Read O‘zbek tilidagi Muqaddas Kitob, 2013 Ayub 14 Bible Online

Ayub 14 - O‘zbek tilidagi Muqaddas Kitob, 2013 bible

Ayub 14

¹“Ayol zotidan tug‘ilgan insonning Umri qisqa, hayoti qayg‘uga to‘la bo‘ladi.

²U gul singari ochiladi–yu, yana so‘lib qoladi. Soyaday tez o‘tib ketadi, ko‘pga chidamaydi.

³Ey Xudo! Shunday insonga nazar tashlaysanmi? Meni hukm qilish uchun O‘z oldingga olib kelasanmi?

⁴Kim halolni harom ichidan chiqara oladi?! Hech kim.

⁵Sen inson hayotining kunlarini sanab qo‘ygansan, Necha oy yashashini ham bilasan. Inson Sen belgilagan chegaralardan o‘tolmaydi.

⁶Uni tinch qo‘y, dam olsin. Mardikorlarga o‘xshab, kunlik ishini tinchgina bitirsin.

⁷Hatto daraxtning ham umidi bor, Agar u kesib tashlansa, yana o‘saveradi, Daraxtning novdalari o‘sishdan to‘xtamaydi.

⁸Uning ildizlari qarib, To‘nkasi chiriy boshlasa,

⁹Hatto suvning hidini sezsa ham yana yashnashi mumkin. Navnihol ko‘chatday yana novdalari ko‘karishi mumkin.

¹⁰Lekin inson o‘lganda bor kuchidan ayriladi, Oxirgi nafasini chiqaradi–yu, yo‘q bo‘lib ketadi!

¹¹Suv dengizdan bug‘lanib chiqib ketganday Daryo qurib, yo‘q bo‘lib ketganday,

¹²Inson ham yotadi–yu, qaytib turmaydi. Osmon yo‘q bo‘lmaguncha, u uyg‘onmaydi. O‘lim uyqusidan uni hech kim turg‘iza olmaydi.

¹³Ey Xudo, qani endi, meni o‘liklar diyoriga yuborsang, G‘azabing bosilguncha meni yashirib qo‘ysang, Men uchun bir vaqt tayinlab, keyin meni yodga olsang.

¹⁴Inson o‘lsa, u yana tiriladimi? Agar shunday bo‘lsa, ozod bo‘lgunimcha Barcha qiyinchiliklarga chidab berardim.

¹⁵Meni chaqirsang, Senga javob bergan bo‘lardim. Menga, O‘z qo‘ling bilan yaratganga muntazir bo‘larding.

¹⁶Shunda Sen qadamlarimni o‘lcharding–u, Gunohlarimni hisobga olmasding.

¹⁷Ayblarimni xurjunga solib, bog‘lab qo‘yganday bo‘larding. Fosiqligimni o‘chirib, ustidan oqlab tashlaganday bo‘larding.

¹⁸Ammo tog‘lar qulab, maydalanib ketadi, Qoyalar o‘z joyidan suriladi,

¹⁹Suv toshlarni yemiradi, Toshqin suvlar yerni yuvib ketadi. Xuddi shu singari Sen ham Insonning umidini yo‘qqa chiqarasan.

²⁰Sen insonni butunlay mag‘lub qilasan, Inson olamdan o‘tib ketadi. O‘lganda yuzini o‘zgartirib, jo‘natib yuborasan.

²¹Farzandlari hurmatga sazovor bo‘lsalar ham, Pastga urilsalar ham u bilmaydi.

²²Inson faqat o‘z tanasidagi og‘riqni sezadi, Faqat o‘zi uchun qayg‘uradi.”