Read O‘zbek tilidagi Muqaddas Kitob, 2013 Ayub 21 Bible Online

Ayub 21 - O‘zbek tilidagi Muqaddas Kitob, 2013 bible

Ayub 21

¹Ayub shunday deb javob berdi:

²“So‘zlarimga yaxshilab quloq soling, Mana shu sizlarning menga bergan tasallingiz bo‘ladi.

³Sabr qiling, men ham gapiray, Gapirib bo‘lganimdan keyin, mazax qilavering.

⁴Men insonlarga emas, Xudoga arz qilyapman–ku. Shuning uchun sabrim chidamayapti–da.

⁵Mana, menga qarang–da, hayratlanib qoling, Og‘izlaringizni qo‘llaringiz bilan yoping.

⁶Boshimga tushgan kulfatlar haqida o‘ylasam, vahimaga tushaman, Tanamni qaltiroq bosadi.

⁷Nima uchun fosiqlarning umrlari uzilmay, davom etaveradi? Ular keksa yoshga yetadilar, kuchlari oshib ketaveradi?

⁸Farzandlari o‘sib, o‘z joyini topganini ko‘radi, Nevaralarini ham ko‘rishga muyassar bo‘ladi.

⁹Uylari xavf–xatarsiz bo‘ladi, Xudoning tayog‘i ularning boshiga tushmaydi.

¹⁰Buqalari hech bir qiyinchiliksiz ko‘payaveradi, Sigirlari bolalaydi, hech qachon bolasi tushib qolmaydi.

¹¹Fosiqlarning bolalari qo‘zilarga o‘xshab sakraydilar, Farzandlari o‘ynab–kulib yuraveradilar.

¹²Childirma va lira sadosiga qo‘shiq kuylaydilar, Nay sadosiga o‘yin–kulgi qiladilar.

¹³Umrlari farovonlikda o‘tadi, O‘liklar diyoriga tinchgina ketadilar.

¹⁴Xudoga shunday deydilar: “Bizni tinch qo‘y! Sening yo‘llaringni bilishni xohlamaymiz.

¹⁵Qodir Xudo kim bo‘libdiki, Unga xizmat qilsak, Unga iltijo qilsak, bizga nima foyda tegardi?!”

¹⁶Ammo fosiqlarning farovonligi o‘z qo‘lining ishi emas–ku! Fosiqlarning o‘y–xayollaridan men jirkanaman.

¹⁷Fosiqlarning chirog‘i biron marta bo‘lsa ham o‘chdimi? Boshiga tez–tez kulfat tushib turibdimi? Xudo O‘z g‘azabida ularga qiynoq beryaptimi?

¹⁸Qachon ular shamolda to‘zigan xashakday, Bo‘ron uchirib ketgan somonday bo‘ladilar?

¹⁹Sen: “Xudo insonlarning gunohlari uchun ularning farzandlarini jazolaydi”, — deysan. Men esa gunohkorlarning o‘zi jazolansin, deyman. Mana shu ularga saboq bo‘ladi.

²⁰Gunohkorlar o‘z ko‘zlari bilan halokatlarini ko‘rsinlar. O‘zlari Qodir Xudoning g‘azabi sharobini ichsinlar.

²¹Zotan, ular o‘lganidan keyin oilasiga nima bo‘lishini o‘ylamaydilar ham!

²²Kim Xudoga saboq bera oladi, Axir, U hatto samoviy zotlarni hukm qiladi–ku!

²³Mana, bir odam to‘liq farovonlikda, Tinch va xotirjam olamdan ko‘z yumadi.

²⁴Uning beli baquvvat, Suyaklari ilikka to‘la.

²⁵Ikkinchi bir odam esa ruhi tushkun holda, Hech qachon yaxshilik ko‘rmay o‘lib ketadi.

²⁶Ikkovi ham tuproqda birday yotadi, Ularni qurtlar qoplaydi.

²⁷Eh, do‘stlarim, niyatlaringizni bilaman, Maqsadlaringiz ham menga ayon.

²⁸Sizlar: “Qani zolim amaldorning uyi? Fosiqlarning chodiri qayerda?” deb so‘raysizlar.

²⁹Ko‘p joylarga borib kelganlardan so‘ranglar. Ular aytganlarini inkor qila olmaysiz!

³⁰Kulfat kunida fosiqlar najot topishlarini, Xudoning g‘azabi kunida qutqarilishlarini ular aytadilar–ku!

³¹Fosiqlarning qilmishlarini kim ularning yuziga soladi? Qilmishlari uchun kim ularni jazolaydi?

³²Jasadlari qabrga olib borilganda, Qabr boshiga soqchi qo‘yiladi.

³³Son–sanoqsiz odamlar ketlaridan borib, Ularga aza tutadi. Hatto tuproq ham ularning ustiga sekin tushadi.

³⁴Qanday qilib meni puch so‘zlaringiz bilan yupata olasiz? Barcha bergan javoblaringiz yolg‘ondir!