Read O‘zbek tilidagi Muqaddas Kitob, 2013 Ayub 31 Bible Online

Ayub 31 - O‘zbek tilidagi Muqaddas Kitob, 2013 bible

Ayub 31

¹Men: “Ayol–qizlarga shahvat bilan qaramayman”, deb Ko‘zlarim bilan ahd tuzgan edim.

²Xo‘sh, Xudo menga bergan nasiba nima bo‘ldi?! Qodir Xudo men uchun nima buyurgan?!

³Adolatsizlarning boshiga ofat, Badkirdorlarning boshiga kulfat tushadi–ku.

⁴Xudo hamma yo‘llarimni ko‘radi, Bosgan qadamimni kuzatib turadi.

⁵Agar yolg‘on gapirgan bo‘lsam, Tilim yolg‘on–yashiqqa to‘la bo‘lsa,

⁶Mayli, Xudo meni adolat tarozisida tortib ko‘rsin, Shunda U pokligimni bilib oladi.

⁷Agar to‘g‘ri yo‘ldan og‘ib ketgan bo‘lsam, Nafsim meni yo‘ldan urib, Qo‘llarimni bulg‘agan bo‘lsam,

⁸Mayli, men ekay, hosili birovga nasib bo‘lsin, Dalalarimda ungan ekinlar sug‘urib tashlansin.

⁹Biror ayol meni yo‘ldan urgan bo‘lsa, Shahvat bilan qo‘shnimni poylagan bo‘lsam,

¹⁰Mayli, xotinim boshqalarning bug‘doyini yanchisin, Begona erkaklar uning oldiga kirsin.

¹¹Axir, shahvat buzuqlik–ku! Bu gunoh albatta hukm qilinadi.

¹²Halokat diyorigacha yetib boradigan olovdaydir u, Bor–budimni tag–tomiri bilan yeb bitiradi.

¹³Qullarim, cho‘rilarim men haqimda shikoyat qilganda, Ularga nisbatan adolatsizlik qilgan bo‘lsam,

¹⁴Xudo hukmga turganda men nima qilaman? Xudo meni so‘roq qilganda nima deyman?

¹⁵Meni yaratgan ularni ham yaratgan–ku! Onamizning qornida barchamizga shakl bergan Xudo–ku!

¹⁶Muhtojlar madad so‘raganda, qaytarib yubormadim, Bevalarning umidini puchga chiqarmadim.

¹⁷Ovqatimni bir o‘zim yemadim, Yetimlar bilan bo‘lishdim.

¹⁸Yoshligimdan yetimlarga ota bo‘ldim, Umrim bo‘yi bevalarga g‘amxo‘rlik qildim.

¹⁹[19-20] Ko‘zim tushgan yalang‘och bechoralar Qo‘ylarimdan qirqib olingan junlar bilan isindi. Usti boshi bo‘lmagan faqirlarga mehr ko‘rsatdim, Shuning uchun ular meni duo qildi.

²¹Agar qozixonada so‘zim o‘tishini bilib turib, Yetimlarga qarshi qo‘l ko‘targan bo‘lsam,

²²Qo‘llarim sinib qolsin, Qo‘lim yelkamdan uzilib tushsin.

²³Men Xudodan keladigan kulfatdan qo‘rqardim, Xudoning ulug‘vorligini bila turib, bunday ish qila olmasdim.

²⁴Tillaga ishondimmi? Toza tillaga umid bog‘ladimmi?

²⁵Boyligim ko‘pligidan yoki mol–mulkim bilan maqtandimmi?

²⁶Osmondagi yorug‘ quyoshga qarab, Go‘zal oyning suzishini kuzatib,

²⁷Yuragim vasvasaga tushdimi? Ularga sig‘indimmi?

²⁸Agar shunday qilgan bo‘lsa, bu ham hukmga loyiq gunoh bo‘lar edi. Axir, bu ish bilan yuksakdagi Xudoga sadoqatsizlik ko‘rsatgan bo‘lardim–da!

²⁹Hatto g‘animlarimga kelgan kulfatdan suyunmadim, Boshiga ofat tushganda quvonmadim.

³⁰Ularni qarg‘ashdan o‘zimni tiydim, Boshimga gunoh orttirmadim.

³¹Xizmatkorlarim shunday derdilar: “Ayubning chodirida go‘sht yeb, to‘ymaganlar bormi?”

³²Hech bir musofir ko‘chada tunamas edi, Chunki mening eshiklarim doimo sayohatchilarga ochiq edi.

³³Boshqalarga o‘xshab, gunohlarimni yashirmadim, Ayblarimni yuragimda saqlamadim.

³⁴Olomondan cho‘chiydiganlaru Odamlarning gapidan qo‘rqadiganlar kabi Ko‘chaga chiqmay, jim o‘tiravermadim.

³⁵Koshki endi menga quloq soladigan birortasi bo‘lsa! Mana arzimga o‘zim qo‘l qo‘yyapman. Endi Qodir Xudo O‘zi javob bersin. Qani endi, dushmanim ayblarimni yozib bersa,

³⁶Men faxrlanib, ularni yelkamga osgan bo‘lardim, Toj qilib kiyib yurgan bo‘lardim.

³⁷Har bir bosgan qadamimga javob bergan bo‘lardim, Mag‘rur bir shahzoda kabi Xudoning oldiga borgan bo‘lardim.

³⁸Agar yerlarim menga qarshi faryod qilsa, Egatlari ko‘z yoshga to‘la bo‘lsa,

³⁹Bahosini to‘lamay, hosilini yegan bo‘lsam, Dehqonlarning o‘limiga sababchi bo‘lgan bo‘lsam,

⁴⁰Bug‘doy o‘rniga tikanlar o‘ssin, Arpa o‘rniga gazanda o‘tlar chiqsin.” Shunday qilib, Ayubning gaplari tugadi.