Read O‘zbek tilidagi Muqaddas Kitob, 2013 Ayub 27 Bible Online

Ayub 27 - O‘zbek tilidagi Muqaddas Kitob, 2013 bible

Ayub 27

¹Ayub yana gap boshlab shunday dedi:

²“Menga adolat qilmay, Qalbimni yaralagan Qodir Xudo shohid!

³Tanamda Xudo ato qilgan jon bor ekan, Oxirgi nafasim chiqmaguncha,

⁴Og‘zimdan fisqu fasod eshitilmas, Tilimdan yolg‘on so‘zlar chiqmas.

⁵Hech qachon sizlar haq, deb tan olmayman, O‘lgunimcha aybsiz ekanligimni rad qilmayman.

⁶Ikkilanmay o‘zim haqligimni aytaveraman, Hayot ekanman, vijdonim toza mening.

⁷Dushmanim fosiqlarday jazo olsin, Raqiblarim yovuzlarday jazolansin.

⁸Xudosiz odam hayotdan mahrum bo‘lganda, Unda qanday umid qoladi? Xudo uni yo‘q qilganda umidi bo‘ladimi?

⁹Xudosizlarning boshiga kulfat tushganda, Xudo ularning faryodiga quloq tutarmikin?

¹⁰Axir, ular Qodir Xudodan zavq topmaydilar–ku! Ular har doim ham Xudoga iltijo qilmaydilar–ku!

¹¹Xudoning qudrati haqida sizlarga o‘rgataman. Qodir Xudoning yo‘llarini sizlardan yashirmayman.

¹²Axir, o‘zingiz bularning hammasini ko‘rgansiz–ku! Shunda ham bekorchi gaplarni gapirishni qo‘ymaysiz.

¹³Fosiqlarning taqdiri quyidagichadir, Qodir Xudo zolimlarning boshiga solgani mana shudir:

¹⁴Ularning farzandlari ko‘paysa ham, Baribir urushda halok bo‘ladi. Zurriyoti hech qachon nonga to‘ymaydi.

¹⁵Tirik qolganlarini o‘lat nobud qiladi, Bevalari esa aza ham tutolmaydi.

¹⁶Kumushlari changday ko‘p bo‘lsa ham, Kiyim–kechaklari uyum–uyum bo‘lsa ham,

¹⁷O‘sha kiyimlarni solihlar kiyadi, Kumushlarini esa aybsizlar bo‘lib oladi.

¹⁸Fosiqlarning uylari qush iniday mo‘rt bo‘ladi, Dala qorovullarining kapalari singari bo‘ladi.

¹⁹Fosiqlar kechqurun yostiqqa bosh qo‘yganda boy bo‘lsa, Ko‘zlarini ochib qaraganda, bor boyliklari yo‘qolib ketgan bo‘ladi.

²⁰Vahima ularni suv toshqiniday bosadi, Tunda bo‘ronlar ularni uchirib ketadi.

²¹Sharq shamoli ularni olib ketadi, Fosiqlarni o‘z joylaridan supurib tashlaydi.

²²Bu shamol shafqatsizlarcha ularga tashlanadi, Fosiqlar shamolning kuchidan qochishga urinadi.

²³Shamol ularning ustidan kuladi, Hushtak chalib, ularni dahshatga soladi.