Read O‘zbek tilidagi Muqaddas Kitob, 2013 Ayub 16 Bible Online

Ayub 16 - O‘zbek tilidagi Muqaddas Kitob, 2013 bible

Ayub 16

¹Ayub shunday javob berdi:

²“Men bunday narsalarni ko‘p eshitganman, Qanday noshud yupatuvchisizlar–a!

³Bu behuda gaplarning oxiri bormi o‘zi?! Shunday gapirishga sizlarni nima undaydi?!

⁴Agar sizlar mening o‘rnimda bo‘lganingizda edi, Men ham sizlarday gapirsam bo‘lardi. Boshimni chayqab, Sizlarga qarshi chiroyli so‘zlar aytsam bo‘lardi.

⁵Ammo men so‘zlarim bilan sizlarga dalda bergan bo‘lardim. Gaplarim bilan dardingizni yengillashtirardim.

⁶Hozir esa, gapirsam ham dardim yengillashmaydi, Gapirmasam ham azoblarim kamaymaydi.

⁷Ey, Xudo, Sen meni ezib yubording, Butun oilamni vayron qilding.

⁸Yuzimni ajinlar bilan to‘ldirib tashlading. Bular menga qarshi guvoh bo‘ladi. Ozg‘inligim ham ko‘zga tashlanib, Menga qarshi guvohlik beradi.

⁹Xudo g‘azab bilan ortimdan quvib, Meni ezib tashladi. Tishlarini g‘ichirlatib, Ko‘zlari bilan teshadi.

¹⁰Meni ko‘rib, odamlarning og‘zilari ochilib qoldi, Ular meni mazax qilib, yuzimga urdilar. To‘dalashib, menga qarshi chiqish uchun yig‘ildilar.

¹¹Xudo meni betavfiqlar ixtiyoriga tashladi, Fosiqlarning qo‘liga berib qo‘ydi.

¹²Men tinchgina yashayotgan edim, U meni parchalab tashladi, Bo‘ynimdan ushlab, meni ezdi. Keyin esa Xudo meni nishon qilib,

¹³O‘z kamonlari bilan o‘rab oldi. Rahm–shafqat qilmay, O‘qlari bilan meni ilma–teshik qilib tashladi. Ichak–chovoqlarim yerga to‘kildi.

¹⁴Xudo qayta–qayta menga hujum qildi, Mening ustimga jangchiday bostirib keldi.

¹⁵Qayg‘u–alamdan qanorga burkandim, Qanor xuddi terimga qo‘shib to‘qilganday bo‘lib qoldi, G‘ururim poymol bo‘ldi.

¹⁶Nolayu faryoddan yuzim qizarib, Qovoqlarim qorayib ketgan.

¹⁷Lekin qo‘llarim yovuzlikdan uzoq, Ibodatlarim pokdir.

¹⁸Ey tuproq, mening qonimni yashirma, Mening faryodim yo‘qolib ketmasin.

¹⁹Mana, hozir mening guvohim samodadir, Mening himoyachim yuksakda o‘tiribdi.

²⁰Do‘stlarim meni mazax qilyapti, Men esa Xudo oldida ko‘z yosh to‘kaman.

²¹Qani endi birontasi O‘z yaqini uchun Xudoga iltijo qilganday, Men uchun ham Xudoga yolvorsa.

²²Chunki men ko‘p vaqt o‘tmay Borsa kelmas joyga ketaman.