Read O‘zbek tilidagi Muqaddas Kitob, 2013 Ayub 23 Bible Online

Ayub 23 - O‘zbek tilidagi Muqaddas Kitob, 2013 bible

Ayub 23

¹Shunda Ayub yana gapirdi:

²“Bugun ham achchiq shikoyat qilaman, Oh–vohdan o‘zimni tuta olmayman.

³Qaniydi, Xudoni qayerdan topishni bilsam, Taxti oldiga borgan bo‘lardim!

⁴Uning oldiga barcha arzlarimni yoyib, O‘z da’volarimni aytgan bo‘lardim.

⁵O‘shanda Uning javobini tinglagan bo‘lardim, Uning menga aytganlarini tushungan bo‘lardim.

⁶U buyuk qudrati bilan menga qarshi chiqarmidi? Yo‘q, U menga quloq tutgan bo‘lardi.

⁷Ha, solih inson Unga kelib, arzini ayta oladi. O‘z Hakamim meni bir umrga oqlaydi.

⁸Sharqqa borsam, Xudo yo‘qdir, G‘arbga borib ham Uni topolmayman.

⁹Shimolda biror ish qilsa, men Uni ko‘rolmayman, Janub tomon burilsa ham Uni topolmayman.

¹⁰U esa mening yurgan yo‘limni biladi, U meni sinagandan keyin sof tilladay bo‘laman.

¹¹Men faqat Xudoning yo‘lidan yurdim, Uning yo‘lini tutdim, chetga og‘madim.

¹²U bergan amrlardan chetga chiqmadim, Kundalik rizqimdan ham ko‘ra Uning so‘zlarini qimmatli bildim.

¹³Xudo qarorida qat’iy turadi, Kim Uning fikrini o‘zgartira oladi?! U nima xohlasa, shuni qiladi.

¹⁴Menga qarshi tuzgan rejalarini U oxirigacha bajaradi, Uning bunday rejalari hali ko‘p.

¹⁵Shuning uchun Uning huzurida qo‘rquvga tushaman, Bu haqda o‘ylasam, meni vahima bosadi.

¹⁶Xudo meni jur’atsiz qilib qo‘ydi, Qodir Xudo meni dahshatga solib qo‘ydi.

¹⁷Ammo yuzimni qoplagan tim qorong‘ilik, Zulmat mening ovozimni o‘chira olmadi.