Read O‘zbek tilidagi Muqaddas Kitob, 2013 Ayub 20 Bible Online

Ayub 20 - O‘zbek tilidagi Muqaddas Kitob, 2013 bible

Ayub 20

¹Namaxlik Zo‘far shunday dedi:

²“Gaplaring meni bezovta qildi, Endi gapirmasam bo‘lmaydi.

³Tanbehlaring bilan meni haqoratlading, Lekin endi ongim javob ber, deb undayapti.

⁴O‘tmishdan bilmaysanmi?! Axir, insonlar yer yuziga joylashtirilgandan beri,

⁵Fosiqlarning shodligi uzoqqa cho‘zilmaydi–ku, Betavfiqlarning quvonchi bir lahzalik–ku!

⁶Takabburliklari samoga yetsa ham, Boshlari bulutlarga tegsa ham,

⁷O‘zlarining axlatiday butunlay yo‘q bo‘lib ketadi. Ularni oldin ko‘rganlar: “Qani endi ular?” deb so‘raydilar.

⁸Fosiqlar tushday o‘tib ketadilar, ularni topib bo‘lmaydi. Kechasi ko‘ringan sharpaday g‘oyib bo‘ladilar.

⁹Ha, fosiqlarni ko‘rganlar ularni boshqa ko‘rmaydilar, Makonlari endi ularni tanimaydi.

¹⁰Fosiqlarning farzandlari kambag‘allardan muruvvat kutadilar, O‘z qo‘llari bilan tortib olgan boyliklarini qaytarib beradilar.

¹¹Fosiqlar yosh va kuchli edi, Endi suyaklari tuproqda yotadi.

¹²Fosiqlik ularning og‘izlarida shirin tuyuldi, Shuning uchun fosiqlikni Tillarining tagiga solib, so‘rib o‘tiribdilar.

¹³Fosiqlikni tashlagisi kelmay, Og‘zilarida ushlab tursalar ham,

¹⁴O‘sha yeganlari qornilarida achchiq bo‘ladi, Ilonlarning zahriga aylanadi.

¹⁵Boyliklarni yutib, qaytib qusadilar, Qornilaridan bo‘lsa ham, Xudo qaytarib olib qo‘yadi.

¹⁶Ular kobra ilonlarning zaharini so‘radilar, Zaharli ilon ularni o‘ldiradi.

¹⁷Endi fosiqlar oqar daryolardan — sut va asal oqadigan irmoqlardan zavq olmaydilar.

¹⁸Zahmat bilan topganlaridan bahramand bo‘lmaydilar. Savdo–sotiq qilib topganlarining gashtini surmaydilar.

¹⁹Axir, fosiqlar kambag‘allarga zulm qilib, Bo‘lganicha bo‘lsin, deb tashlab ketgandilar. O‘zlari qurmagan uylarni kambag‘allardan tortib olgandilar.

²⁰Ular nafs balosiga uchragan, hech qachon qoniqmaydilar. Orzu–havas qilib yiqqan boyliklari ularni qutqarmaydi.

²¹Ular hech narsa qoldirmay, yeb bitirgandi. Shuning uchun farovonligi uzoqqa cho‘zilmaydi.

²²Farovonlik davrida ham ular g‘am–tashvishga to‘ladilar. Ularning boshiga ofatu kulfatlar tushadi.

²³Fosiqlar qorinlarini to‘ydirib bo‘lganlarida, Xudo ularga bor g‘azabini sochadi. Ularning ustiga O‘z zarbalarini yog‘diradi.

²⁴Fosiqlar temir quroldan qochsalar, Bronza nayza ularni teshib o‘tadi.

²⁵Nayza ularning tanalaridan sug‘urib olinadi, Ha, yaltiroq nayza ularning jigarlaridan tortib chiqariladi, Ularni vahima qamrab oladi.

²⁶Ularning xazinalari zulmatda yo‘q bo‘lib ketadi. Inson yoqmagan olov ularni yutib yuboradi, Olov fosiqlarning chodiriyu undagi bor narsasini yo‘q qiladi.

²⁷Samo ularning aybini ko‘rsatadi, Yer ularga qarshi guvohlik beradi.

²⁸Xudoning g‘azabi kelgan kuni Uyidagilarni sel oqizib ketadi.

²⁹Xudo fosiqlarga bergan ulush ana shulardir, Xudoning ularga tayinlagan nasibasi mana shudir.”