Read O‘zbek tilidagi Muqaddas Kitob, 2013 Ayub 29 Bible Online

Ayub 29 - O‘zbek tilidagi Muqaddas Kitob, 2013 bible

Ayub 29

¹Ayub gapida davom etdi:

²“Qani endi, Xudo menga G‘amxo‘rlik qilgan paytlari qaytib kelsa edi.

³O‘sha paytlarda Xudo O‘z chirog‘i bilan yo‘limni yoritardi, Uning nuri bilan zulmatdan o‘tar edim.

⁴Kuch–quvvatga to‘lgan paytlarimda Xudo bilan bo‘lgan do‘stligim chodirimni to‘ldirib turardi.

⁵Qodir Xudo men bilan edi, Farzandlarim ham atrofimda yurardi.

⁶Uyimda qaymoq oshib–toshib yotardi, Zaytunzorlarimdan moy ariq bo‘lib oqardi.

⁷Shahar darvozasi oldida o‘tirganimda, Yo‘lboshchilar orasidan joy olganimda,

⁸Yoshlar meni ko‘rib, yo‘l berardi, Hatto keksalar ham o‘rnidan turardi.

⁹Oqsoqollar ham gapidan to‘xtab, Og‘izlarini qo‘llari bilan berkitardi.

¹⁰Boshliqlarning ham ovozi tinardi, Tillari tanglayiga yopishib qolardi.

¹¹Gaplarimni eshitganlar meni maqtardi, Ko‘rganlar men haqimda yaxshi gapirardi,

¹²Axir, men nola qilgan yo‘qsillarga yordam berardim, Suyanchig‘i yo‘q yetimlarni chetda qoldirmas edim.

¹³O‘limdan qutqarilgan bu odamlar meni duo qilardilar, Yordamim bilan bevalarning qalbini quvonchga to‘ldirardim.

¹⁴Solihlikka kiyim kabi o‘rangandim, Odillikni sallam va to‘nimday kiyib yurardim.

¹⁵Ko‘rlarga ko‘z bo‘ldim, Cho‘loqlarga oyoq bo‘ldim.

¹⁶Faqirlarga ota bo‘ldim, Musofirlarning arzlarini eshitib, himoya qildim.

¹⁷Zolimlarning tishlarini sindirdim, Ularning og‘zidan o‘ljasini tortib oldim.

¹⁸Men shunday deb o‘ylardim: “Uzoq umr ko‘rib, o‘z uyimda hayotdan ko‘z yumaman.

¹⁹Axir, men ildizlari suvga yetgan, Shoxlarida tun bo‘yi shabnam turadigan daraxtdayman.

²⁰Doimo obro‘yim baland bo‘laveradi, Kuchim qayta–qayta yangilanaveradi.”

²¹Hamma sukut saqlab, menga quloq solardi, Bizga qanday maslahat berarkan, deb kutardi.

²²Mening so‘zlarimdan keyin hech kim gap qo‘shmasdi, So‘zlarim ularning ustiga shabnamday ohista tushar edi.

²³Ular yomg‘ir kutganday meni kutishardi, So‘zlarim bahor yomg‘iri singari ularga singib ketardi.

²⁴Ularga kulib qarasam, ko‘zlariga ishonishmasdi, Marhamat qilishimni umid bilan kutishardi.

²⁵Ularga bosh bo‘lib, yo‘l–yo‘riq ko‘rsatardim, Lashkarlari orasidagi shohday yashar edim, Ular qayg‘uga tushganlarida tasalli berardim.”