Read O‘zbek tilidagi Muqaddas Kitob, 2013 Ayub 17 Bible Online

Ayub 17 - O‘zbek tilidagi Muqaddas Kitob, 2013 bible

Ayub 17

¹Ruhim tushgan, umrim oz qolgan, Qabr meni kutib turibdi.

²Mazax qiluvchilar atrofimni o‘rab olgan. Adovatlarini o‘z ko‘zlarim bilan ko‘rib turibman.

³Ey Xudo, O‘zing meni kafillikka olgin. Axir, yana kim bor meni qo‘llaydigan?

⁴Sen do‘stlarimning ongini aql–zakovat uchun yopib qo‘ygansan, Shuning uchun ularning ustun bo‘lishlariga yo‘l bermaysan.

⁵Ular o‘z foydasini ko‘zlab, do‘stlariga xiyonat qiladilar. Shundaylarning farzandlari ko‘r bo‘lsin.

⁶Xudo meni odamlar orasida kulgi qilib qo‘ydi, Ular yuzimga tupurishadi.

⁷Qayg‘udan ko‘zlarim xiralashgan, A’zoi badanim zaiflashib, qoq suyak bo‘lib qolgan.

⁸O‘zini pokdil deb bilganlar meni ko‘rib ajablanyaptilar, Ular meni ikkiyuzlamachi deb o‘ylayaptilar. O‘zini aybsiz deb bilganlar mendan g‘azablanyaptilar.

⁹Ammo shunga qaramay solih odam o‘z yo‘lida yuraveradi, Qo‘li pok bo‘lgan kuchayib ketaveradi.

¹⁰Qani endi sizlar kelinglar–chi?! Orangizdan birorta dono insonni topa olarmikanman?!

¹¹Mana kunlarim o‘tib ketdi, Rejalarim ham barbod bo‘ldi, Ko‘nglimdagi orzularim puchga chiqdi.

¹²Do‘stlarim tunni kun, deyishadi, Atrofi qop–qorong‘u, Lekin ular, yorug‘lik yaqin, deb turib olishgan.

¹³Xo‘sh, agar o‘liklar diyori mening uyim bo‘lsa, To‘shagimni zulmatda yozsam,

¹⁴Qabrga, sen otamsan, desam, Qurt–qumursqalarni, onamsiz, opa–singillarimsiz, desam,

¹⁵Men umidli odam bo‘lamanmi? Meni, umidi bor, deb kim aytadi?!

¹⁶Nahotki o‘liklar diyorida umid bo‘lsa?! Yo‘q, tuproqda yotganimda umid bo‘lmaydi.