Read O‘zbek tilidagi Muqaddas Kitob, 2013 Ayub 26 Bible Online

Ayub 26 - O‘zbek tilidagi Muqaddas Kitob, 2013 bible

Ayub 26

¹Ayub shunday deb javob berdi:

²“Ojizga bergan yordaming shumi? Kuchsizga shunday madad kerakmi?!

³Aqlsizga ja o‘rgatib qo‘yding–a! Bergan maslahatlaring biram ma’noliki!

⁴Kim o‘rgatdi o‘zi senga bu dono gaplarni?! Sen orqali kimning ruhi gapirgan o‘zi?!

⁵Suvlar ostidagi o‘liklar diyorida Marhumlarning ruhi qaltiraydi.

⁶Xudoning oldida o‘liklar diyori ochiqdir, Halokat diyorining ham yopinchig‘i yo‘q.

⁷Xudo bo‘shliq ustiga samoni yoydi, Yerni esa bo‘shliqqa osib qo‘ydi.

⁸Xudo bulutlarni yomg‘ir suviga to‘ldiradi, Bulutlar esa suvning og‘irligidan yirtilib ketmaydi.

⁹Xudo to‘lin oyning yuzini yashirib, Bulutlar bilan o‘rab qo‘yadi.

¹⁰Xudo ufqni bepoyon ummon uzra yoyib, Yorug‘lik va qorong‘ilik orasiga chegara qo‘ydi.

¹¹Xudo samoning ustunlariga do‘q qilsa, Ular qo‘rquvdan qaltirab tebranadi.

¹²Xudo O‘z qudrati bilan dengizni mag‘lub qildi, O‘z zakovati bilan maxluq Rahobni halok qildi.

¹³O‘z nafasi bilan bulutlarni haydab, Moviy osmonni ochdi. Uning qudrati qochayotgan ilonni ezib tashladi.

¹⁴Bular Xudo qilgan ishlarning kichik bir parchasidir, Xuddi pichirlab aytilgan gapga o‘xshaydi! Shunday ekan, agar Uning qudrati Momoqaldiroqday gumburlasa, kim tushuna oladi?