Read O‘zbek tilidagi Muqaddas Kitob, 2013 Ayub 22 Bible Online

Ayub 22 - O‘zbek tilidagi Muqaddas Kitob, 2013 bible

Ayub 22

¹Temonlik Elifaz shunday dedi:

²“Inson Xudoga qanday foyda keltiradi?! Dono inson Uning uchun birorta foydali ish qila oladimi?!

³Solih bo‘lsang bu Qodir Xudoga qanday zavq keltiradi?! Yurgan yo‘llaring pok bo‘lsa, Unga qanday foyda?!

⁴U senga xudojo‘yliging uchun tanbeh beradimi?! Buning uchun seni hukm qiladimi?!

⁵Axir, fosiqliging qanchalar og‘ir?! Gunohingning cheki yo‘q–ku!

⁶Yaqinlaringdan hech bir sababsiz garov olding, Kambag‘allardan kiyimini yechib olib, yalang‘och qoldirding.

⁷Chanqaganlarga suv bermading. Qorni ochlardan noningni qizg‘anding.

⁸Ha, qudratlilar yurtga egalik qiladilar, Obro‘lilar u yerda yashaydilar.

⁹Bevalarni quruq qo‘l bilan orqaga qaytarding, Yetimlarga yordam qo‘lini cho‘zmading.

¹⁰Shuning uchun atrofing tuzoqlar bilan o‘ralgan. To‘satdan seni vahima bosgan.

¹¹Atrofingni zulmat qamrab olgan, Ko‘zlaring hech narsani ko‘rmayapti, Suv toshqinlari seni ko‘mib ketgan.

¹²Yuksakdagi baland yulduzlarga qara. Ammo Xudo samo cho‘qqisida–ku!

¹³Shunda ham sen: “Xudo nimani bilardi, Zulmat orasidan U qanday hukm qila olardi”, deysan.

¹⁴“Quyuq bulutlar Uni yashirgan, U bizni ko‘rmaydi, Xudo samo gumbazi uzra aylanib yuribdi–ku”, deb aytasan.

¹⁵Sen fosiqlar yurgan Azaliy yo‘ldan yuraverasanmi?

¹⁶Ular hayotdan bevaqt mahrum bo‘ldilar, Umr poydevorlarini sel yuvib ketdi.

¹⁷Fosiqlar Xudoga shunday dedilar: “Bizni tinch qo‘ygin. Ey Qodir Xudo, bizga nima qila olarding?”

¹⁸Ammo ularga baraka berib, uylarini to‘ldirgan Xudo–ku! Fosiqlarning o‘y–xayollaridan men jirkanaman.

¹⁹Solihlar fosiqlarning ahvolini ko‘rib, xursand bo‘ladilar, Aybsizlar fosiqlarni mazax qilib kuladilar.

²⁰Ular: “Dushmanlarimiz yo‘q qilindi, Bitta qolmay olovda yonib ketdilar”, deb aytadilar.

²¹Xudo bilan tortishaverma! U bilan yarashgin, Shunda farog‘atda yashaysan.

²²Xudoning og‘zidan chiqqan o‘gitlariga quloq tut, So‘zlarini yuragingda saqla.

²³Qodir Xudoga yuz bursang, sog‘ligu boyliging qayta tiklanadi. Chodiringni fosiqlikdan tozalasang,

²⁴Oltinni chang deb bilib, Ofir tillasini daryoga otsang,

²⁵Qodir Xudoning O‘zi sening xazinang bo‘ladi. U sening qimmatbaho kumushing bo‘ladi.

²⁶Shunda Qodir Xudodan zavq topasan, Xudoga yuz burasan.

²⁷Sen Unga iltijo qilasan, U esa senga quloq tutadi. Unga bergan va’dalaringni bajarasan.

²⁸Nima niyat qilsang, hammasi amalga oshadi, Hayot so‘qmoqlaring nurga to‘ladi.

²⁹Agar sharmanda bo‘lgan odam uchun Xudoga iltijo qilsang, Xudo o‘sha odamni sharmandalikdan qutqaradi.

³⁰Sening pok qo‘llaring tufayli Hatto aybdorlar ham najot topadi.”