Read O‘zbek tilidagi Muqaddas Kitob, 2013 Ayub 28 Bible Online

Ayub 28 - O‘zbek tilidagi Muqaddas Kitob, 2013 bible

Ayub 28

¹Mana, kumush qazib olinadigan konlar bor, Tilla tozalanadigan joylar ham bor.

²Temirni yerdan qazib olishadi, Toshlarni eritib, mis ajratib olishadi.

³Inson qorong‘i konlarga chiroq bilan kiradi, Hatto yer ostining eng chet joylarini ham qaziydi. Yerning qop–qorong‘u joylarigacha borib, Temir va mis qidiradi.

⁴U odamzod yashaydigan joylardan uzoqda, Inson qadam bosmaydigan yerlarda konlar qaziydi. Odamzoddan uzoq joylarda arqonlarga osilib, chuqurlarga tushadi.

⁵Mana, donu non yerdan unib chiqadi, Ammo yer osti esa yondirilganday alg‘ov–dalg‘ov bo‘lib yotibdi.

⁶Yerdagi toshlardan zangori yoqutlar chiqadi, Tuprog‘ida tilla bor.

⁷Hech bir quzg‘un konlarning yashirin so‘qmoqlarini bilmaydi, Hech bir burgutning ko‘zlari u joylarni ko‘rmagan.

⁸Yovvoyi hayvonlar u yerlarga oyoq bosmagan, Sherlar ham u yerlardan yurmagan.

⁹Inson qoyalarni o‘yadi, Tog‘larni tag–tugi bilan qo‘porib tashlaydi.

¹⁰Qoyalar orasidan yo‘llar ochadi, Inson ko‘zlari hamma bebaho xazinalarni ko‘radi.

¹¹Inson daryolarning manbaini topadi, Yashirin xazinalarni yorug‘likka olib chiqadi.

¹²Ammo donolikni qayerdan topsa bo‘ladi?! Idrokning manbayi qayerda ekan?!

¹³Odamzod donolikning qayerda ekanligini bilmaydi, Chunki yorug‘ yer yuzida donolik topilmaydi.

¹⁴Tubsiz suvlar, donolik bizda emas, deydilar, Dengiz ham, mening ichimda u yo‘q, deb aytar.

¹⁵Donolikni tillaga sotib olib bo‘lmaydi, Uning narxini kumush bilan o‘lchab bo‘lmaydi.

¹⁶Donolik Ofir tillasiyu aqiq toshlar, Zangori yoqutlar bilan ham sotib olinmaydi.

¹⁷Tilla ham, billur ham donolikka teng kelmaydi, Donolikni toza tilla taqinchoqlarga almashtirib bo‘lmaydi.

¹⁸Donolikning qadri gavhardan ham balanddir Marjon va javohirlar uning oldida qadrsizdir.

¹⁹Habashistonning javohiri ham unga teng kelolmaydi, Eng sof tilla bilan ham donolikni sotib olib bo‘lmaydi.

²⁰Shunday ekan, donolik qayerdan kelib chiqadi? Idrokning manbayi qayerda?

²¹U barcha jonzotlarning ko‘zlaridan yashirilgan, Hatto osmondagi qushlardan ham berkitilgan.

²²Hatto Halokat va O‘lim ham, Biz donolik haqida faqat eshitganmiz, deb aytadi.

²³Donolikka olib boradigan yo‘lni Xudo biladi, Donolikning maskanini faqatgina U biladi.

²⁴Zotan Xudo yerning to‘rt tomonini ham ko‘rib turadi, Falak ostidagi hamma narsani kuzatib turadi.

²⁵Xudo shamolga kuch bergan, Dengizning hajmini belgilagan.

²⁶Yomg‘irning qayerga yog‘ishini U ko‘rsatib bergan, Chaqmoq uchun yo‘llarni belgilagan.

²⁷O‘shanda Xudo donolikka qaradi–da, Donolikning qadrini belgiladi. Uni tekshirib ko‘rib, barqaror qildi.

²⁸Xudo odamzodga shunday dedi: “Men, Rabbingizdan qo‘rqish donolikdir, Fosiqlikdan yuz o‘girish idrokdandir.”