Read O‘zbek tilidagi Muqaddas Kitob, 2013 Ayub 18 Bible Online

Ayub 18 - O‘zbek tilidagi Muqaddas Kitob, 2013 bible

Ayub 18

¹Shunda shuvaxlik Bildad javob berdi:

²“Qachongacha valdirayverasan–a?! Gapingni o‘ylab gapirgin, keyin suhbatlashamiz.

³Nima, bizni mol, deb o‘ylayapsanmi? Yoki bizni go‘l, deb bilyapsanmi?

⁴Jahl bilan o‘zingni jarohatlayapsan. Nima endi, seni deb yer yuzi huvullab qolishi kerakmi?! Yoki qoyalar o‘rnidan qo‘zg‘alishi kerakmi?!

⁵Fosiqlarning chirog‘i albatta o‘chadi, Olovining uchquni yorug‘lik bermaydi.

⁶Chodiridagi yorug‘lik zulmatga aylanadi, Tepasida osilgan chirog‘i o‘chadi.

⁷Sobit qadam fosiqlar endi qoqilib yuradi. O‘zlarining rejalari ularni oyog‘idan oladi.

⁸O‘z oyoqlari ularni tuzoqqa yetaklaydi, O‘zlari chuqurlikka yiqilib tushadi.

⁹Qopqon ularni tovonidan qisib qoladi, To‘r ularni mahkam tutadi.

¹⁰Yerda fosiqlarga ilmoq tashlangan, Ularning yo‘liga tuzoq qo‘yilgan.

¹¹Har tomondan ularni vahima bosib, Har qadamda ortidan quvib yuradi.

¹²Ochlikdan ularning sillalari qurib qoladi, Kulfat ham ularning qoqilishini kutib turadi.

¹³Kasallik ularning terisini kemirib bitiradi, O‘lat ularning oyoq–qo‘llarini chiritib yuboradi.

¹⁴Panohlari bo‘lgan chodirlaridan ularni sug‘urib olib, O‘liklar diyori shohining oldiga olib kelishadi.

¹⁵Fosiqlarning chodirlaridan hech narsa qolmaydi, Ular yashagan joy oltingugurt bilan qoplanadi.

¹⁶Ularning ildizlari qurib qoladi, Novdalari ham so‘lib qoladi.

¹⁷Yer yuzidan ularning xotirasi o‘chib ketadi, Ko‘chalarda ulardan nom–nishon ham qolmaydi.

¹⁸Ular yorug‘likdan zulmatga haydaladilar, Ha, bu dunyodan quvib chiqariladilar.

¹⁹Xalqi orasida ulardan avlod–zurriyot qolmaydi, Ular yashagan joylar kimsasiz bo‘lib qoladi.

²⁰Ularning taqdiridan g‘arbdagilar dahshatga tushadi, Sharqdagilarni esa vahima bosadi.

²¹Ha, yovuzlarning maskani shu ahvolga tushib qoladi, Xudosizlarning joyi shunday bo‘lib qoladi.