Read O‘zbek tilidagi Muqaddas Kitob, 2013 Ayub 30 Bible Online

Ayub 30 - O‘zbek tilidagi Muqaddas Kitob, 2013 bible

Ayub 30

¹Endi esa o‘zimdan yosh bo‘lganlar ustimdan kuladi, Ularning otalari qo‘riqchi itlarim orasida bo‘lishga ham arzimaydi.

²Ulardan menga nima foyda?! Axir, ular kuch–quvvatdan qolgan–ku!

³Ular ochligu muhtojlikdan ozib–to‘zib ketgan, Tun bo‘yi dashtu biyobonda daydib yuradi.

⁴Cho‘l butalari orasida achchiq o‘tlar teradi, Yulg‘un butasining ildizlari ularga yemish bo‘ladi.

⁵Ular odamlar orasidan haydalgan. O‘g‘rilarga baqirganday ularning orqasidan baqiradilar.

⁶Ular quruq soyliklaru chuqurlarda, Qoyalar orasida yashashga majburdirlar.

⁷Changalzorlarda hayvonlar singari bo‘kiradi, Qichitqi o‘tlar orasida g‘ujanak bo‘lib o‘tiradi.

⁸Eng past, yaramas bu to‘dani Xivchinlar bilan yurtdan haydashgan.

⁹Mana endi, o‘shalar mazax qilib, Men haqimda qo‘shiqlar kuylaydi, Men ularga kulgi bo‘lib qoldim.

¹⁰Ular mendan nafratlanib, yaqinimga ham kelmaydi, Hatto yuzimga tupurishdan ham toymaydi.

¹¹Xudo kuchimni kesdi, meni pastga urdi. Shuning uchun o‘sha yaramaslar ham Mening oldimda o‘zlarini jilovlay olmaydigan bo‘ldilar.

¹²O‘sha qalang‘i–qasang‘ilar Menga qarshi chiqib, yerga yiqitadilar, Meni o‘ldirmoqchi bo‘lib, hujum qiladilar.

¹³Yo‘llarimni to‘sib, Boshimga tushadigan kulfatni tezlatadilar, Ularni to‘xtatadigan hech kim yo‘q.

¹⁴Meni mazax qiluvchilar har tomonlama hujum qiladilar, To‘fonday ustimga yopiriladilar.

¹⁵Meni qo‘rquv bosgan, Obro‘yim shamol uchirgandek ketdi, Farovonligim bulut kabi o‘tib ketdi.

¹⁶Endi yuragim ezilib ketyapti, Har kuni men azob–uqubat tortaman.

¹⁷Tun bo‘yi suyaklarim zirqirab og‘riydi, Meni dard qiynab, hech tinchlik bermaydi.

¹⁸Xudo shiddat bilan kiyimimdan ushladi, Ko‘ylagimning yoqasidan tutdi.

¹⁹U meni loyga bulg‘adi, Changu tuproqchalik qadrim yo‘q.

²⁰Ey Xudoyim, Senga iltijo qilaman, Ammo Sen menga javob bermaysan. Sening oldingda turibman, Sen esa qarab turaverasan.

²¹Menga nisbatan shafqatsiz bo‘lib qolding, O‘z qudrating bilan meni quvg‘in qilyapsan.

²²Quyun bilan meni ko‘tarib, Bo‘ron orasida u yoqdan–bu yoqqa otasan.

²³Bilaman, insonning qismati bo‘lgan O‘limga meni ham olib borasan.

²⁴Boshiga kulfat tushgan muhtoj odam nola qilsa, Hech kim unga qo‘l ko‘tarmaydi–ku, axir.

²⁵Men boshiga kulfat tushganlar uchun qayg‘urdim–ku! Muhtojlarni ko‘rib, yuragim achidi–ku!

²⁶Ammo yaxshilik kutganimda yovuzlik keldi, Yorug‘likka umid qilsam, zulmat tushdi.

²⁷Qalbim bezovtalangan, tinim bilmaydi, Og‘ir kunlar boshimga tushgan.

²⁸Quyosh nuri bo‘lmagan bir zulmatda yuribman, Jamoa oldida madad so‘rab, faryod qilaman.

²⁹Men chiyabo‘rining do‘stiday, Tuyaqushlarning ukasiday bo‘lib qoldim.

³⁰Terim qorayib ketgan, Tanam isitmadan yonyapti.

³¹Nayim sadosi azadorlarga jo‘r bo‘ladi, Liram qayg‘uli nola qiladi.