan O‘zing–ku.

¹¹Sen O‘zing meni etu teri bilan qoplab, Menga suyagu paylar ato qilding.

¹²Sen menga hayot bag‘ishlab, sadoqatli sevgingni ko‘rsatding. O‘zing g‘amxo‘rlik qilib, hayotimni saqlading.

¹³Lekin yuragingda boshqa bir niyat bor edi. Sening o‘y–xayollaringni bilaman:

¹⁴Gunoh qilsam, meni kuzatib turgan bo‘lasan, Aybimni jazosiz qoldirmaysan.

¹⁵Fosiq bo‘lsam, o‘zimdan ko‘ray! Ammo aybsiz bo‘lsam ham, Shunchalik uyatga qoldimki, Shunchalik qayg‘uga botdimki, Boshimni ko‘tara olmayapman.

¹⁶Boshimni ko‘tarsam, sherday meni poylaysan, O‘z buyuk qudratingni menga qarshi ishlatasan.

¹⁷Menga qarshi yangi guvohlar chaqiraverasan. Menga bo‘lgan g‘azabing yanada oshib boraveradi, Ustimga yana yangi qo‘shinlar bostirib kelaveradilar.

¹⁸Evoh, nima uchun meni bu dunyoga keltirding? Qaniydi, tug‘ilishim bilanoq, Birov meni ko‘rib ulgurmasdan, O‘lib qo‘ya qolganimda edi.

¹⁹Hech narsa ko‘rmagan bo‘lardim, Onam qornidan to‘g‘ri qabrga borgan bo‘lardim.

²⁰Hayotim qisqa, kunlarim sanoqli emasmi, axir?! Meni tinch qo‘y, ozgina bo‘lsa ham, xursand bo‘lay.

²¹Hech kim qaytib kelmaydigan zulmat yurtiga, Tim qorong‘i yerga borishimdan oldin ozgina quvonay.

²²Tun yarmidagi zulmatday qorong‘i bo‘lgan yurtga ketaman. Qop–qorong‘u, hech bir tartib bo‘lmagan bir joyga, Hatto nuri ham zulmat bo‘lgan yerga ketaman, axir!