Read O‘zbek tilidagi Muqaddas Kitob, 2013 Ayub 11 Bible Online

Ayub 11 - O‘zbek tilidagi Muqaddas Kitob, 2013 bible

Ayub 11

¹Keyin namaxlik Zo‘far shunday dedi:

²“Shuncha ko‘p gap javobsiz qolaveradimi? Ko‘p gapirgan inson oqlanar ekanmi?

³Bekorchi gaplaring boshqalarning ovozini o‘chirib qo‘ydimi? Nahotki mazax qilib aytgan gaplaring uchun hech kim seni uyaltirmasa?

⁴Sen: “Mening ta’limotim xatosiz, O‘zim ham Xudoning nazarida pokman”, deb aytasan.

⁵Qani endi, Xudo gapirsa, Uning O‘zi senga qarshi og‘iz ochsa edi.

⁶Qani endi, U senga donolikning sirlarini bildirsa edi. Axir, haqiqiy donolik ko‘p qirrali–ku! Bilib qo‘y, Xudo seni o‘z gunohlaringga yarasha jazolagani yo‘q, Jazoni ancha kam beryapti.

⁷Xo‘sh, Xudoning sirlarini anglay olasanmi?! Qodir Xudoning kamolotini bila olasanmi?!

⁸Xudoning donoligi osmondan ham yuksakdir, Sen nima qila olarding?! Xudoning donoligi o‘liklar diyoridan ham chuqurroqdir, Sen nimani bila olarding?!

⁹Uning o‘lchami yer tevaragidan ham uzunroq, Dengizdan ham kengroqdir.

¹⁰Xudo kelib, seni qamoqqa tashlasa, Yoki hammani hukmga yig‘sa, Kim Uni to‘xtata olardi?

¹¹Albatta U yolg‘onchilarni biladi, Yovuzlikni ko‘rganda, e’tiborga oladi–ku!

¹²Asov eshakdan odam tug‘ilmaganday, Nodon ham donolikka erisha olmaydi.

¹³O‘z yuragingni Xudoga bag‘ishla, Ibodat qilib, qo‘llaringni U tomon cho‘zgin.

¹⁴Qo‘llaring gunohdan bulg‘angan bo‘lsa, poklagin, Chodiringda yovuzlikka joy bermagin.

¹⁵Shunda sen uyalmasdan boshingni tik ko‘tarib yurasan. Qo‘rquvdan holi bo‘lib, barqaror turasan.

¹⁶Qayg‘ularingni esdan chiqarasan, Ular oqib ketgan suvlarday bo‘lib qoladi.

¹⁷Hayoting kunduzgi nurday yorug‘ bo‘ladi, Har qanday zulmat tongday bo‘lib qoladi.

¹⁸Umiding borligi uchun, ishonching komil bo‘ladi, Atrofingda himoyang bo‘lib, tinchlikda orom olasan.

¹⁹Yotganingda hech kimdan qo‘rqmaydigan bo‘lasan, Hamma sendan marhamat istab keladi.

²⁰Fosiqlarning ko‘z nuri so‘nadi, Ular qochishga yo‘l topolmaydilar, O‘lib qutulamiz, deb umid qiladilar.