Read O‘zbek tilidagi Muqaddas Kitob, 2013 Ayub 3 Bible Online

Ayub 3 - O‘zbek tilidagi Muqaddas Kitob, 2013 bible

Ayub 3

¹Oxiri Ayub so‘z boshlab, o‘zi dunyoga kelgan kunni la’natladi.

²U shunday dedi:

³“Men tug‘ilgan kun qirilib ketsin, Men yaratilgan kecha la’nati bo‘lsin.

⁴O‘sha kun zulmatga aylanib qolsin! Hatto Xudo ham shu kunni eslamasin, O‘sha kun hech qachon nur ko‘rmasin.

⁵Zim–ziyo zulmat uni qamrasin, U kunni bulutlar berkitsin, Quyosh nurini qorong‘ilik to‘sib qo‘ysin.

⁶Ha, o‘sha kechani zulmat yutib yuborsin! Yil kunlari orasida hech qachon sanalmasin, Oylarning hisobiga o‘sha kecha kirmasin.

⁷O‘sha kecha qisir bo‘lsin, Undan shodlik ovozi yangramasin.

⁸Maxluq Levitanni chaqirishga qodir bo‘lganlar uni qarg‘asin, Ha, la’nat o‘qiydiganlar o‘sha kechaga qarg‘ish yog‘dirsin.

⁹O‘sha kechada tong yulduzlari charaqlamasin. O‘sha kecha yorug‘likka umid qilsin–u, Ammo tong shu’lasini ko‘rmasin.

¹⁰Onamning bachadonini berkitmagani uchun, Meni shuncha qayg‘udan xoli qilmagani uchun O‘sha kecha la’nati bo‘lsin.

¹¹Nima uchun o‘lik tug‘ilmadim?! Onam qornidan tushiboq, o‘lmadim?!

¹²Nima uchun onam meni tizzalarida olib o‘tirdi ekan?! Nima uchun meni emizdi ekan?!

¹³O‘lganimda edi, hozir tinch yotgan bo‘lardim. Uxlab, orom olib yotgan bo‘lardim.

¹⁴Vayronalarni tiklashga qodir bo‘lgan Shohu amaldorlar bilan birga bo‘lardim.

¹⁵Tillaga boy, uylarini kumushga to‘ldirgan Shahzodalar qatori yotgan bo‘lardim.

¹⁶Nima uchun o‘lik tug‘ilgan boladay bo‘lmadim?! Nima uchun yorug‘lik ko‘rmagan chaqaloqday ko‘milmadim?!

¹⁷Axir, qabrda fosiqlar ham Fosiqlik qilishdan to‘xtaydilar–ku! Charchaganlar ham dam oladilar–ku!

¹⁸Asirlar u yerda jam bo‘lib tinch yashaydi, Nazoratchilarning baqir–chaqiri eshitilmaydi.

¹⁹Katta ham kichik ham u yerda bordir, Qullar ham nihoyat u yerda ozoddir.

²⁰Nima uchun qiynalganga yorug‘lik berilgan, Qayg‘uga botganga esa hayot ato qilingan?!

²¹Ular o‘limni kutadilar, lekin o‘lim kelmaydi, Qimmatbaho xazinadan ham ko‘ra ko‘proq O‘limni izlaydi ular.

²²O‘lim topganlarida ular juda quvonadi, Shodlikdan boshlari osmonga yetadi.

²³Nima uchun yo‘lni ko‘rolmaydiganlarga yorug‘lik berilgan?! Axir, Xudo ularning yo‘lini to‘sib qo‘ygan–ku!

²⁴Non yeyish o‘rniga og‘ir uf tortaman, Chuqur ohu nolalarim suvday oqib chiqyapti.

²⁵Ha, nimadan qo‘rqqan bo‘lsam, o‘sha boshimga tushdi. Xavfsiraganlarim sodir bo‘ldi.

²⁶Ko‘nglim tinch emas, menda xotirjamlik yo‘q, Tinchlik yo‘q, g‘am–tashvish esa kelaveradi.”