Read O‘zbek tilidagi Muqaddas Kitob, 2013 Ayub 19 Bible Online

Ayub 19 - O‘zbek tilidagi Muqaddas Kitob, 2013 bible

Ayub 19

¹Ayub shunday javob berdi:

²“Qachongacha meni qiynaysizlar, Gaplaringiz bilan meni ezasizlar?

³Mana, meni o‘n marta haqoratladingiz! Menga hamla qilaverishdan uyalmaysizlarmi?

⁴Agar xato qilganim rost bo‘lsa, Gunohim o‘zimning tashvishim.

⁵O‘zingizni mendan ustun qo‘yyapsiz. Mana bu gunohingning dalili, deb Sharmanda bo‘lganimni ko‘rsatyapsiz.

⁶Shuni bilinglar, Xudoning O‘zi menga haqsizlik qildi, To‘rlari bilan atrofimni o‘radi.

⁷“O‘ldiryapti!” deb baqirsam ham, Menga hech kim javob bermaydi. Faryod qilaman, lekin adolat yo‘qdir.

⁸Xudo yo‘limga g‘ov qo‘ygan, o‘tolmayman. Yo‘llarimni zulmat bilan qoplagan.

⁹U bor obro‘imni to‘kkan, Boshimdagi tojimni tortib olgan.

¹⁰Menga har tomondan hujum qildi, tamom bo‘ldim, Daraxtni sug‘urganday, umidimni sug‘urib tashladi.

¹¹Uning g‘azabi menga qarshi qaynaydi, U meni O‘ziga dushman, deb hisoblaydi.

¹²Uning qo‘shinlari bostirib keladi. Meni qamal qilish niyatida Chodirim atrofida qarorgoh quradi.

¹³Xudo qarindosh–urug‘imni mendan uzoqlashtirdi, Tanishlarim mendan yuz o‘girdilar.

¹⁴Qarindoshlarim meni tark etishdi. Do‘stlarim meni unutishdi.

¹⁵Uyimga kelgan mehmonlar ham, Cho‘rilarim ham menga begonaday qarashadi. Ularning nazarida bir musofirday bo‘lib qoldim.

¹⁶Xizmatkorimni chaqirsam, u javob bermaydi. Unga o‘zim yalinib borishim kerak.

¹⁷Nafasim xotinimga jirkanch bo‘lib qolgan, Qarindosh–urug‘larim mendan nafratlanadi.

¹⁸Hatto yosh bolalar ham mendan hazar qiladi. Oyoqqa tursam, ular meni mazax qiladi.

¹⁹Hamma yaqin do‘stlarim mendan hazar qiladi. Yaxshi ko‘rganlarim ham mendan yuz o‘girdi.

²⁰Teriyu suyagimdan boshqa hech narsam qolmadi, O‘lishimga bir baxa qoldi.

²¹Ey do‘stlarim, menga rahm qilinglar, Axir, meni Xudo urdi–ku!

²²Xudo meni quvg‘in qilganday, Nima uchun sizlar ham meni quvg‘in qilyapsizlar? Meni yeb bitirdingiz–ku! Hali ham to‘ymadingizmi?

²³Qani endi, aytgan so‘zlarim yozib qo‘yilsa! Ular kitobga tushirilsa!

²⁴Temir qalamu qo‘rg‘oshin bilan Qoyaga abadiy yozib qo‘yilsa!

²⁵Ammo men bilaman, Mening Xaloskorim hayotdir, Vaqti kelib, U meni himoya qiladi.

²⁶Terim irib ketgan bo‘lsa ham, Mana shu tanamda Xudoni ko‘raman.

²⁷Men Uni o‘z ko‘zlarim bilan ko‘raman, Ha, men ko‘raman, boshqa hech kim emas. Yuragim orziqib ketyapti!

²⁸Agar sizlar: “Mana endi unga qarshi chiqamiz! Axir, kulfatlarining ildizi o‘zida–ku”, desangiz,

²⁹O‘zingiz jazodan qo‘rqing. Xudo g‘azabi kelganda qilich bilan jazolaydi, Shunda sizlar hukm borligini bilib olasizlar.”