Read O‘zbek tilidagi Muqaddas Kitob, 2013 Ayub 24 Bible Online

Ayub 24 - O‘zbek tilidagi Muqaddas Kitob, 2013 bible

Ayub 24

¹Nima uchun Qodir Xudo hukm vaqtini belgilamaydi? Nima uchun Xudoni bilganlar bekorga Uni kutadilar?

²Fosiqlar chegaralarni buzadilar, O‘g‘irlangan podalarni yaylovlarda boqadilar.

³Yetimlarning eshaklarini haydab ketadilar. Bevaning ho‘kizini kafillik sifatida olib qo‘yadilar.

⁴Kambag‘allarni yo‘ldan chetga chiqarib tashlaydilar. Qashshoqlarni yashirinishga majbur qiladilar.

⁵Qashshoqlar yovvoyi eshaklarday cho‘lda ovqat izlashadi, Ularning farzandlari uchun dashtdan boshqa yerda ovqat yo‘q.

⁶Begonalarning dalalarida somon yig‘ishadi, Fosiqlarning uzumzorlarida qolgan–qutganini terishadi.

⁷Tunni kiyim–kechaksiz, yalang‘och o‘tkazadi, Sovuqda ularning yopinadigan narsasi yo‘q.

⁸Tog‘ yomg‘irlari ularni shalabbo qiladi, Boshpanalari yo‘qligidan ular Qoyaning oldida qaltiraydilar.

⁹Fosiqlar bevaning farzandini Onasining quchog‘idan yulib oladi, Kambag‘alning chaqalog‘ini kafillik qilib oladi.

¹⁰Kiyimlari yo‘qligidan kambag‘allar yalang‘och yurishadi. Bug‘doy bog‘lamlarini ko‘tarib yursalar–da, qorinlari och qoladi.

¹¹Qator–qator zaytun daraxtlari orasida Zaytunlarni ezib moy chiqaradilar. Uzum ezib sharob qiladilar, Ammo chanqoqlari bosilmaydi.

¹²Shaharda jon berayotganlarning nolalari eshitiladi, Jarohatlanganlar madad so‘rab faryod qiladi. Shunda ham Xudo hech kimni bu haqsizlik uchun javobgar tutmaydi.

¹³Nurga qarshi bosh ko‘targanlar bor. Ular nur yo‘lidan yurmaydilar, Nur yo‘li olib boradigan joylarga bormaydilar.

¹⁴Qotil erta tongda turadi, Kambag‘alu bechorani o‘ldiradi, Kechasi esa o‘g‘irlik qiladi.

¹⁵Zinokor kech bo‘lishini kutadi, “O‘shanda meni hech kim ko‘rmaydi”, deb o‘ylaydi. Niqob bilan yuzini berkitadi.

¹⁶O‘g‘rilar kechasi uylarni talab, Kunduz kuni yashirinadi. Ular nur nimaligini bilmaydi.

¹⁷Barcha o‘g‘rilarning tongi zulmatdir. Ha, zulmat dahshatlari ularning do‘stidir.

¹⁸Ammo o‘sha fosiqlar daryo suvlari ustidagi ko‘pikday o‘tkinchidir. Ularning yerlari la’natlangan, Ularning uzumzorlariga hech kim qadam bosmaydi.

¹⁹Issiq havo va qurg‘oqchilik qorni eritib yo‘q qilganday, O‘liklar diyori ham gunohkorni o‘z og‘ushiga oladi.

²⁰Qurtlar esa uni maza qilib yeyishadi. Gunohkorni hatto o‘z onasi unutadi, Hech kim uni esga olmaydi. Fosiqlar daraxtlarday sindirib tashlanadi.

²¹Fosiqlar farzandsiz ayolga zulm o‘tkazadi, Bevalarga mehr–shafqat ko‘rsatmaydi.

²²Ammo Xudo O‘z qudrati bilan kuchlilarni halok qiladi. Ular baland ko‘tarilishi mumkin, Ammo ularning hayoti uchun kafolat yo‘q.

²³Ular osoyishta yashashlariga Xudo yo‘l qo‘yadi, Ammo O‘zi ularning yo‘llarini doim kuzatib turadi.

²⁴Hozircha ular buyuk bo‘lsa ham, keyinroq yo‘q bo‘ladi. Ular pastga uriladi, xuddi boshqalarday o‘lib ketadi. Don boshoqlariday qurib qoladi.

²⁵Qani, kim gaplarimni yolg‘on, deb ayta oladi? Kim mening gaplarimni puchga chiqara biladi?