Read O‘zbek tilidagi Muqaddas Kitob, 2013 Ayub 32 Bible Online

Ayub 32 - O‘zbek tilidagi Muqaddas Kitob, 2013 bible

Ayub 32

¹Shunday qilib, o‘sha uch kishi Ayubga boshqa gapirmadilar, chunki Ayub o‘z nazarida solih edi.

²Ammo Buz avlodining Ram xonadonidan bo‘lgan Boraxiyol o‘g‘li Elixuning jahli chiqdi. Ayub o‘zini oqlab, Xudoni ayblayotgani uchun undan qattiq g‘azablandi.

³U Ayubning uchala o‘rtog‘idan ham juda g‘azablandi, chunki ular Ayubning gapiga javob topib bera olmadilar. Natijada Xudo aybdorday bo‘lib qoldi.

⁴Elixu gapirish uchun o‘z navbatini kutib turardi, chunki boshqalarning yoshi unikidan ulug‘roq edi.

⁵Lekin ularning boshqa gapi yo‘qligini ko‘rib, Elixuning jahli chiqdi.

⁶Shunday qilib, Buz avlodidan bo‘lgan Boraxiyol o‘g‘li Elixu o‘z gapini boshladi: “Men yoshman, Sizlarning esa yoshingiz ulug‘. Shuning uchun uyalib, Fikrlarimni aytishga qo‘rqdim.

⁷Yoshi ulug‘lar gapirsin, Ko‘pni ko‘rganlar aql o‘rgatsin, dedim.

⁸[8-9] Ammo faqatgina yoshi ulug‘lar dono bo‘lmaydi, Nima to‘g‘riligini faqat keksalar tushunavermaydi. Axir, insonga uning ichidagi ruh — Qodir Xudoning nafasi aql–idrok beradi–ku!

¹⁰Shuning uchun menga quloq soling, Men ham o‘z fikrimni bayon qilay.

¹¹Sizlar gapirganda jim turdim, Dono gaplaringizga quloq soldim. Gap qidirganingizda ham kutib turdim.

¹²Sizlarga diqqat bilan quloq soldim, Lekin hech biringiz Ayubning aybini isbotlay olmadingiz. Uning gaplariga javob bera olmadingiz.

¹³Sizlar: “Eng dono yo‘lni topdik, Ayubni inson emas, Xudoning O‘zi mag‘lub qilsin”, deya ko‘rmanglar.

¹⁴Ayub gaplarini menga qarata aytgani yo‘q. Shunday bo‘lganda ham, Men hech qachon sizlarga o‘xshab javob bermasdim.

¹⁵Ey, Ayub! Bu uchala o‘rtog‘ingiz esankirab qoldi, Gap topolmay o‘tiribdilar. Aytadigan bironta so‘zi yo‘q.

¹⁶Endi ularning aytadigan gapi bo‘lmasa, Men kutib o‘tiraveraymi?!

¹⁷Men ham javob beraman, O‘z fikrimni bildiraman.

¹⁸Ichimda so‘zlar toshib ketyapti, Ichimdagi ruh meni da’vat qilyapti.

¹⁹Qalbim ochilmagan sharob kabi jo‘shmoqda, Yangi sharob quyilgan mesh kabi yorilib ketay, deydi.

²⁰Gapirib, ozgina yozilay. Og‘iz ochib, javob beray.

²¹Men hech kimga tarafkashlik qilmayman, Hech bir insonga xushomad qilmayman.

²²Agar xushomadgo‘ylikka usta bo‘lsam, Yaratuvchim meni yo‘q qilgan bo‘lar edi.