Read O‘zbek tilidagi Muqaddas Kitob, 2013 Ayub 13 Bible Online

Ayub 13 - O‘zbek tilidagi Muqaddas Kitob, 2013 bible

Ayub 13

¹“Bularning hammasini o‘z ko‘zlarim bilan ko‘rganman. O‘z qulog‘im bilan eshitib, anglab olganman.

²Sizlar bilganlarni men ham bilaman, Sizlar mendan ustun emassizlar.

³Qani endi, Qodir Xudo bilan gaplasha olsam! Xudoga o‘z da’voimni bildirishni xohlayman.

⁴Sizlar esa yolg‘onlar to‘qiysizlar, Hech foyda keltirmaydigan shifokordaysizlar.

⁵Qaniydi, jim o‘tirsangiz, Ana o‘shanda dono ish qilgan bo‘lardingiz.

⁶Endi mening arzimga quloq solinglar, Shikoyatlarimga diqqat qilinglar.

⁷Yolg‘on so‘zlaringiz, nohaq gaplaringiz bilan Xudoni himoya qilyapmiz, deb o‘ylayapsizlarmi?!

⁸Xudoning tarafini olib, Unga yon bosasizlarmi?! Sizlar Xudoning da’vosini himoya qilasizmi?!

⁹Qilayotganlaringizni U tekshirib ko‘rsa, yaxshi bo‘ladimi? Yoki insonni aldaganday Uni ham aldaysizlarmi?!

¹⁰Agar hatto xayolingizda ham tarafkashlik qilsangiz, U sizlarga albatta tanbeh beradi.

¹¹Uning ulug‘vorligi yuragingizga vahima solmaydimi?! Undan qo‘rqib, dahshatga tushmaysizmi?!

¹²Sizlarning gapingiz kulday foydasiz, Himoyangiz loy idishday kuchsizdir.

¹³Endi jim bo‘linglar! Men gapiray. Mayli, keyin nima bo‘lsa, bo‘lsin.

¹⁴Jonimni xavf ostiga qo‘yib bo‘lsa ham, Ichimdagilarni aytaman.

¹⁵Mayli, U meni o‘ldirsin. Boshqa umidim yo‘q–ku! O‘z ishlarimni Uning oldida himoya qilaman.

¹⁶Uning oldiga borishga jur’at qilganim mening najotim bo‘ladi, Axir, hech bir Xudosiz odam Xudoning oldiga bora olmaydi–ku!

¹⁷Mening so‘zlarimga quloq solinglar, Gaplarim quloqlaringizga kirsin.

¹⁸Men o‘z arzimni tayyorlab qo‘ydim, Bilaman, aybsizligim isbot bo‘ladi.

¹⁹Xo‘sh, kim men bilan bahslashadi? Agar meni aybdor, deb topsangiz, Ovozimni o‘chiraman–u o‘laman.

²⁰Sendan ikki narsa so‘rayman, ey, Xudo, Shuni qilsang yuzimni Sendan yashirmayman.

²¹Endi qiynoqlaringni bas qilgin, Vahimang bilan meni qo‘rquvga solma.

²²Shundan keyin meni chaqir, javob beraman, Yoki men gapiray, Sen esa menga javob ber.

²³Mening qancha gunohu ayblarim bor ekan? Itoatsizliklarimni, gunohlarimni bildirgin menga.

²⁴Nima uchun mendan yuz o‘girasan, Meni, O‘z dushmaning, deb hisoblaysan?

²⁵U yoqdan–bu yoqqa uchib yurgan bargni qo‘rqitasanmi, Quruq somonni ta’qib qilasanmi?

²⁶Menga qarshi achchiq ayblar keltiryapsan, Yoshligimdagi gunohlarimni eslatyapsan.

²⁷Oyoqlarimni kishanlab, Yurgan yo‘llarimni poylaysan, Hatto har bir qadamimni o‘lchaysan.

²⁸Evoh, inson chirik narsaday, Kuya yegan kiyimday yo‘q bo‘lib ketadi.”